Jueces 3 - Cofán: Chiga Tevaen'jen

Ñoquian'su Otoniel

⁷ Israendeccu egae tsincon'fasi Na'su Chigaja atte'ma in'jambi. Nane Na'suma aqque'papa osha'cho chiga Baal toya'caen chiga Astarté ñoña'choma iñajan'jen'fa.

⁸ Tsa'caen tson'fasi Na'su Chiga tise'pama iyicca'yepa antte cuintsu Mesopotamia'su na'su, Cusan-risataim, tise'pama patsuye. Nane patsusi tsu ocho canqque'fave israendeccuja tisema pañamba sema'jen'fa.

⁹ Tsa'caen vana'jemba Na'su Chigama iñajan'ninda Na'suja ñoquian'suma ccutsian tise'pama ccushaeñe. Ñoquian'su tsu Cenaz dutssi'ye, Otoniel. (Cenaz tsu Caleb quinshin.)

¹⁰ Na'su Chiga Qquendya'pa Otonielma in'jaensi israendeccuma angacan. Tsa'caen israendeccu Cusan-risataima iyiccoye ja'fasi Na'su tise'pama fuite cuintsu patsu'faye.

¹¹ Tsa'caen patsupa cuarenta canqque'fave ñotsse opatsse canse'fa. Otoniel pasi

Aod Moab'ye ccushaen'cho

¹² israendeccu ccase egae tsincon'fasi Na'su Chiga atte'ma in'jambi. In'jambipa iyicca'yepa antte cuintsu Moab na'su, Eglón, israelma ti'tsse quin'ame daye.

¹³ Quin'ame dapa Eglónja amonitandeccui'ccu amalecitandeccui'ccu'qque fae'ngae fuitecco'fa'chove afapa israendeccui'ccu geraen'fa. Geraemba Jericó canqquema patsusi

¹⁴ israendeccuja diez y ocho canqque'fave Eglónma pañamba sema'jen'fa.

¹⁵ Tsa'caen vanamba can'jemba Na'su Chigama iñajan'ninda tsu ñoquian'suma ccutsian israendeccuma ccushaeñe. Tsaja Benjamín aindeccu'su Gera dutssi'ye, Aod. Aodja pavefa'su a'i.