Josué 8 - Cofán: Chiga Tevaen'jen

Hai canqquema patsu'cho

¹ Tsonsi Na'su Chigaja Josuénga su: “Dyombe canjan ni ñoquimbijama. Poiyi'cco que sundarondeccuma angapa Hai canqque'su aindeccui'ccu iyicco'faja. Nane tayo gi Hai canqque'su na'suma patsupa quenga afe; toya'caen tise aindeccu, tise canqque, tise andema'qque.

² Que'i Jericó canqque, toya'caen tsambe na'suma tsonqquia'caen tsu Hai canqque, tsambe na'suma'qque tson'faya'cho. Tsa'ma Haima patsu'ta qui osha'cho tsani jincho'choma toya'caen osha'cho aiña'choma'qque tisumbe angaye osha'fa. Canqquembe ccavofanga a'tupa ronda'ya'chove ñoñajan.”

³ Tsa'caen mandasi Josuéja poi israe'su sundarondeccui'ccu Hai canqquei'ccu iyiccoye ja'fa. Trienta mil bove ñotssia sundarondeccuma attufaemba cose moe'jemba

⁴ qquen manda: “Que'ija canqquembe ccavofae japa pporotsse a'tupa ronda'je'faja. Nane ñotsse tisupa iyiccoya'chove in'jamba ronda'je'faja.

⁵ Ña, toya'caen poiyi'cco ñai'ccu jacansundeccu gi canqquenga catse'faya. Ingi tsa'caen catsesi Hai canqque'su ingi'ccu iyiccoye sombo'fa'ninda gi tayoe ingi dyopa ccuyaqquia'caen butto'faya.

⁶ Nane tsa'caen gi tson'faya cuintsu ingi tise'pama dyopa ja qquen in'jamba tsendeccu ingima mandiamba canqquembe joccani ja'faye. Ingima tsa'caen mandiamba ja'fasi

⁷ que'ija tisu a'tupa ronda'je'ttie jangipa canqquenga ca'ni'faya'cho. Nane Na'su que Chiga tsu que'inga afeya.

⁸ Tsa'caen ca'nimba patsupa si'ngei'ccu canqquema oque'faja. Tsa'caen tsu Na'suja manda. Ña mandaqquia'caen tson'faja.”

⁹ Tsa'caen Josué mandapa moesi japa Betel canqque toya'caen Hai canqquembe enttingeni a'tupa ronda'je'fa. Nane tsefata tsu Hai canqquema chiga amppifani. Tsa'ma Josuéja tsequi cose toe tisupa can'jeni ana.

¹⁰ Ccaqui a'tasi Josuéja toya'caen israe'su coenzandeccu'qque poiyi'cco tise'pa sundarondeccuma ttu'se boñamba ñotsse camba Hai canqquenga catseye anga.

¹¹ Tsa'caen tansintsse japa canqquenga nepijipa tsa canqque nortefanga japa tisupa anaña'chove ñoña'fa. Nane tse'tti'ta tsu tise'pa toya'caen canqquembe enttingeni sinjunccuja jin.

¹² Tsomba Josuéja cinco mil sundarove a'tu Betel canqque toya'caen Hai canqquembe enttingenga tsa Hai canqquema chiga amppi'jefanga.

¹³ Tsa'caen tsonsi tsu sundarondeccuja dos naccuve attufa'fa. Fae naccuja canqquema chiga amppi'jefani a'tupa can'jen'fa. Toya'caen faesu naccuja Josuéi'ccu can'jen'fa canqque sombo'tti isevetsse. Tsa'caen can'jemba tsequi cose Josuéja sinjunccumbe enttingeni ja tise aindeccui'ccu.

¹⁴ Ccaqui a'tasi Hai canqque'su na'suja tsenima camba atte Jordán sinjunccuni. Tsa'caen attepa cunshoa'me poiyi'cco tisu canqque'su sundarondeccui'ccu

¹⁵ Josuéma cachuiccopa iyiccoye sombo tsa sinjunccuni. Tsa'ma tiseja atesumbi canqquembe ccavofani Israel sundarondeccu a'tupa ronda'je'choma. Tsonsi Josué poiyi'cco tisei'ccu canjensundeccu'qque tise'pama dyoqquia'caen Haine buttopa a'i menia ja'je'cho tsaiqui'ye ja'fa.

¹⁶ Tsa'caen ja'fasi poiyi'cco Hai canqque'su sundarondeccuma mandasi tisupa canqque'ye sombopa Josuéma mandiamba biani ja'fa. Tsa'caen omboemba tise'pa canqquema cati'fa.

¹⁷ Nane ni fae tsandieyi'qque can'jembi Hai canqque ni Betel canqqueni. Tsa'caen poiyi'cco israendeccuma mandiamba ja'fasi majan canqquene se'pipa iyiccoya'chove me'i'on.

¹⁸ Tsonsi Na'suja Josuéma su: “Que oma'ccoma yasaja Hai canqqueningae. Nane que tivenga gi tsa canqquema afeya.” Tsa'caen susi Josuéja tise oma'ccoma yasá Hai canqqueningae.

