Josué 4 - Cofán: Chiga Tevaen'jen

Patuve Jordán na'ema somboen'cho

¹ Poiyi'cco a'i tsa'caen Jordánma ise'fasi Na'su Chigaja Josuéma su:

² “Tsa doce tsandieve ttu'sechondeccu, poi doce israe'su aindeccu'suma fae'cco, fae'cco

³ mandaja cuintsu Jordán na'en enttingeni japa Chigama afasundeccu ccutsu'ttima doce patuve isu'faye. Nane poiyi'cco tsu fae patuve isupa opipa jonifani angapa ccuiña'faya'cho que'i mani ja'ño cose anaña'ttinga.”

⁴ Tsa'caen susi Josuéja tise attufaen'cho dose israe'su aindeccu'su tsandiendeccuma ttu'sepa

⁵ su: “Jordán enttingeni japa Chiga, que'i Na'su, a'i'ccu injancco'fa'cho cafonga catse'faja. Poiyi'cco tsu fae patuve isupa opipa iya'cho tsai'ccu doce israe'su aindeccuve canjaeñe.

⁶ Tsa patu tsu que'i jai'ngae canjaeña'cho. Nane que'i dushundeccu: ‘¿Jongoesune tsu va patuja canjaen?’ qquen su'ninda

⁷ tise'panga conda'faja ma'caen Na'su Chiga a'i'ccu injancco'fa'cho cafon Jordán na'ema isesi na'en ai'je'cho pasa'choma. Tsa Jordán na'ema ise'je'ni tsu na'enjan ai'jembi. Va patu tsu tsangae Israel aindeccuma tise'pa va'ttinga ma'caen da'chove injaen'jeña.”

⁸ Josué tsa'caen susi israendeccuja tsa'caen tson'fa. Nane Na'su Josuénga condaqquia'caen Jordán enttingema doce patuve isu'choma tsa doce israe'su aindeccu tise'pa can'jeñani opipa anga'fa.

⁹ Toya'caen Josuéja faesu doce patuve isupa tsa Chiga a'i'ccu injancco'fa'cho cafonma anga'su Chigama afasundeccu ccutsu'ttinga boñamba ccutsutsian. Ja'ño a'tapan tsu tse'tti ccutsu'fa.

¹⁰ Tsa'caen tson'jen'fasi Chiga a'i'ccu injancco'fa'cho cafonma anga'su Chigama afasundeccuja toya Jordán enttingeniñi ccutsu'fa. Nane pa'cco Na'su Chiga Josuénga manda'choma aindeccu naniña'ngae tsu tsa'caen enttingeni ccutsu'fa. Nane pa'cco Moisés Josuénga condaqquia'caen tsu tson'fa. Tsa'cansi aindeccuja junde poiyi'cco isepa

¹¹ camboen'jen'fa'ni Chigama afasundeccuja Na'su Chiga a'i'ccu injancco'fa'cho cafoin'ccu ise'fa.

¹² Toya'caen Na'su Chigambe israendeccu'su sundarondeccuja, o'tie tsu Rubén aindeccu, Gad aindeccu toya'caen enttinge Manasés aindeccu'su tsandiendeccu'qque isepa matichi, oma'ccoma'qque Moisés mandaqquia'caen isian'fa Jericó'su sinjunccuni.

¹³ Cuarenta mil tsandiendeccu tsu tsa'caen ñoñamba iyiccoye ise'fa.

¹⁴ Tsequi a'ta tsu Na'suja Josuéma ti'tsse'tssia've tson cuintsu Moisés cansuite in'janqquia'caen tisema'qque ñotsse in'jamba paña'faye.

¹⁵ Tsa'caen tsomba Na'su Chigaja Josuéma su:

¹⁶ “Ña a'i'ccu injancco'fa'cho cafonma anga'su Chigama afasundeccuma mandaja cuintsu Jordán na'en'ñe sombo'faye.”

¹⁷ Tsa'caen susi Josuéja manda: “Jordán na'en'ñe sombo'faja.”

¹⁸ Tsa'caen susi Chigama afasundeccu san'anga sombosi tse'faei'ccuyi Jordán na'en'su tsa'ccuja toequi bo'iave jipa tayoa'caeñi da.

¹⁹ Nane primer ccovu decimo a'ta tsu israendeccuja Jordán na'ema isepa Gilgalni ansundepa can'jen'fa. Gilgalta tsu Jericónima chiga sombo'jefani.

²⁰ Tse'ttinga tsu Josuéja tsa doce patuve Jordán na'ema somboen'choma ccutsutsian.

²¹ Ccutsiamba israendeccunga su: “Jai'ngae que'i omba'su dushundeccu tise'pa yayandeccuma ‘¿Jongoesune tsu va patuja canjaen'fa?’ qquen iñajampaña'fa'ninda

²² tsendeccunga su'faja: ‘Israendeccuja san'añe Jordán na'ema ise'fa.

²³ Na'su que'i Chigaja Jordánma samboemba ronda'je cuintsu poiyi'cco ingi ise'faye. Nane tise tayoe Cu'a marma samboensi ingi tayopisundeccu iseqquia'caen tsu Jordánma'qque samboen.

²⁴ Tsa'caen tsu tson cuintsu poi ande'su aindeccu atesu'faye Na'su Chiga osha'choma oshacho'chove. Toya'caen tsu tsa'caen tson cuintsu ingija tsangae dyoe'sui'ccu Na'su Chigama injan'jeñe.’ ”