Levítico 26 - Cofán: Chiga Tevaen'jen

¡Avujatssi'faja, ñotsse pañamba!

¹ “¡Chigambindeqquiama iñajan'fajama ni ñoña'cho chigandeccuve ñoña'fajama! Que'i andeni patuma ccutsian'fajama ‘Vaja chiga’ qquen supa. Toya'caen tevaen'cho patuma ccutsian'fajama tsanga ccaru'faye. Nane Ña gi Na'su, que'i Chiga.

² Ña manda'cho ño'faya'cho a'taja ño'fa'faja. Ñama cachuicco'je'tti'su carpanga ca'ni'da ñotsse tson'faja. Nane Ña gi Na'su que'i Chiga.

³ “Que'i ña su'choma ñotsse pañamba ña manda'choma in'jamba tson'jen'ninda

⁴ gi unjin tuite unjima moeña cuintsu que'i ande'su jon'cho ñotsse sho'yosi que'i jombachoccu'su quini'cco'qque ñotsse nañe.

⁵ Trigo tsu cucho'jeya o'fa tsajama taiya'ngae. Toya'caen o'fa tsaja tsu cucho'jeya trigoma joña'ngae. Panma tte'pputsse amba qui que'i andeni dyombi'tsse cansepa avujatssi'faya.

⁶ Ña que'i andenga tsa'caen tsonsi qui opatsse can'jemba ppimppintsse ana'jen'faya. Nane putsa'su ttesia'can que'i andeni can'jeña'bi ni faesu ande'su sundarondeccu'qque geraeñe ji'faya'bi.

⁷ Que'ija que'i enemigondeccuma dyoña mañaña. Nane tsendeccuma qui matichi'ccu fittitti'faya.

⁸ Cincoyi'cco que'i'su tsu cien enemigondeccuma dyoña mañaña. Nane cien que'i'su tsu diez milma dyoña mañaña. Matichi'ccu fittitti'fasi tsu que'i enemigondeccuja amppippi'faya.

⁹ Ña que'ima ñotsse in'jansi qui ti'tsse atapa'faya. Nane aqque'paya'bi gi ña que'i'ccu injancco'choma.

¹⁰ Fae canqque'fa'su trigoma toya an'jen'ni faesu canqque'fa'su injan'tsse cu'chosi qui taipa mani boñaña'chove me'i'onsi tssoruma joqquitssiamba cunama boña'faya.

¹¹ “Ñajan que'i'ccu cansepa que'ima catiya'bi gi.

¹² Poi a'ta gi que'i'ccu jacanqquia'caen can'jeña. Nane ñajan que'i Chigasi que'ija ña aindeccuya qui.

¹³ Ña gi Na'su, que'i Chiga, Egipto'ye que'ima somboen'su. Nane egiptondeccu ti'tsse que'ima semoesa'ne gi que'i candenama u'ccaqquia'caen que'ima ccushaen cuintsu que'i ansangembe'yi opatsse canse'faye.

¡Injama'tse egae tsinconsundeccu!

¹⁴ “Que'i ñama pañambipa ña mandaqquia'caen tson'fambiya'da–

¹⁵ ña su'choma chi'gapa ña manda'choma'qque barembi qquen su'fa'ninda– ña manda'choma ñotsse pañambipa tsa'caen ña que'i'ccu injancco'choma cati'fa'ninda–

¹⁶ gi ñajan ccane'qque que'ima catipa que'inga qquen tsoña: que'ima gi ñoa'me dyoñaña osha'cho paqque'suma moemba. Nane aje, fettupa, toya'caen ai'vo cuñosie daqque'suma gi moeña. Que'i enemigondeccu que'ima patsupa que'i tai'choma an'fayasi tsu jongoesuma joñe barembi.

¹⁷ Nane ña'qque que'i'ccu iyiccosi tsu que'i enemigondeccuja que'ima patsu'faya. Que'ima chi'gasundeccu tsu que'ima manda'faya. Faesu que'ima mandiambi'ma qui aqquia buttocan'faya.

¹⁸ “Ña tsa'caen tsonsi toya ñama ñotsse paña'fambian'da gi siete se ti'tsse que'ima vanaeña que'i egae tsincon'chone.

¹⁹ Que'i ñotssi'fa qquen in'jan'choma gi dañomba que'ima ansangiaña. Nane sefaccoma gi se'piya unjin tuisa'ne. Andema'qque gi se'piya jongoesu sho'yosa'ne.

²⁰ Aqquiatsse qui vanamba sema'jen'faya. Nane jongoesuve sho'yoya'bi ande'ye ni jongoesuve naña'bi que'i jombachoccu'su quini'cco'ye.”