¹⁹ Tsa'caen tsonsi a'tupa rondasundeccuja ccushoa'me jangipa buttopa canqquenga ca'ni'fa. Ca'nimba patsupa tse'faei'ccuyi si'ngei'ccu oque'fa.

²⁰ Tsa'caen tson'fasi Hai canqque'su sundarondeccu toenima piyicamba canqque'ye juru'je'cho onfen'ba sefacconi jangi'choma atte'fa. Attepa tise'pa mani jaya'chove me'i'on. Tseni a'i meniangae buttopa ja'cho israendeccuja toequi jipa mandiansundeccuma ccane'qque mandian'fa.

²¹ Josué toya'caen poiyi'cco tisei'ccu ja'su israendeccu canqque'su onfen'ba jangi'choma atte'fa. Tsama attepa tayo a'tupa can'jendeccu Hai canqquema patsu'fa qquen in'jamba tsa'caen toequi jipa Hai'su sundarondeccui'ccu iyicco'fa.

²² Toya'caen a'tupa canqquema patsusundeccu'qque canqquene sombopa jipa tise'pai'ccu iyicco'fa. Israendeccuja tsa'caen poine jipa enttingenga Hai canqquesundeccuma ttupa poiyi'cco a'ima metsse fittitti'fa.

²³ Tsa'ma Hai canqque'su na'sumajan canseveyi indipa Josuéni i'fa.

²⁴ Israendeccuja tsa'caen tise'pama sinjunccu tsa a'i menia mandiamba ji'cho Hai canqquesundeccuma metsse matichi'ccu fitti'tti nanimba, toequi Hai canqqueni japa majan toya tseni canjensundeccuma fittitti'fa.

²⁵ Tsequi a'ta tsu doce mil a'i pa'fa. Nane poiyi'cco Hai canqque'su tsandie, pushesu'qque pa'fa.

²⁶ Nane Josuéja tise oma'ccoma yasapa poiyi'cco Hai canqque'su aindeccuma fitti'tti'faya'ngae anttembe'yi yasácho.

²⁷ Tsa'ma Na'su Chiga Josuéma manda antteqquia'caen tsu israendeccuja pa'cco aiña'cho toya'caen osha'cho tsa canqqueni jincho bare'choma anga'fa tisupambe.

²⁸ Josué Hai canqquema oque cati'choja cusepaveyi tsu da. Nane ja'ño a'tapan tsu tsa'caen jincho.

²⁹ Josuéja Hai canqque'su na'suma cose'tsse quini'cconga tandan dusiamba fi'tti. Sime tayo chiga amppisi manda cuintsu tsa ai'voma andiamba canqque'su sombo'tti jin'ttinga ttova cati'faye, toya'caen tise ombanga cuintsu tsain'bitssi patuve boña'faye. Tsa'qque tsu ja'ño a'tapan toya jincho.

Injancco'fa'choma ccase afa'facho

³⁰ Tsonsi Ebal ccotta'cconi Josuéja Na'su Israel Chiganga oque oraen'jeña'chove ñoña.

³¹ Nane Moisés tsa Na'su Chigama shondo'su israendeccunga mandaqquia'caen tsama ñoña. Moisés manda'cho tevaen'jen tsu su: tivei'ccu ñoñambi'choa patuma tsu boñamba ñoñaña'cho. Tsanga tsu israendeccuja oque oraemba Na'su Chiganga afe'fa. Toya'caen tsu afe'fa Na'su Chigai'ccu tisupa ñoquiccoya'chove'qque.

³² Tse'tti poi israendeccu caña'jen'ni tsu Josuéja Moisés manda'choma faesu patu ccutsian'chonga Moisés tayoe tevaenqquia'caen ccase tevaen.

³³ Poiyi'cco aindeccu, nane Israel omba'su dushundeccu, ccane jipa tise'pai'ccu can'jen'chondeccu, poiyi'cco coenzandeccu, nasundeccu toya'caen ñoquiansundeccu'qque tse'tti Na'su Chiga a'i'ccu injancco'fa'cho cafonma poifani ccutsu'fa. Cafonma opipa anga'su Chigama afa'su levítandeccumbe isevetsse tsu tsa'caen ccutsu'fa. Enttinge a'ija Gerizim ccotta'cco jin'tti ccutsu'fa. Faesu enttingeja Ebal ccotta'cco jin'tti ccutsu'fa. Nane Na'su Chigama shondo'su Moisés tayoe mandaqquia'caen tsu tsa'caen ccutsu'fa Josué su'choma ñotsse paña'faye.

³⁴ Tsonsi Josuéja pa'cco Chiga manda'choma afa —ñotsse tsomba avujaya'cho toya'caen egae tsomba vanaña'choma —Chiga manda'cho suqquia'caen.

³⁵ Nane pa'cco Moisés mandapa tevaen'choma tsu Josuéja camba afa poiyi'cco israendeccu bo'fa'chonga. Nane pushesundeccu, dushundeccu toya'caen israendeccui'ccu fae'ngae canjen'su faesu ande'su aindeccu'qque tsama paña'fa.