Josué 1 - Cofán: Chiga Tevaen'jen

Chiga Josuéma ttu'se'cho

¹ Na'su Chigama shondo'su Moisés pasi Na'suja Nun dutssi'ye Josué, tsa Moisésma fuite'sui'ccu afapa qquen su:

² “Ñama shondo'su Moisésja tayo pa. Tsa'cansi ja'ñojan que qui poiyi'cco va israendeccui'ccu ñoñamba Jordán na'ema isepa ña que'inga afeya'cho andenga ca'niña'cho.

³ Nane ña Moisésnga suqquia'caen gi pa'cco mani que'i tsu'ttei'ccu tsui'je'cho andema que'inga afeya.

⁴ Que'i andeja a'i menia'ñe ashaemba já Líbano toya'caen tsa rande Eufrates na'empi ne'pitssiya. Nane pa'cco hitita'su ande mar randepi gi que'inga afeya.

⁵ Pa'cco que cansuite gi quema quiñaeña faesu quema joqquitssiansa'ne. Ña Moisési'ccu can'jenqquia'caen gi quema'qque quiñaeña. Minguite'qque gi quema tisuveyi catiya'bi.

⁶ Dyombi'tsse quinse'tsse ccutsuja. Tayo gi va aindeccumbe tayopisundeccunga conda va andema afeya'chove. Queja tsama attufaen'su.

⁷ Dyombi'tsse quinse'tsse ccutsuja. Ñotsse in'janjan pa'cco ña Moisésnga su'cho manda'choma pañamba tsoñe. Ni ma'ttiveyi'qque aqque'pambitsse tansintsse tsonjan ñotsse naningeye.

⁸ Anttejama va Chiga manda'choma camba afaye. A'ta, cose'qque tsane in'janjan pa'cco tsanga tevaenqquia'caen tsomba canseye. Tsa'caen tsomba qui ñotsse nanimba ñotsse an'biaña.

⁹ Ña gi manda: Dyombi'tsse quinse'tsse ccutsuja. Dyojama ni ñoquimbijama. Nane ña, que Na'su gi mani jacan'ni'qque fae'ngae quei'ccu jacaña.”

Josué andema patsuye ñoña'jen'cho

¹⁰ Chiga tsa'caen susi Josuéja israendeccu'su nasundeccuma qquen manda:

¹¹ “Japa poiyi'cco a'inga conda'faja cuintsu osha'chove ñoña'faye. Tres a'tangae gi Jordán na'ema ise'faya'cho Na'su ingi Chiga inginga afeye su'cho andema itsapa an'biañe. Ingi'beya tsu.”

¹² Tsa'ma Josuéja Rubén aindeccu, toya'caen Gad aindeccu, enttinge Manasés aindeccunga'qque afapa qquen su:

¹³ —In'jan'faja Na'suma shondo'su Moisés que'inga qquen su'choma: ‘¡Na'su que'i Chiga tsu que'i ño'faya'chove va andema que'inga afe!’

¹⁴ Tsa'cansi tsu Moisés va Jordán na'ema chiga sombo'jefa'su andema que'inga afe'tti que'i pushendeccu, que'i dushundeccu, toya'caen que'i aiña'cho'qque can'jen'faya. Tsa'ma poiyi'cco tsandiendeccu majan geraeñe atesu'chondeccuta tsu tise'pa matichi, oma'ccoma isupa geraeñe ja'faya'cho. Nane que'i antian israendeccui'ccu va Jordán na'ema isepa fuite'faya'cho

¹⁵ tsa andema patsuya'ngae. Tsa'caen tsu tsoña'cho Na'su Chiga afesi tise'pa ño'faya'ngae. Nane que'inga afeqquia'caen afesi tise'pa'qque tsa Chiga afe'cho andembe nasundeccuve da'faya'ngae tsu fuite'faya'cho. Tsa'ma tsa'caen afesi qui toequi shandaye osha'fa Chigama shondo'su Moisés que'inga afe'cho Jordán na'ema chiga sombo'jefa'su andema an'biamba canseye.

¹⁶ Tsonsi tsu Josuénga su'fa: —Que mandaqquia'caen gi tson'faya. Mani que moe'ninda gi tseni ja'faya.

¹⁷ Nane Moisésma pañaqquia'caen gi quema'qque paña'faya. Tsa'ma Na'su que'i Chigaja Moisésma angacanqquia'caen tsu quema'qque angacaña'cho.

¹⁸ Majan quema pañañe chi'ga'ninda tsu tsamajan fi'ttiya'cho. Nane dyombi'tsse quinse'tsse ccutsuja.