Jueces 13 - Cofán: Chiga Tevaen'jen

Sansónma isu'cho

¹ Ccase israendeccu Na'su Chigama pañambiqquia'caen egae tsincon'fasi Na'suja antte cuintsu cuarenta canqque'fave filisteondeccu tise'pama patsupa manda'jeye.

² Zora canqqueni tsu israe'su Dan aindeccu'su tsandieja can'jen. Tise iniseja Manoa. Manoa pusheja dusumbipa du'shu me'cho canse.

³ Tsa'ma Na'su Chigama sefacconi'su shondo'suja Manoa pushenga attiamba su: “Queja du'shuve isuye oshambi'pa qui me'cco canse. Tsa'ma ja'ñonda qui surive dapa tsandie du'shuve isuya.

⁴ Tsa'ma ñotsse in'janjan: Vino ni faesu ccusianqque'suma cu'ijama. Toya'caen se'pi'cho aña'choma'qque anjama.

⁵ Tsandie du'shuve qui isuya. Tiseja tisu tosema chattu'jeya'bi tsu. Nane tsa du'shuja toya isuyembiteyi Chiga ñotsse injan'chopa tsu nazareo a'iya. Tisei'ccu tsu Na'su Chigaja ashaeña israendeccuma filisteondeccu'ye ccushaeñe.”

⁶ Tsa'caen susi pushesuja tise tsa'ndunga japa pa'ccoma condase: “Chigambe a'i tsu ñanga ji. Ñoa'me dyo'tsse Na'su Chigama shondo'sia'caen tsu attian. Tise mane ji'chove gi iñajampañambi. Ni tise'qque tisu inisema condambi.

⁷ Tsa'ma qquen tsu ñama su: ‘Queja surie dapa tsandie du'shuve isuya. Tsa'camba ni vino ni faesu ccusianqque'suma cu'ijama ni se'pi'cho aña'choma'qque anjama. Nane du'shuja isuyepa paya'ngae tsu Chigambe nazareo a'iya.’ ”

⁸ Tsama pañamba Manoajan qquen Na'su Chigama iñajan: “Na'su Chiga, chigáne que moe'cho a'ima ccase inginga moejan cuintsu ma'caen tsandie du'shuma isupa coeñaña'chove inginga condaye.”

⁹ Chigaja Manoama pañamba ccase Tisema sefacconi'su shondo'suma pushesunga moe nasipani can'jen'chonga. Attepa tise tsa'ndu tisei'ccu can'jembisi

¹⁰ cushoan'me tisema condaye japa qquen su: —¡Ccase tsu ji faesu a'ta ñanga attian'cho a'i!

¹¹ Pañamba Manoa jangipa tise pushei'ccu nasipani ja. Japa a'ima cachuipa iñajampaña: —¿Que ti qui faesu a'ta ña pushei'ccu condase'su? Sefacconi'su shondo'suja su: —Ju, ña gi.

¹² Tsonsi Manoa tisema iñajampaña: —¿Minga'ni que inginga su'cho nepi'ninda, ma'caen tsomba gi tsa du'shuma coeña'faya'cho? ¿Mingae gi tsai'ccu tson'faya?

¹³ Na'su Chigama sefacconi'su shondo'suja su: —Que pushe tsu pa'cco ña suqquia'caen tsoña'cho.

¹⁴ Nane o'fa tsaja jincho'cho'suma ambe'yi ni vino ni faesu ccusianqque'suma cu'imasia. Toya'caen se'pi'cho aña'choma'qque tsu ambe'yi canseya'cho. Nane pa'ccoma tsu ña mandaqquia'caen tsoña'cho.

¹⁵ Tsonsi Manoajan Na'suma sefacconi'su shondo'sunga su: —In'jan'fa gi va'tti que can'jen'ni ingi japa chivo du'shuma quembe sho'ccoemba iye.

¹⁶ Chigama sefacconi'su shondo'suja su: —Que ñama se'pisi canjen'anqque añambi gi que aña'choma. Tsa'ma oque oraeña'chove ñoñamba Na'su Chiganga afeja. (Manoajan toya tsu atesumbi tsa a'ija ñoa'me Na'su Chigambe sefacconi'su shondo'suve.)

¹⁷ Tsonsi Manoajan Na'sumbe sefacconi'su shondo'suma iñajampaña: —Condaja jongoesu inise qui, toya'caen minga'ni que suqquia'caen dasi cuintsu ingi quema ñotsse afa'faye.

¹⁸ Tsa'caen iñajampañasi su: —¿Jongoesie qui ña inisema atesuye in'jan? Tsaja ñoa'me atesu'ma'sia tsu.

¹⁹ Tsonsi Manoajan chivo du'shu toya'caen trigoma'qque afe'chove ipa patunga ccuiñamba Na'su Chiganga oquepa afe. Afepa toya caña'jen'fa'ni Na'suja ccaningae tsonsi bo'yo'e dapa can'boen'fa.

²⁰ Nane oque oraen'cho si'nge anchandasi tsu Na'su Chigama sefacconi'su shondo'suja si'ngenga ca'nimba sefacconi ansunde. Tsama attepa Manoa tise pushe'qque camba'jui'ccu andenga amppi ccui'fa.

²¹ Na'suma sefacconi'su shondo'suja ccase Manoa toya'caen tise pushenga attiambisi Manoajan in'jan ñoa'me Na'su Chigama sefacconi'su shondo'su tsu.

²² In'jamba tise pushenga su: —¡Ñoa'me gi paye tson'jen'fa tayo Chigama attepa!

²³ Tsa'ma tise pusheja su: —Ñoa'me Na'su Chiga ingima fi'ttiye in'jan'choecan'da tsu ingi oquepa afe'cho ni ingi trigo afe'choma'qque in'jambiye'can; ni osha'choma canjembi'ye'can ni jongoesuma'qque condambiye'can.

²⁴ Omboe pushesuja tsandie du'shuve isupa tisema inisian Sansónme. Tsa coenjinsi Na'suja tisema ñotsse tson'jen.

²⁵ Toya Sansón Dan aindeccu can'jeni can'jen'ni tsu Chiga Qquendya'pa tisema in'jaeñe ashaen. Tise'pa can'jen'tti tsu Zora toya'caen Estaol canqque enttingeni.