Josué 9 - Cofán: Chiga Tevaen'jen

Gabaonitandeccu afopoen'cho

^1-2 Jordánma chiga amppi'jefa'su nasundeccu tsa tson'choma pañamba bo'fa israendeccui'ccu iyiccoye. Nane majan ccotta'cconi canjensundeccu, sinjunccuni canjensundeccu toya'caen rande mar otafani canjensundeccu Líbano andepie, tsu Josuéi'ccu iyiccoye bopa condasecco'fa. Nane tsa hitita'su, amorreo'su, cananeo'su, ferezeo'su, heveo'su toya'caen jebuseo'su nasundeccu tsu tsa'caen bo'fa.

³ Tsa'ma Gabaón canqque'su heveondeccuja Josué Jericóma toya'caen Haima patsu'choma pañamba

⁴ asi'ttaemba afopoeñe ashaen'fa. Nane tssoru saquiyo toya'caen vinoma angaqque'su ttono botiyama pi'pi'choma'qque otsian'fa tise'pa boronga.

⁵ Tssoru sapatoma pi'pi'choma ejiamba tssoru ondiccu'jema ondiccu'fa. Tise'pa angaya'cho panjan ñoa'me sambapa tayo munsan'cho.

⁶ Tsa'caen ñoñamba Gilgalni ji'fa Josuéi'ccu condaseye. Jipa tsu Josué toya'caen israendeccunga'qque qquen su'fa: —Biani'su ande'ye gi ji'fa que'i'ccu fae'ngae injanccoye.

⁷ Tsa'ma israendeccuja tsa heveondeccunga su'fa: —Isha que'ija ingi'ccu pporotsse canjensundeccumajan ¿ma'caen gi que'i'ccu fae'ngae injancco'faya?

⁸ Tsa'ma tsendeccuja Josuénga su'fa: —Que'ima shondosundeccuve ingima ca'niajan. Tsa'ma Josuéja tise'pama iñajampaña: —¿Ma'candeqquia qui? ¿Mani tsu que'i ande?

⁹ Tsonsi tsu su'fa: —Que'ima shondosundeccuja ñoa'me biani'su andeni can'jemba Na'su que'i Chigama pañamba gi ji'fa. Nane Na'su Chiga Egiptosundeccuma tson'choma pañamba

¹⁰ toya'caen tsa Jordán na'ema chiga sombo'jefa'su dos amorreo'su nasundeccuma patsu'choma'qque gi paña'fa. Hesbón canqque'su na'su, Sehón, toya'caen Basán ande'su na'su, Og, tsa Astarot canqqueni canjen'suma'qque patsu'fa qquen gi biane paña'fa.

¹¹ Tsa'caen pañamba tsu ingi coenzandeccu, toya'caen poiyi'cco ingi andeni canjensundeccu'qque ingima qquen su'fa: ‘Anqque'suve ñoñamba japa israendeccuma cachuiccopa qquen su'faja: Ingija que'ima shondosundeccu gi. Tsa'cansi chigáne ingi'ccu fae'ngae injancco'faja.’

¹² Ñoñamba que'ini jiye sombosi va ingi panjan toya ju'rutssi tsu. Tsa'ma ja'ño que'ini ne'pitsse tsu sambapa tayo munsan.

¹³ Toya'caen cuna ttono botiyama gi isupa vinoma fiñamba sombopa ji'fa. Tsa'ma ja'ño sambapa tayo doji. Ingi sapato, ingi ondiccu'je'qque tayo tssoruve da'fa biani ji'fasi.

¹⁴ Tsa'caen su'fasi Israel aindeccuja injanga tsendeccu i'cho osha'choma pporaen'fa. Tsa'ma Na'su Chigama iñajampaña'fambi.

¹⁵ Tsonsi Josuéja fae'ngae injancco'faya'chove afa tsa aindeccu cuintsu opatsse canse'faye. Toya'caen tsa bo'fa'cho coenzandeccu'qque “Ju” qquen ñoa'me su'chove su'fa.

¹⁶ Tsa'caen gabaondeccui'ccu injancco'fa'cho tres a'ta pasasi israendeccuja paña'fa tsendeccu tise'pai'ccu pporotsse can'jen'chove.

¹⁷ Pañamba jaye ashaemba tres a'ta japa nepi'fa tise'pa canqqueni: Gabaón, Cafira, Beerot toya'caen Quiriat-jearimni.

¹⁸ Tsa'ma tsa'caen tseni nepi'ma tise'pai'ccu iyicco'fambi, fae'ngae injanccoya'chove tayo afapa. Nane tayo tsu israendeccu'su bo'fa'cho nasundeccuja Na'su Chiga paña'jen'ni tise'pai'ccu fae'ngae injancco'fa. Tsa'caen iyicco'fambisi aindeccuja iyicca'yepa egae afa'fa tise'pa nasundeccuma.

¹⁹ Tsa'caen afa'fasi tsu su'fa: —Na'su israe'su Chiga paña'jen'ni tise'pama ñoa'me su'chove afapa gi tise'pama ja'ño fi'ttiye osha'fambi.

²⁰ Tsa'ma antteya'cho tsu cuintsu canse'faye, nane ingi tise'pai'ccu fae'ngae injanccoye ñoa'me su'choma chi'gasi Chiga ingima iyicca'yesa'ne.

²¹ Toya'caen tsu su'fa: —Canseye anttepa gi si'tsive accoshasundeccuve, tsa'ccuve ichhoisundeccuve tise'pama manda'faya cuintsu tsai'ccu poi israendeccuma fuite'je'faye. Nane tsa'caen supa tise'pa ñoa'me su'choma cambian'fambi.

²² Tsonsi Josuéja gabaondeccuma ttu'sepa su: —Que'ija ingima afopoen'fa: ‘Biani canjensundeccu gi’ qquen supa. Tsa'caen afopoen'chone qui ja'ñojan

²³ qquen vana'jen'faya: Tsangae qui si'tsive accoshasundeccuve toya'caen tsa'ccuve ichhoisundeccuve dapa ingi Chiga can'jen'ttini tsa'caen sema'faya.

²⁴ Pañamba Josuénga su'fa: —Que'ima shondosundeccu gi a'tatsse paña'fa ma'caen Na'su que'i Chiga tisema shondo'su Moisésma manda cuintsu anttembe pa'cco va ande'su aindeccuma fitti'tti sefaemba pa'cco va andema tisumbe isuye. Tsa'caen paña'jemba gi paye dyojopa tsa'caen afopoen'fa tisupama ccushaeñe.

²⁵ Que'ija ingima tayo patsu'fa. Que'i ma'caen tsonsi ñotssiya'chove in'jan'da tsa'caen ingima tson'faja.

²⁶ Tsa'caen tsu Josuéja tsendeccuma ccushaen israendeccu tise'pama fittittisa'ne. Nane fi'ttimbe'yi

²⁷ tsequi a'ta gabaondeccuma si'tsive accoshasundeccuve toya'caen tsa'ccuve ichhoisundeccuve tson cuintsu poi israendeccunga toya'caen Na'su Chiganga afeye oque'je'ttinga'qque tsa'caen semañe. Ja'ño a'tapan tsu tsa'caen semamba canse'fa.