Jueces 15 - Cofán: Chiga Tevaen'jen

Sansón iyicca'yepa tson'cho

¹ Can'jemba trigoma taiteve nepisi Sansónjan Timnatni tise pushema can'su jayipa chivo du'shuma'qque anga. Nepipa su: —Ña pushe cuartonga ca'nimba atteye gi in'jan. Tsa'ma pushesumbe yayaja ca'niñe se'pi, qquen supa:

² —Tsangae ti qui tisema chi'gapa ja qquen in'jamba gi quema shondo'sunga tayo afe. Tise que'tte tsu ti'tsse me'detssi. Tsama pusheja coenzama pushepa pasa'chone.

³ Tsa'caen susi Sansónjan ñoa'me iyicca'yepa su: —Que'i tsa'caen ñama egae tsonsi ñotssi tsu ña iyicca'yepa filisteondeccuma dañoñe.

⁴ Tsa'caen supa japa tresciento pandove indipa tise'pa atsefanaccu tandan dos, dosve. Tandamba poi dos atse'fa tandan'chonga singete'cho tuñoma tandan.

⁵ Tsomba tuñoma setsa'tsaemba pandondeccuma fetta maña filisteondeccu toya taimbi'choa trigo nasipanga. Moesi japa taipa boña'cho toya'caen toya taimbi'choa trigoma metsse oque cati'fa. Nane ofa tsaja nasipa toya'caen olivo quinisisiccoma'qque metsse oque cati'fa.

⁶ Oquesi filisteondeccu majan tsa'caen tson'chove iñajampañasi tsu su'fa: —Sansón, tsa Timnat'su du'su, tise pushema tisema shondo'sunga tise quitsa ccashe'ye afesi iyicca'yepa tsa'caen tson'chove. Pañamba filisteondeccu japa Sansón pushe, tise yayama'qque oque cati'fa.

⁷ Tsonsi Sansónjan ti'tsse iyicca'yepa su: —Que'i jova'caen tsincon'ninda gi anttembe'yi que'ima dañoña.

⁸ Tsa'caen supa dyo'tssia putsa'suve dapa tsain'bitssi filisteondeccuve fitti'tti. Fitti'tti nanimba japa Etam patu'su changoni canse.

⁹ Tsonsi filisteondeccu Judá andeni jipa tise'pa carpama ccutsutsian'fa Lehini.

¹⁰ Tsa'caen ji'fasi Judá'su aindeccu catsepa iñajampaña'fa: —¿Jongoesie qui ingi'ccu iyiccoyeta ji'fa? Tsonsi tsu su'fa: —Sansónma indiye gi ji'fa cuintsu tise inginga tson'chone afepoeñe.

¹¹ Tsa'caen pañamba tres mil Judá'su aindeccu bopa Etam patu'su changoni japa Sansónma su'fa: —¿Atesumbi ti qui filisteondeccuja ingi nasundeccu tsu? ¿Jongoesie qui tsa'caen tsincomba tise'pama iyicca'yean? Sansónjan su: —Nane tise'pa ñama tsonqquia'caen gi ccane'qque tise'pama tson.

¹² Tsonsi tsu Sansónma su'fa: —Quema indipa tandamba filisteondeccunga afeye gi ji'fa. Tsa'caen su'fasi Sansónjan iñajampaña: —Tansintsse su'faja ¿que'ita ti qui ñama fi'tti'faya'bi?

¹³ Tsonsi tsu su'fa: —Me'in, ingija quema fi'tti'faya'bi gi. Tsa'ma aqquia quema tandamba tise'panga afeye gi ji'fa. Tsa'caen supa Sansónma dos cuna sogai'ccu tandamba somboen'fa tise a'tupa can'jene.

¹⁴ Filisteondeccu canjen'cho Lehini nepijisi attepa filisteondeccu avujatsse fundoccopa sombo'fa. Tsa'caen fundopa ji'fasi Na'su Chiga Qquendya'pa Sansónma in'jaensi tisema tandan'cho sogama jongoesu lino ju'ru shequeqquia'caen tisu tivei'ccu opattu shequian.

¹⁵ Opattu ttovapa tse'tti boro ccotai'cco'su tsu'tta cuna ccui'choma isupa tsai'ccu mil tsandiendeccuve fitti'tti.

¹⁶ Fitti'tti nanimba su: “Boro ccotai'cco'su tsu'ttai'ccu gi dos boñame tson. Boro ccotai'cco'su tsu'ttai'ccu gi mil tsandiendeccuve fitti'tti.”

¹⁷ Tsa'caen afa nanimba boro cataicco'su tsu'ttama ttova cati. Tsa ccotta'ccoma ja'ño a'ta pan tsu Ramat-lehi qquen inisiancho'fa, ccotai'cco'su tsu'tta ccotta'cco qquen suye.

¹⁸ Tsomba tsa'caen fitti'tti nanimba ñoa'me tsaqquie'supa Na'su Chigama quian'me afapa qquen su: “¿Ma'caen qui tayo ña patsuya'chove tsomba ja'ñojan antte ña tsaqquie'supa va Chigave in'jambindeqquianga payeta?”

¹⁹ Tsa'caen afasi Chiga Lehi ccotta'cco'su tsa'ccu sombo'je'ttima fettasi tsa'ccuja sombo. Sansónjan tsa'ccuma cu'ipa ccase quin'supaen dapa ccusha. Tsa'cansi tsu tsa tsa'ccu Lehini sombo'je'ttima ja'ño a'ta pan En-hacore'qque inisiancho'fa.

²⁰ Sansónjan veinte canqque'fave israendeccuma angacan filisteondeccu manda qquen tson'jeinte.