Levítico 10 - Cofán: Chiga Tevaen'jen

Nadab toya'caen Abiú egae tson'cho

¹ Aarón dutssiyendeccu, Nadab toya'caen Abiú, tisia'can Chigama afasundeccupa oque oraen'jen'cho tasama isupa si'ngema ppiñamba ñome'bama'qque tuiñamba ja'fa Chiganga afeye. Tsa'ma Chiga manda'cho si'ngema ppiñambi'pa ccaninga si'ngema tasanga ppiñamba oque oraemba Na'su Chiganga afe'fa.

² Tsa'caen afe'fasi tsu Na'su Chiga can'jen'cho'ye si'ngeja sombopa tise'pama oque fi'tti sefaen. Nane Na'su tsa'caen tsonsi tsu pa'fa.

³ Omboe Aarón iyicca'yesi Moisésja tisema qquen su: —Tsane tsu Na'su Chigaja qquen su: ‘Majan ñanga catsesi gi tisenga ña ñotssiama canjeña. Nane poi israendeccunga gi tisu oshacho ñotssiama canjaeña.’ Tsa'caen susi Aarónjan ziya.

⁴ Omboe Moisésja Aarón ton'ton Uziel dutssiyendeccu, Misael toya'caen Elzafánma, ttu'sepa qquen su: —Jipa que'i antiandeccu'yema Chiganga catse'je'cho cuarto'ye somboen'faja. Somboemba tise'pa ai'voma aindeccu can'jen'tti'ye joqquitssian'faja.

⁵ Pañamba jipa pa'chondeccumbe ai'vo toya ondiccu'jepama aindeccu can'jen'tti'ye joqquitssian'fa Moisés mandaqquia'caen.

Chigama afasundeccu tson'jeña'cho

⁶ Omboe tsu Moisésja Aarónga toya'caen tise dutssiyendeccu, Eleazar, Itamarnga'qque qquen su: —Que'i tosema fuchhambe injanga anttejama ni que'i ondiccu'jema chittajama ñombi'ye'choma canjaeñe. Nane tsa'caen tson'ninda isha tsu Chigaja que'ima fi'ttipa poi israendeccuma'qque iyicca'yeya. Tsa'ma que'i antiandeccu, toya'caen poi israendeccu tsu Nadab'ye, Abiú'ye egae tsonsi Na'su Chiga ju'rutssia si'ngema moemba fi'tti'chone ñombi'yeye osha'fa.

⁷ Toya'caen que'ija Chigai'ccu cachuicco'je'tti'su carpa sombo'tti'ye sombojama, pasa'ne. Nane que'ija Na'su Chiga in'jan'cho aindeccupa qui Na'sumbe yayapai'ccu onjon'chondeccu.