Jueces 14 - Cofán: Chiga Tevaen'jen

Sansón pushe'cho

¹ Sansónjan coemba Timnat canqqueni japa chu'a filisteo'su pushesuma atte.

² Attengapa jipa tise yaya tise mamama su: —Timnatni japa gi filisteo'su pushesuma atte. Tisema afa'faja ña pusheye.

³ Pañamba tise yaya tise mama'qque su'fa: —¿Que antiandeccu'suta ti ñotssia pushesuta jimbi? ¿Israendeccu'su ñotssia pushesuta ti jimbi? ¿Jongoesie qui Chigave in'jambi'choa filisteondeccu'su pushesuma pusheye in'jan? Tsa'ma Sansónjan tise yayama su: —Tsa pushesu tsu ñoa'me ña in'jan'cho. Tisema gi tisu pusheve in'jan.

⁴ (Nane tise yaya tise mama'qque atesu'fambi tisema Na'su Chiga in'jaensi tsa'caen in'jan'chove. Nane filisteondeccu israendeccuma patsupa manda'jesi Na'su ma'caen tsomba filisteondeccuma dañoña'chove ttatta'je'choma atesu'fambi.)

⁵ Tsa'caen supa Sansón, tise yaya tise mama'qque fae'ngae Timnatni ja'fa. Sansón Timnat'su ofa tsaja nasipanga nepipa tise mama tise yayama o'tie jayisi tse'faei'ccuyi chu'a ttesi quin'an fundopa tisenga butto catse. Catsesi

⁶ Na'su Chiga Qquendya'pa Sansónma fuitesi tisu tivei'ccuyi ttesima sirian cati chivo du'shu chu'ama fi'ttiqquia'caen. Tsa'ma tsa'caen tsomba tise yaya ni tise mamanga condambi.

⁷ Timnatni nepipa tsa pushesui'ccu condasepa ñotsse injanccopa pusheye afa'fa.

⁸ Omboen tsa pushesuma pusheye ccase Timnatni jayipa tisuyi ccafanga ja ttesi pajin ccui'choma cañe. Japa atte tsani tuño nasi tsao'paensi cuñajun'cho jinchoma.

⁹ Attepa tivei'ccu tsomi somboemba án jayi. Tsa'caen jayipa tise yaya tise mamama cachuipa tise'panga'qque afe. Isupa an'fa'ni'qque Sansónjan tise'pama condambi ttesi papa ccui'chombe ai'vo'su cuñajun'choma isu'chove.

¹⁰ Sansón yaya pushesui'ccu osha'chove ñoñasi tsu Sansónjan fiestaen'jen tisupa ma'caen atesuqqueningae.

¹¹ Tsa'ma filisteondeccuja tisema dyojopa treinta tsa canqque'su tsandiendeccu tise fiestani can'jen'fa.

¹² Fiestaen'jeni tsa treintanga Sansónjan su: —Va ña su'choma in'jamba condacan'faja. Siete a'tangae toya fiesta ji'niñi que'i in'jamba conda'fa'ninda gi que'inga afeya treinta tso'singa ondiccuqque'su totoa lino sarupa ondiccu'je toya'caen treinta ñotssia fiesta ondiccu'jema'qque.

¹³ Tsa'ma va ña su'cho in'jan'choma condaye osha'fambi'ta que'i qui ñanga tsa'caen treinta tso'singa ondiccuqque'su lino ondiccu'je toya'caen treinta ñotssia fiesta ondiccu'jema afe'faya'cho. Tsonsi tsu su'fa: —Ñotssi tsu. Que in'jan'choma inginga condacanjan ingi pañamba in'jancañe.

¹⁴ Tsonsi Sansónjan su: “An'su'ye tsu anqque'suja sombo. Majan quin'an'ñe tsu ansintssiaja sombo.” Tres a'ta pasa'ni'qque toya tsu tsa su'choma condaye osha'fambi.

¹⁵ Cuarto a'tanga toya oshambipa iyicca'yepa Sansón pusheni jipa su'fa: —Que tsa'nduma noñangiamba iñajampañajan cuintsu tise su'choma a'tatsse inginga condaye. Condambian'da gi que tsa'oma oquepa que, que yayapama'qque fi'ttiya. ¿Aqquia ingimbema cca'nañe in'jamba ti qui ttu'se'fa?

¹⁶ Tsonsi Sansón pusheja Sansóni jipa i'namba munsimba su: —Queja ñama chi'ga. Ñoa'me qui ñama in'jambi. Ña aindeccunga que in'jan'choma afapa ñangaja a'tatsse que in'jamba su'choma condambi. Tsa'caen i'namba susi Sansónjan su: —Ju. Ni ña yaya ni ña mamanga conda'can gi quengata bove condaya.

¹⁷ Tsa'ma panshaen iñajampañamba septimo a'tangae i'nasi Sansónjan quimbipa tisenga conda. Nane septimo a'ta tsa fiesta pasaya'cho a'ta tsu tisenga conda. Condasi pañamba tse'faei'ccuyi tise pusheja aindeccunga japa tise tsa'ndu su'cho in'jan'choma conda.

¹⁸ Pañamba tsa septimo a'ta toya chiga amppimbi'te tsa canqque'su tsandiendeccuja Sansóni jipa su'fa: “Metssi tsu cuñajun'choma ti'tsse ansintssia've. Metssi tsu ttesima ti'tsse quin'anme.” Pañamba Sansónjan su: —Ña vaura pushei'ccu andema dyan'dyambiecan'da toya qui ña in'jamba su'choma atesu'fambiye'can.

¹⁹ Tsonsi Na'su Chiga Qquendya'pa tisema in'jaensi Sansónjan Ascalón canqqueni japa treinta a'ive tsa canqque'su tsandiendeccuma fitti'tti. Fitti'ttipa tsendeccumbe ondiccu'jema oshichhaemba ipa afe tise in'jamba su'choma condasundeccunga. Tsa'caen tsomba ñoa'me iyicca'yepa somboin ja tise yaya tsaoni.

²⁰ Sansón tsa'caen iyicca'yepa jasi pushesu yaya tsu Sansón pushema afe tisema shondo'sunga, tsa casara'choni fae'ngae ccutsu'su tsandienga.