Josué 3 - Cofán: Chiga Tevaen'jen

Israendeccu Jordán na'ema ise'cho

¹ Ccaqui a'ta sinte'yi Josué, poiyi'cco israendeccui'ccu Sitim canqque'ye sombopa Jordán naeni ja'fa. Tseni can'jemba ñoña'fa tisupa iseya'chove.

² Tres a'ta can'jemba nasundeccuja poiyi'cco a'i can'jen'cho'ye japa

³ aindeccuma qquen manda'fa: “Na'su Chiga a'i'ccu injancco'fa'cho cafonma, toya'caen tsama anga'su Chigama afa'su levítasundeccuma atte'ta que'i'qque ñoñamba sombopa fae'ngae omboemba sepaccoe ja'faya'cho.

⁴ Tsa'caen tsomba qui atesu'faya maningae jaya'chove. Nane atesu'fambi qui que'i ja'ño jaya'chove. Tsa'ma panshaen catsembe'yi fae kilometroa'caen anttepa omboemba sepaccoe jayi'faja.”

⁵ Tsomba Josuéja aindeccuma su: “Tisupama ñoña'faja Chiganga ccutsuqquia'cantsse. Nane tu'i tsu Na'su Chigaja que'i'ccu ccaningae tsoña.”

⁶ Toya'caen tsu Chigama afasundeccuma qquen manda: “Chiga a'i'ccu injancco'fa'cho cafonma opipa o'tie japa na'ema ise'faja.” Tsa'caen susi tsu opipa a'ima o'tie ja'fa.

⁷ Tsonsi Na'suja Josuéma su: “Ja'ño gi quema ti'tsse'tssia've tsoña cuintsu poiyi'cco a'i in'jan'faye ma'caen ña Moisésma fuiteqquia'caen quema'qque fuite'choma.

⁸ Ña a'i'ccu injancco'fa'cho cafonma anga'su Chigama afasundeccuma condaja cuintsu Jordán na'en otafanga nepi'ta cca'ya ccutsu'faye na'enga.”

⁹ Tsonsi Josuéja israendeccunga su: “Vani catsepa paña'faja Na'su que'i Chiga su'choma.

¹⁰ Tise canjen'choma attepa in'jan'faja ñoa'me cansian Chiga ingi'ccu can'jemba ingima o'tie cananeondeccu, hititandeccu, heveondeccu, ferezeondeccu, gergeseondeccu, amorreondeccu toya'caen jebuseondeccuma'qque metsse tteya mañaña'choma.

¹¹ ¡Que can'faja! Poi ande'su Na'su a'i'ccu injancco'fa'cho cafon tsu que'ima o'tie Jordán na'ema iseye jaya.

¹² Tsa'cansi ttu'se'faja poi doce'su israe'su aindeccu'suma fae'cco, fae'ccove cuintsu doce tsandieve nepiye.

¹³ Nane Chigama afa'su, poi ande'su Na'su a'i'ccu injancco'fa'cho cafonma angasundeccu Jordán na'enga tsui ccutsu'ninda tsu na'en ai'je'choja pasapa tse'ttinga bo ccutsuya.”

¹⁴ Tsa'caen susi aindeccuja ñoñamba sombo'fa Jordánma iseye. Chigama afasundeccu o'tie ja'fa Chiga a'i'ccu injancco'fa'cho cafoin'ccu.

¹⁵ Nane tsequi tsu Jordán na'en ñoa'me bo'iave ji, trigoma taite nepisi. Tsa'ma Chiga a'i'ccu injancco'fa'cho cafonma anga'su Chigama afasundeccu Jordáni nepipa otafanga cca'ya ccutsusi

¹⁶ na'en ai'je'choja pasa. Nane biani tsu tsa'caen bo ccutsu Adam canqque jini. Tsa Adam tsu Saretán pporotsse. Tsa'caen bo ccutsusi a'ningae Pa'cho marningae ai'je'cho'qque samba. Tsa'caen dasi poiyi'cco a'i tsui ise'fa Jericó isevetsse.

¹⁷ Na'su Chiga a'i'ccu injancco'fa'cho cafonma anga'su Chigama afasundeccuja Jordán na'en enttingeni ccutsu'fa san'an'ni. Tsa'caen ccutsu'fasi poi israendeccu tise'pama panshamba ccavofanga ise'fa. Nane ñoa'me santsse sambasi tsu tsa'caen ise'fa.