Josué 23 - Cofán: Chiga Tevaen'jen

Josué aindeccunga condase'cho

¹ Na'su Chiga fuitesi israendeccu poiyi'cco tise'pa iyiccosundeccuma patsupa bo'tssingae opatsse can'jensi Josuéja coenza ccashe'yeve da.

² Tsa'caen dapa manda cuintsu poi israendeccu, tise'pa coenzandeccu, nasundeccu, ñoquiansundeccu, mandasundeccuma'qque ttu'sepa boña'faye. Bo'fasi tsu qquen su: “Ja'ño gi coenza ccashe'yeve dapa quimbi.

³ Que'ija atte'fa pa'cco Na'su Chiga ma'caen que'i'ccu iyiccosundeccunga tson'choma. Nane ñoa'me tsu tiseja que'ima in'jamba que'ine iyicco'su.

⁴ Andema attufaeñe gana qquen tsomba gi attufaen poi aindeccu tisunaccu tisunaccu isu'faye. Tsa'ma jo'su tayo patsuye'cho andeveyi attufaembipa toya patsuyembi'choama'qque gi attufaen. Nane chiga sombo'jefa'su Jordán na'eñe chiga amppi'jefa'su rande mar Mediterráneopi attufaeñe gi manda.

⁵ Nane Na'su, que'i Chiga, ñoa'me su'choi'ccu tise que'inga tayoe condaqquia'caen tsa andeni can'jen'cho aindeccuma joqquitssiansi qui que'ija tsa andema isu'faya.

⁶ “Dyombi'tsse ccutsupa anttembe'yi pa'cco va Moisés manda'choma nanitsse tson'faja. Ni fae su'choveyi'qque aqque'pa'fajama.

⁷ Quei'ccu toya can'jen'cho va ande'su israembindeqquiai'ccu fae'ngae tson'fajama. Tise'pa chigandeccuma pañamba iñajan'fajama. Nane tsesu chigandeccu iniseja afa'ma'sia tsu. Tsai'ccu que'i su'choja tansintsse su'cho qquen afa'fajama.

⁸ Nane que'i ja'ñopan tsonqquia'caen anttembe'yi Na'su que'i Chigama in'jan'faja.

⁹ Que'i iyicco'je'fasi Na'su Chigaja rande canqque'su quinsetssia aindeccuma a'tatsse tayo patsu. Nane ja'ño a'ta majan aindeccuyi'qque que'ima se'piye osha'fambi.

¹⁰ Na'su Chiga iyiccopa tise ñoa'me su'choi'ccu que'inga tayo condaqquia'caen que'ima fuitesi fae'ccoyi que'i'suja mil a'ima dyoña mañañe oshaya.

¹¹ Tise tsa'caen tsonsi, injan'jeñi tisu injama'choma ñotsse ñoñamba Na'su que'i Chigama ñotsse in'jan'faja.

^12-13 Nane in'jan gi que'i va su'choma in'jan'faye: Chigama catipa va quei'ccu toya can'jen'cho aindeccui'ccu fae'ngae tsomba, tise'pa'su pushesundeccuma pushe'fa'ninda tsu Na'su, que'i Chigaja, tsendeccuma manda mañaña'bi. Tsa'ma tsendeccui'ccu tsu que'ima vanae'jeña. Nane va'cho'vai'ccu avuma indiqquia'caen, quendecco'choi'ccu aña'choma indiqquia'caen, tsu tsendeqqui'ccu que'ima qqueñaña. Mappi'je'choi'ccu ma'ppiqquia'caen que'ima noñangiamba toya'caen nojan tso'fema iñaccaenqquia'caen que'ima dañoña cuintsu tsequi a'ta ni fae a'i que'i'suja va Na'su que'i Chiga que'inga afe'cho ñotssia andeni can'jembe cañe.

¹⁴ “Ña, Josué gi ja'ño paye tson'jen. Tsa'ma toyi'te gi in'jan cuintsu que'i in'jan'faye pa'cco injama'choi'ccu toya'caen pa'cco canse'pai'ccu ma'caen Na'su Chiga pa'cco tise ñoa'me su'choi'ccu ñotsse tsoñe su'choma tayo tson'chove. Ni fae'ccoveyi'qque tsu shacambi.

^15-16 Tsa'ma ñotsse in'jan'faja: Na'suja que'ima ñotsse tsonqquia'caen que'ima ñoa'me egae tsoñe osha. Nane que'i Na'sui'ccu injancco'fa'choma pañambipa ñotsse tsombi'ninda tise tayoe ñoa'me su'choi'ccu egae tsoña'chove su'choi'ccu tsu tsoña. Que'i tsa'caen tisema pañambipa faesu chigandeccuma'qque ccarupa iñajan'ninda tsu Na'suja que'ima iyicca'yeya. Iyicca'yepa osha'choi'ccu que'ima vanae'jemba ñoa'me que'ima sefaeña cuintsu ni fae'cco que'iyi va tise afe'cho ñotssia andeni can'jembe cañe. Nane ñoa'me metsse qui sefa'faya.”