Josué 2 - Cofán: Chiga Tevaen'jen

Rahab jacansundeccuma fuite'cho

¹ Tsa'caen conda nanimba Josuéja Sitim canqqueni can'jemba a'tutsse moe dos a'i cuintsu a'tutsse japa atte'faye. Moe'jemba qquen su: “Japa andema camba Jericó canqquema'qque ñotsse can'faja.” Tsa'caen mandasi Jericóni japa tsa'oma afe'su Rahab tsaoni ca'nimba can'jen'fa.

² Tsonsi cca'indeccuja Jericó'su ande na'sunga qquen conda: —¡Que canjan! Majan israe'su a'i a'tutsse andema atteye ja'ño cose jipa tseni can'jen'fa.

³ Tsa'caen susi Jericó na'suja Rahabma mandapa su: —Queni jipa que tsaoni canjensundeccuma somboenjan. Nane tsendeccuja a'tutsse va andema cañe jacansundeccu tsu.

⁴ Tsa'ma pushesuja tsa dos a'ima tayo a'tupa na'su manda'choma pañamba su: —Ju, tsa a'i ñani ji'fa. Tsa'ma atesumbi gi tise'pa mane ji'chove.

⁵ Chiga amppiji'ni toya canqque sombo'ttima piccombi'te tsu sombopa ja'fa. Atesumbi gi tise'pa maningae ja'chove. Tsa'ma jundeyi tise'pama omboemba ja'ta qui utunga indi'faya.

⁶ (Tsa'ma tsa'caen supa tayo tsu tsandiendeccuma tsao'cco omba'su ppappacconga ansundiamba a'tu tseni linome somboenqque'su shoshovima sanjan'jen'chombe tsosiccunga.)

⁷ Tsa'caen susi na'sumbe sundarondeccuja a'tutsse jacansundeccuve tta'ttaye ja'fa Jordán na'ema cca'yapa ise'je'cho tsaiquini. (Sundarondeccu canqque'ye tta'ttaye sombosi tsu canqque sombo'ttima picco'fa.)

⁸ A'tutsse jacansundeccu toya anambi'te pushesuja tsao'cco omba'su ppappacconga ansundepa tise'pama su:

⁹ —In'jan gi Na'su Chiga tsu va andema que'inga afe. Nane poiyi'cco va ande'su aindeccu gi que'ima dyojo'fa. Nane paye dyojopa gi ñoa'me dyopa ttun'dundu'je'fa.

¹⁰ Paña'fa gi ma'caen que'i Egipto'ye sombopa jayisi Chigaja Cu'a marma samboen cuintsu que'i iseye. Toya'caen Jordán na'en jonifani'su Sehón, Ogma'qque, tsa amorreo'su nasundeccuma patsupa que'i sefaen'choma pañamba gi ti'tsse dyo'fa.

¹¹ Nane ingi injama'choma chapiansi gi osha'fambi. Na'su que'i Chiga tsu sefacconi can'jemba ñoa'me va andenga'qque manda.

¹² Tsa'cansi chigáne Na'su Chiga caña'jen'ni ñanga tansintsse su'faja ña que'ima ñotsse tsonqquia'caen ccane'qque que'ija ingima ñotsse tsomba ña antiandeccuma ccushaeña'chove. ¡Tansintsse canjaen'chove ñanga canjaen'faja,

¹³ que'i ña yaya, ña mama, ña antiandeccu, tise'pa tsa'o'suma'qque ccushaeña'chove!

¹⁴ Tsonsi a'tutsse jacansundeccuja su'fa: —Ingima ccushaen'chone gi ccane'qque que'ima ccushaen'faya. Que'i ingine a'tiemba condambi'choa'ne gi que'ima ccushaemba ñotsse tson'faya, Na'su Chiga va andema inginga afesi.

¹⁵ Tsa'caen tansintsse su'fasi pushesuja tise tsa'o'su ventana'ñe o'fama tandan dusiamba canqquema ttu'cho ccavofanga tise'pama andiamaña. Nane tise tsa'ota tsu canqquema ttu'choi'ccu fae'ngatssi.

¹⁶ Tsa'caen moe'jemba qquen su: —Ja'faja ccotta'cconga que'ive ttattasundeccu atte'fasa'ne. Tseni tres a'tave a'tupa can'jen'faja tise'pa anttepa toequi canqqueni jiya'ngae. Tise'pa jisi qui ccushapa toequi tisu andeni ja'faya.

^17-18 Toya'caen tsandiendeccu tsu tisema qquen su'fa: —Que ingima andian'je'cho ventananga va cu'a o'fama tandan'faya'cho ingi va andema patsuye jipa atteya'chove. Toya'caen que yaya, que mama, que antiandeccu'qque tsu va tsaoni bo'faya'cho. Tsa'caen tsombian'da ingi que'ima ccushaeñe tansintsse su'choja ñoa'me bareya'bi tsu.

¹⁹ Nane majan que tsa'o'ye sombopa canqque tsaiqui'ye jacansi tisema majan ingi'su fi'tti'nija tisuyi tsu shacapa. Ingija shacapambi. Tsa'ma majan que'i'ccu tsaoni can'jen'choma majan ingi'su fi'tti'ninda gi shacapa'fa.

²⁰ Toya'caen que ingi jasi cca'indeccunga ingine conda'ninda gi ingi tansintsse tsoñe su'choma tson'faya'bi.

²¹ —Ñotssi tsu, que suqquia'caen.–qquen tsu pushesuja su. Tsa'caen supa tise'pama andianmoemba tsa cu'a o'fama tandan dusian ventananga.

²² A'tutsse sombopa ccotta'cconga japa tres a'tave a'tu'fa. Sundarondeccuja pa'cco tsaiqui'ye tta'tta'ma attembe'yi shandapa toequi Jericóni ji'fa.

²³ Tsonsi a'tutsse jacansundeccuja toequi shandaye ashaen'fa. Ccotta'cco'ye andepa na'ema cca'ya isepa Josuéni ja'fa. Japa Josuénga pa'cco tise'pa ma'caen da'choma condase'fa.

²⁴ Qquen tsu su'fa: “Ñoa'me tsu Na'suja pa'cco andema inginga afe. Poiyi'cco a'i tsu ingima dyopa canse'fa.”