Josué 5 - Cofán: Chiga Tevaen'jen

Gilgalni ttonoma chhiyitevaen'cho

¹ Na'su Chiga Jordánma samboensi israendeccu ise'choma pañamba chiga amppi'jeni canjensundeccu, tsa amorreo'su nasundeccu toya'caen mar otafa'su cananeo'su nasundeccu'qque ñoa'me dyopa tise'pa injama'choni chape'fa. Nane dyojo'fa tsu israendeccui'ccu iyiccoye.

² Tsequi a'ta tsu Na'suja Josuéma qquen manda: “Mandaja cuintsu ccoimpama chhichhi'ccove ñoñamba ccase israe'su tsandiendeccumbe ttonoma chhiyitevaen'faye.”

³ Tsa'caen susi Josué mandasi ccoimpa chhichhi'ccove ñoñamba tsa Aralot ccotta'cconi israe'su tsandiendeccumbe ttonoma chhiyitevaen'fa.

⁴ Nane Egiptone sombo'cho tsandie sundarondeccuja a'i menia tsu poiyi'cco pa'fa.

⁵ Poiyi'cco Egiptone sombo'cho tsandiendeccuja chhiyitevaen'cho tsu, “Israendeccu gi” qquen canjaeñe. Tsa'ma poiyi'cco a'i menia isu'choja toya me'in.

⁶ Nane israendeccu cuarenta canqque'fave a'i menia jacamba poiyi'cco Egiptone sombo'cho tsandiendeccu, sundarove ca'niñe nepi'chondeccuja, tayo pa'fa. Nane tise'pa tayopi'su coenzandeccunga Na'su Chigaja andema afeye su, chocho toya'caen tuño cuñajun'cho'qque shacambitssia andema. Tsa'ma tsendeccu ñotsse pañambisi Na'suja tsendeccuma ñoa'me su'choi'ccu su cuintsu tise afeye su'cho andema attembe'yi pa'faye.

⁷ Tsa'caen supa tise'pa dutssiyendeccunga afeye susi Josuéja tise'pa dushundeccuma boñamba manda cuintsu tsendeccumbe ttonoma chhiyitevaen'faye. Nane tsendeccuja a'i menia isu'chopa toya chhiyitevaembindeqquia tsu.

⁸ Poiyi'cco tsa'caen chhiyitevaengepa tsu tise'pa carpani can'jen'fa ccushaya'ngae.

⁹ Tsonsi Na'su Chigaja Josuéma su: “Va chhiyitevaen'choi'ccu gi que'i Egiptoni can'jemba ansange'choma joqquitssian.” Tsa'cansi tsu va'ttija Gilgal qquen inisecho'cho.

¹⁰ Ccovu'su catorce a'ta'su sime toya Gilgalni tsa Jericó sinjunccuni can'jemba israendeccuja Chiga fi'ttimbe panshan'choma panshaen'fa.

¹¹ Tsequi tsu cupana'cco me'choa pan toya'caen trigoma matssan'choma an'fa. Tsa'ma tsequi a'ta pasasi ccaqui tsu Jericó andeni jincho anqque'suma an'fa.

¹² Tsa'caen an'fasi ccaqui a'ta sefaccone amppi'je'cho anqque'su manájan pasa. Ti'tsse manájan amppimbi. Tsa'ma tsa canqque'fa tsu cananeo ande'su anqque'suma amba canse'fa.

Chigambe sundaroma cachuicco'cho

¹³ Tsa'caen Jericó canqque pporotsse can'jemba Josuéja asuccocamba a'ima atte, sundaro matichima isu'cho tise isevetsse ccutsu'choma. Attepa tisenga catsepa qquen iñajampaña: —¿Que'qque ti qui ingi'su? ¿Tsambi'ta ingima iyiccayesundeccu'su?

¹⁴ A'ija su: —Ni que'i'su ni que'ima iyiccayesundeccu'sumbi gi. Tsa'ma Na'su Chigambe sundaro na'su gi ja'ño ji. Tsa'caen susi Josuéja andenga puntssamba tisema iñajampaña: —¿Jongoe qquen tsu Na'suja ña tisema shondo'sunga su?

¹⁵ Tsa'caen iñajampañasi Na'su Chigambe sundaro na'suja su: —¡Que sapatoma shichhaja! Va'tti que ccutsu'ttija Chiga ande tsu. Tsa'caen susi Josuéja tsa'caen tson.