Josué 6 - Cofán: Chiga Tevaen'jen

Ma'caen Jericóma patsuya'cho

¹ Tsa Jericó canqqueja ta'etsse picco'cho tsu. Nane israendeccuma dyopa tsu majañi'qque sombo'jeye ni cani'jen'fambi.

² Tsa'cansi Na'suja Josuéma su: “¡Que canjan! Tayo gi Jericóma patsupa que'inga afe. Nane tsa canqque na'su toya'caen poiyi'cco sundarondeccuma'qque gi que'inga afe.

³ Queja poiyi'cco que sundarondeccui'ccu ja'ño a'ta Jericó canqquema fae seyi shoquendi'faja. Seis a'tave tsu tsa'caen tsoña'cho.

⁴ Siete Chigama afasundeccu oveja quitsa'ye can'cho tsonjen'choma an'bian'chondeccu tsu Chiga a'i'ccu injancco'fa'cho cafonma o'tie jaya'cho. Toya'caen septimo a'ta tsu ti'tsse, siete se, canqquema shoquendiya'cho. Nane Chigama afasundeccuta tsu tsonjen'choma jeñamba siete se shoquendi'jeya'cho.

⁵ Tsomba tsendeccu tsonjen'choma bia'ave jeñasi paña'da poiyi'cco a'i tsu fae'ngae fundo'faya'cho. Tsa'caen fundosi tsu canqquema ttu'choja osuiya. Osuisi tsu poiyi'cco a'i tansintsse ansundepa ca'nimba iyicco'faya'cho.”

⁶ Tsa'caen pañamba Josué, poiyi'cco Chigama afasundeccuma ttu'sepa tise'pama su: “Enttinge que'i'su Na'su Chiga a'i'ccu injancco'fa'cho cafonma opisi tsu toya'caen siete que'i'su oveja quitsa'ye can'cho tsonjen'choi'ccu tsama o'tie jeñamba jaya'cho.”

⁷ Toya'caen aindeccuma su: “¡Japa canqquema shoquendi'faja! ¡Sundarondeccu'qque Na'su Chiga a'i'ccu injancco'fa'cho cafonma o'tie japa tsa canqquema poiyi'cco shoquendi'faja!”

⁸ Tsa'caen susi poiyi'cco Josué mandaqquia'caen tson'fa. Nane tsa siete Chigama afasundeccuja Na'su Chiga manda'cho siete can'cho tsonjen'choma angapa jeñá jacan'fa. Tise'pama omboe tsu faesundeccuja Na'su Chiga a'i'ccu injancco'fa'cho cafonma opipa jacan'fa.

⁹ Nane jeñamba jacan'su Chigama afasundeccuma o'tie tsu oma'ccoma anga'su sundarondeccuja jacan'fa. Toya'caen injancco'fa'cho cafonma sepaccofae faesu coira'su sundarondeccuja jacan'fa. Anttembe'yi tsu tsonjen'choma jeña'fa.

¹⁰ Tsa'ma Josuéja tayo aindeccuma su cuintsu opitsse jacan'faye tise mandaya'ngae. Nane quian'me afambe'yi opitsseyi jacan'faya'cho. Tsa'ma maqui tise mandasi cuintsu quian'me fundo'faye.

Jericó canqque osui'cho

¹¹ Tsa'caen mandasi Na'su Chiga a'i'ccu injancco'fa'cho cafonma opipa canqque'ye shoquendipa toequi poiyi'cco tise'pa can'jeni japa ana'fa.

¹² Ccaqui a'ta sinte'yi Josué jangisi Chigama afasundeccuja ccase Na'su Chiga a'i'ccu injancco'fa'cho cafonma opi'fa.

^13-14 Tsa siete Chigama afasundeccu siete tsonjen'choma jeñamba Chiga a'i'ccu injancco'fa'cho cafonma o'tie ja'fa. Tsendeccuma o'tie tsu oma'ccoma anga'su sundarondeccu ja'fa. Toya'caen injancco'fa'cho cafonma sepaccofae tsu faesu coira'su sundarondeccu ja'fa. Segundo a'ta'qque tsa'caeñi can'cho tsonjen'choma jeña'jemba fae seyi canqquema shoquendipa toequi tise'pa can'jeni ja'fa. Seis a'tave tsu tsa'caen tson'fa.

