Josué 7 - Cofán: Chiga Tevaen'jen

Acán egae tsincon'cho

¹ Tsa'ma fae'cco Judá aindeccu'su, Acán qquen inisecho'choja, injama'cho shacapa Chigambe jincho qquen in'jamba isu. Nane Acán, tsa Carmi dutssi'ye tsu tsa'caen se'pi'choma isu. (Carmi tsu Zabdi dutssi'ye. Zabdi tsu Zara dutssi'ye. Poiyi'cco tsu Judá omba'su dutssiyendeccu.) Acán tsa'caen Na'su Chiga se'pi'choma isu'chosi Chigaja ñoa'me poiyi'cco israendeccuma iyicca'ye. Tsa'cansi tise'pa'qque tsambe shacai'ccuyi shacapave da'fa.

Israendeccu shacapapa patsuye'cho

² Josuéja Acán tson'choma atesumbipa injanga majan aindeccuma manda moe cuintsu Jericóne sombopa Hai canqqueni japa a'tutsse can'ga'faye. Hai canqque tsu Bet-avén jin'tti Betel canqquema chiga sombo'jefani. Mandasi aindeccuja japa Hai canqquema a'tutsse can'ga'fa.

³ Can'gapa jipa Josuénga qquen conda'fa: “Poiyi'cco sundarondeccu jambi'ma aqquia dos tsambi'ta tres mil tsu Hai canqquema patsu'faya. Poiyi'ccoma moembecanjan, tsa canqque'su ingi'ccu iyiccoya'chondeccuja re'ricco'fa tsu.”

⁴ Tsa'caen su'fasi aqquia tres mil a'ima moesi Hai canqque'su aindeccuja tise'pama patsupa tteya mañamba

⁵ treinta y seis israendeccuve fi'tti'fa. Nane canqquema sombo'je'tti'ye ashaemba israendeccuma mandiamba patuma chattupa somboen'jen'cho andeni anga'fa. Israendeccu tseni andesi Hai canqquesundeccu fitti'ttisi tise'pa injama'cho shacapa ñoa'me chape'fa.

⁶ Tsama pañamba Josuéja iyicca'yepa tisu ñombi'ye'choma canjaeñe in'jamba tisu ondiccu'jema chi'ttapa Chiga a'i'ccu injancco'fa'cho cafonga catsepa camba'jui'ccu andenga puntssan ccui. Nane cose'tsse tsu tsa'caen puntssan ccui. Israe'su coenzandeccu'qque tsa'caen tsomba ande'su totopa'ma tisupa tsovenga ganga'fa.

⁷ Tsa'caen tsomba Josuéja su: —Na'su, Chiga Osha'choma Oshacho, ¿jongoesie qui va aindeccuma Jordán na'ema isiamba afe amorreondeccunga cuintsu ingima sefaen'faye? Nane toya jonifani can'jen'choecan'da gi avujatsse opatsse can'jen'faye'can.

⁸ Na'su, israendeccu tsa'caen patsuye'fa'ninda ¿jongoe qquen gi suya?

⁹ Nane cananeondeccu, cca'i va andeni can'jensundeccu'qque vama pañamba ingima shoquendi ttupa sefaen'faya. Tsa'caen tson'fa'ninda ¿jongoesuya tsu que inise ti'tsse'tssiata?

¹⁰ Tsonsi Na'suja Josuéma su: —¡Jangija! ¿Jongoesie qui tsa'caen andenga puntssan?

¹¹ ¡Israendeccu tsu egae tsincon'fa! Nane ña tise'pai'ccu injancco'fa'choma catipa egae tsincon'fa. Ñañi an'biaña'choma tsu isu'fa. Cca'na'fa. Afopoen'fa. Ñambema tsu tise'pa an'bian'chonga a'tu'fa.

¹² Tsa'camba tsu israendeccuja tise'pai'ccu iyiccosundeccui'ccu cambajunaccu ccutsupa iyiccoye osha'fambi. Nane israendeccuja tisupa shacaemba tsa'caen tisupa sefaya'chove tson'da tsu ja'ñojan dyopa ccuya'je'faya'cho. Toya'caen ña sefaeña'cho manda'choma que'i uta'tsse sefaembian'da gi ñajan que'i'ccu ti'tsse can'jeña'bi.

¹³ Japa aindeccuma mandaja cuintsu tise'pa injama'choma ñoña'faye, tu'i ñanga ccutsuya'chove. Nane ña, Na'su, tsa israendeccumbe Chiga gi qquen su: ‘Tsa ña metsse que'i catiya'chove anttecho'suja toya tsu israendeccuni can'jen. Tsama que'i'ye joqquitssiya'mbi'ta qui que'i'ccu iyiccosundeccui'ccu cambajunaccu ccutsuye osha'fambi.’

