Levítico 17 - Cofán: Chiga Tevaen'jen

Carpangayi fi'ttipa afeya'cho

¹ Na'su Chigaja Moisésnga qquen su:

² “Aarón, tise dutssiyendeccu, poiyi'cco israendeccunga'qque Na'su qquen manda'choma condaja:

^3-4 “Vaura quitsaye, oveja, tsambi'ta chivoma Na'su Chiganga afeye in'jamba Chigai'ccu cachuicco'je'tti'su carpani iya'cho tseniñi fi'ttipa afeye. Tsa'ma majan israe'su a'i imbe'yi, cca'tti, tise carpa jin'tti, tsambi'ta jocca'tti tsa'caen fi'tti'ta anjampama tssañañe egae tsincon'su tsu. Tsa'caen tson'ninda tisema israendeccu'ye joqquitssiaña'cho.

Anjampama ansa'ne se'pi'cho

¹⁰ “Ñanda gi chi'ga majan israe'su, toya'caen majan que'i'ccu canjen'su israembi'choa, tsa anjampama an'suma. Nane ma'caen tsomba, amba tsambi'ta cu'i'ninda, gi tisema joqquitssiaña que'i can'jen'cho'ye.

¹¹ Ñoa'me tsu anjampaja osha'cho canseqque'suma cansian'su. Toya'caen ña'qque gi tsa anjampama antte cuintsu tsai'ccu oque'je'chonga bitssaemba que'i egae tsincon'cho'ye pasaye. Nane anjampa tsu que'i egae tsincon'choma pasaemba que'ima ccushaemba cansian'su.

¹² “Tsa'cansi gi israendeccunga qquen su: Que'i israe'su ni que'i'ccu canjen'su israembindeqquia'qque anjampama an'masia tsu.

¹³ Nane majan israe'su, que'i'ccu canjen'su israembindeqquia'qque tsampini jacamba anqque'su aña'cho toya'caen chhajeqque'suma fi'tti'ta tsu tsambe anjampama andenga catipa andei'ccu oviya'cho.

¹⁴ Nane ñoa'me poi cansian jincho'su anjampa tsu tisuma cansian'su.” Toya'caen Na'su Chigaja tsain'bio faesu manda'choma'qque Moisésnga conda cuintsu israendeccunga condaye. Tsa manda'cho tsu tise'pa aiña'chone, tise'pa ande, toya'caen tise'pa gana'jen'chone condapa, coraga tson'jen'chone, tsandie pushesui'ccu can'jen'cho, toya'caen faesu chigandeccuma iñajan'chone manda.