¹⁵ Tsomba septimo a'tave a'tasi sinte'yi jangipa jajapa siete se canqquema shoquendi'fa. Nane tayoe jacanqquia'caen jacan'ma tsequija siete se canqquema shoquendi'fa.

¹⁶ Septimome shoquendi'fasi Josuéja aindeccuma qquen manda: “¡Fundo'faja! ¡Nane Na'su Chiga tsu va canqquema patsupa que'inga afe!”

¹⁷ Nane tayo tsu Josuéja tise'panga qquen conda: “Pa'cco canqque, toya'caen osha'cho tsani jincho'cho'qque Na'su Chigambe tsu. Tsa'cansi tsu pa'ccoma me'tsse sefaeña'cho Tise'be qquen canjaeñe. Tsa'ma jo'su Rahab, tsa tsa'oma afe'su, toya'caen poiyi'cco tise tsaoni canjensundeccuveyi tsu ccushaeña'cho. Nane tise'yi tsu ingi moesi a'tutsse jacansundeccuma fuitepa ccushaen'cho.

¹⁸ Tsa'ma tsa canqqueni jincho osha'choja Na'su Chigambesi tsama pporaenjama isupa tisuma dañosa'ne. Toya'caen majan tsa'caen tson'da qui Israel aindeccuma shacapave tsomba daño'faya.

¹⁹ Nane pa'cco cori, totoacori, toya'caen cu'a yoshavama ñoña'cho, faesu yoshavama ñoña'cho'qque Na'su Chigambesi tsu tise'be boña'jen'chonga boñamba an'biaña'cho.”

²⁰ Josué tsa'caen mandasi tsonjen'choma jeña'fasi aindeccu'qque poiyi'cco fundo'fa. Tsa'caen jeñamba quian'me fundo'fasi canqque ttuccuja osuipa amppi. Tsonsi poiyi'cco a'i tansintsse ansundepa ca'nimba canqquema patsu'fa.

²¹ Pa'cco tsa canqqueja Na'su Chigambe qquen in'jamba pa'cco tsani cansian jincho'choma matichi'ccu fittitti'fa. Nane tsandie, pushesu, chu'a, coenzandeccu, aiña'cho vaura, aiña'cho oveja toya'caen boroma'qque pa'ccoma fitti'tti sefaen'fa.

²² Tsonsi Josuéja tsa dos a'tutsse jacansundeccuma qquen manda: “Rahab tsaoni japa tisema, toya'caen pa'cco tise'bema'qque somboen'faja. Nane que'i Rahabnga ñoa'me su'chove suqquia'caen tsu tsoña'cho.”

²³ Tsa'caen mandasi a'tutsse jacan'su tsandiendeccuja Rahab tsaoni ca'nimba Rahab, tise yaya, tise mama, tise antian toya'caen pa'cco tise'bema somboemba israendeccu can'jen'ttimbe ccavofanga angapa coira'je'fa.

²⁴ Rahabpama somboemba pa'cco canqquema oque cati'fa. Nane pa'cco canqqueni osha'cho jincho'choma'qque oque cati'fa. Tsa'ma pa'cco cori, totoacori, cu'a yoshavama ñoña'cho toya'caen faesu yoshavama ñoña'choma'qque Na'su Chigambe boña'jen'chonga boñamba an'bian'fa.

²⁵ Josuéja jo'su Rahab, tise antiandeccu, toya'caen pa'cco tise'beveyi ccushaen. Nane Josué moe'cho a'tutsse Jericóni jacansundeccuma tise fuitepa a'tupa ccushaen'chone ccushaen'fasi tsu ja'ño a'tapan Rahab omba'su dushundeccuja israendeccui'ccu fae'ngae canse'fa.

²⁶ Tsequi a'ta Josuéja ñoa'me su'chove afapa qquen su: “Majan va Jericó canqquema ccase ccutsiancañe qquen ashaen'da ñoa'me Na'su Chiga chi'ga'choma tsu tsoña. Nane canqquiañe patuma ccuiñañe ashae'ninda tsu tise aisheve isu'cho dutssi'yeja paya. Toya'caen nanijimba canqque sombo'tti'su piccofin'dive ccutsian'jensi tsu tise dutssi'ye chu'aja paya.”

²⁷ Tsa'caen Na'su Chiga Josuéma fuitesi poiyi'cco tsa ande'su aindeccu tise tson'choma attepa asi'ttaen'fa.