¹⁴ Tsa'camba tsu tu'ija poi israendeccu'su aindeccu ñanga canjaen'faya'cho. Majan aindeccu'suma ña canjaensi tsendeccu tsu tise'pa biacca antiandeccui'ccu ñanga canjaen'faya'cho. Biacca antiandeccui'ccu canjaen'fasi ña majan antiandeccu'suma canjaensi tsendeccu tsu tisupa antiandeccui'ccu ñanga canjaen'faya'cho. Tsendeccu canjaensi majan'suma ña canjaensi tsendeccu'su tsu poi tsandie fae'cco fae'cco ñanga canjaeña'cho.

¹⁵ Tsa'caen canjaemba majan a'i tsa ña pa'ccoma metsse catiya'chove manda'cho'suma an'biansi atte'ta tsu tisema si'ngei'ccu fi'ttiya'cho. Toya'caen tise dushundeccu pa'cco tise an'bian'choma'qque tsu tsa'caen oque catiya'cho. Ñoa'me tsu tsaja Na'su Chiga aindeccui'ccu injancco'fa'choma chi'gapa israendeccuma ansangiamba da'ño.

Acánma fi'tti'cho

¹⁶ Ccaqui a'ta Josué mandasi poiyi'cco israendeccu tise'pa aindeccui'ccu canjaeñe bosi Na'su Chigaja Judá aindeccuma canjaen.

¹⁷ Tsonsi poiyi'cco Judá'su biacca antiandeccu bo'fa'cho canjaen'fasi Na'su Chigaja zarandeccuma canjaen. Poiyi'cco Zara'su antiandeccu canjaen'fasi Na'su Chigaja zabdindeccuma canjaen.

¹⁸ Zabdindeccu fae'cco fae'ccoa canjaen'fasi Na'su Chigaja Acán, tsa Carmi dutssi'yema canjaen. Nane Carmi tsu Zabdi dutssi'ye. Zabdi tsu Zara dutssi'ye. Poiyi'cco tsu Judá omba'su dutssiyendeccu.

¹⁹ Tsonsi Josuéja Acánma su: —Ña in'jan'cho, Na'su Chiga, israendeccumbe Chigama ñotsse afaja. Tisema avujatsse afaja, pa'cco que tson'choma a'tiembe'yi ñanga condapa.

²⁰ Tsonsi Acánjan su: —Ju, tansintsse su'cho tsu. Ñoa'me gi Na'su israe'su Chiganga egae tsincon. Qquen tsu ña tson'cho:

²¹ Jericó canqquenga ca'nimba osha'choma attepa gi ñotssia Babilonia'su ondiccu'jema atte. Toya'caen gi atte doscientove bare'cho corifin'dima, fae kilove tssaiña'cho corima ñoña'choma'qque. Tsama attepa gi tsave in'jamba isupa ña carpani a'tupa an'bian. Nane carpa tsosiccufa'su ande changoni tsu ccui'fa, corifin'dija tsosiccufani.

²² Tsa'caen condasesi Josué mandasi ttattasundeccu Acán carpani buttopa japa atte'fa. Nane tise suqquia'caen tseni a'tu, corifin'dimajan tsosiccufanga.

²³ Attepa somboemba Josuéni ipa canjaen'fa poi israendeccunga. Nane Na'su Chiganga a'tatsse canjaen'fa.

²⁴ Tsonsi Acánma anga'fa Acor sinjunccuni. Toya'caen corifin'di, Babilonia'su ondiccu'je, corima ñoña'cho tise dutssiyendeccu, tise onquengendeccu, tise vaura, boro toya'caen oveja sheque'choma'qque, nane pa'cco tise an'bian'choma tseni Acor sinjunccuni anga'fa.

²⁵ Tseni nepipa tsu Josuéja Acánma su: —Queja ingima da'ño. Tsa'cansi tsu Na'su Chigaja ja'ño a'ta quema'qque dañoña. Tsa'caen susi poi israendeccu patuma isupa ttova'ccoen fi'tti'fa Acánma. Nane pa'cco tise'bema'qque tsa'caen patui'ccu fi'ttipa pa'ccoma si'ngei'ccu oque cati'fa.

²⁶ Acán'ñe ombanga tsu tsain'bio patuve boña'fa. Toya ja'ñopán tsu boña'cho ccui. Tsa'caen tson'fasi Na'su Chigaja tise israendeccuma iyicca'ye'choma ñoqui. Tsa'camba tsu tsa sinjunccuja toya Acor sinjunccu qquen inisecho (ansange'cho qque suye).