Levítico 16 - Cofán: Chiga Tevaen'jen

Egae tsincon'choma pasaeña'cho a'ta

¹ Aarón dos dutssiyendeccu panshaen Na'su Chiga can'jen'chonga catsepa pa'fasi Na'su Chigaja Moisésnga condasepa

² qquen su: “Que quindya Aarónma condaja injanga Chigai'ccu cachuicco'je'cho cuartonga ca'nisa'ne. Nane tsa enttinge'su sarupai'ccu picco'cho cuarto tsu injanga zutsse ca'ni'masia. Toya'caen tsu Chigai'ccu injancco'fa'cho cafon'su piccofin'dija injanga catse'ma'sia. Nane ñajan tsambe ombanga onfen'bai'ccu attiansi tsu panshaen tsa'caen injanga catse'ta paya'cho.

³ Nane Aarónjan Chigai'ccu cachuicco'je'ttinga ca'ninda tsu vaura quitsa'ye chu'a toya'caen oveja quitsa'yema fi'ttipa ca'niña'cho. Vaurama tsu tisu egae tsincon'chone fi'ttipa afeya'cho. Ovejama tsu oque oraeña'chove afeya'cho.

⁴ Ca'niñe tson'jen'da tsu lino sarupama ondiccupa tsambe ombanga Chiganga catse'je'cho lino ondiccu'jema ondiccupa lino utuqui'fai'ccu utuquiya'cho. Toya'caen rande lino goroma ontsiaña'cho. O'tie tisu ai'voma tsa'ccui'ccu onjomba tsu tsa'caen Chiganga catse'je'cho sarupama ondiccuya'cho.

⁵ “Toya'caen Aarónjan dos chivoma israendeccu egae tsincon'chone afe'chove ipa oveja quitsayema'qque oque oraeña'chove iya'cho.

¹¹ “Tisu egae tsincon'cho toya'caen tise antiandeccu egae tsincon'chone tsu Aarónjan tsa vaura quitsayema ipa afeya'cho.

¹² Afe nanimba ñome'bama oque oraen'jen'cho tasama isupa tsanga Na'sunga iñajan'jen'cho oque'je'cho'su si'ngema ppiñaña'cho. Toya'caen vuvutssia ño'metssia ñome'bama dos pafuve isuya'cho. Tsama isupa sarupa piccofin'dima pashamba enttinge'su cuartonga ca'niña'cho.

¹³ Ca'nimba tsu Na'su can'jen'chonga ñome'bama si'ngenga tuiñaña'cho. Tuiñasi tsu onfen'baja Chiga a'i'ccu injancco'fa'cho cafon piccofin'dima piccoya. Tsa'caen piccosi Aarónjan paya'bi.

¹⁴ Toya'caen tsu vaura quitsaye anjampama tsimian'ccoi'ccu Chiga a'i'ccu injancco'fa'cho cafon piccofin'dinga bitssaeña'cho coejechiga sombo'jefa'su utufanga. Nane siete se tsu tsa cafon piccofin'di utufanga bitssaeña'cho.

¹⁵ Tsomba tse'ttie sombopa chivoma aindeccu egae tsincon'chone fi'ttiya'cho. Fi'ttipa tsambe anjampama'qque isupa ccase sarupa piccofin'dima pashamba Chigai'ccu cachuicco'je'ttinga ca'niña'cho. Ca'nimba Chigai'ccu injancco'fa'cho cafon ombanga toya'caen utufanga'qque ccase bitssaeña'cho. Nane vaura quitsaye anjampama bitssaenqquia'caeñi tsu chivo anjampama'qque bitssaeña'cho.

¹⁶ Tsa'caen tsu Chigai'ccu cachuicco'je'tti'su cuartoma giyaeña'cho israendeccu Chigama pañambipa iyicca'yepa injanga egae tsincon'chone. Toya'caen tsu Chigai'ccu cachuicco'je'tti'su carpama'qque tsa'caeñi giyaeña'cho. Nane tsa carpaja israendeccu can'jen'cho, toya'caen tise'pa egae tsincon'cho, enttingeni tsu ccutsu.

¹⁷ “Aarón toya Chigai'ccu cachuicco'je'tti'su cuartoni egae tsincon'chone pasaeñe afaye can'jen'ninda tsu tise somboya'ngae majañi'qque Chigai'ccu cachuicco'je'tti'su carpani can'jen'masia. Nane Aarón tsa'caen afasi Chigaja tise egae tsincon'cho, tise antiandeccu, toya'caen poi israendeccu egae tsincon'choma'qque pasaensi

¹⁸ sombopa tsu Na'su Chigama iñajan'jen'cho oque oraen'jen'choma'qque giyaeña'cho. Nane majan vaura quitsaye anjampa, chivo anjampama'qque isupa tsai'ccu oque'je'cho'su cuatro ontsian'ccoma onjoeña'cho.

¹⁹ Toya'caen tsu tsimian'ccoi'ccu oque'je'chonga siete se anjampai'ccu bitssaeña'cho. Tsa'caen tsomba tsu oque'je'choma israendeccu egae tsincon'cho'ye giyaeña'cho, Chigambeve tsoñe.

²⁰ “Aarónjan tsa'caen Chigai'ccu cachuicco'je'tti'su cuarto, Chigai'ccu cachuicco'je'tti'su carpa, toya'caen oque oraen'jen'choma giyaemba toya cansian chivoma iye mandaya'cho.

²¹ Isi tsu tise tivema tsa chivo tsovenga pporaemba osha'cho israendeccu Chigama pañambipa iyicca'yepa egae tsincon'chone chivo ombanga condaya'cho. Tsa'caen chivo tsove ombanga condapa tsu antte cuintsu israendeccu egae tsincon'cho chivonga iseqquia'caen iseye. Israendeccu egae tsincon'cho tsa'caen isesi tsu fae a'i tsa chivoma a'i menia angapa fetta mañaña'cho.

²² Chivoja tsa'caen a'i menia japa qquepa pa'cco israendeccu egae tsincon'choma'qque angapa qqueñaña.

²³ “Tse'i tsu Aarónjan Chigai'ccu cachuicco'je'tti'su carpanga ccase ca'nimba pa'cco tise Chigai'ccu cachuicco'je'tti'su cuartoni ca'ni'cho lino sarupa ondiccu'jema oshichhapa tse'ttinga ccuiñaña'cho.

²⁴ Toya'caen tse'ttingayi tsu tisu ai'voma tsa'ccui'ccu onjomba tisu faesu ondiccu'jema ondiccupa somboya'cho. Sombopa tsu tisune oque oraeña'choma oquepa israendeccune oraeña'choma'qque oque oraeña'cho. Nane tsa'caen oque o'raemba afesi tsu tise egae tsincon'cho toya'caen poi israendeccu egae tsincon'choma'qque pasaeña.”

³⁴ Tsangae tsa'caen manda'chosi qui anttembe'yi poi canqque'fa tsa'caen tson'jeña'cho. Nane fae se fae canqque'fa tsu tsa'caen Chiganga afeya'cho cuintsu israendeccu egae tsincon'choma joqquitssiañe.