Jonás 4 - Cofán: Chiga Tevaen'jen

Chiga Nínive aindeccuma ccushaen

¹ Chiga tsa'caen tsonsi Jonásja ñoa'me chi'gapa iyicca'ye.

² Tsa'camba Na'suma iñajamba qquen su: —Na'su que canjan. Ña toya tisu andeni can'jen'ni que su'nijan tayo gi in'jan que qquen tsoña'choma. Tsa'camba gi junde Tarsisni ccuyapa jaye in'jan. Nane in'jan gi que qui Chiga ño'an, a'ima mendeye'su, junde iyicca'ye'ma'sia qui. Nane queja ñoa'me a'ima vanaeñe supa junde ñoquipa tise'pama antte.

³ Na'su tsa'cansi gi quema iñajan junde ñama fi'ttija. Canse'choma bove ñotssi tsu junde ña paye.

⁴ Tsa'ma Na'suja afapa qquen su: —¿Tsa'caen iyicca'yeye'ta ti ñotssi?

⁵ Tsomba Jonásja canqque'ye sombopa tsenima chiga sombo'jefanga japa ccaquejema dyaiñasiamba tsambe tumbianccuni can dyai mingae Nínive canqque da'choma atteye.

⁶ Tsonsi Na'su Chigaja in'jan cuintsu quini'si Jonás dyai'chombe ombanga sho'yopa tumbianccuve dapa ti'tsse tisema tumbianqquiañe. Jonásja ñoa'me avujatssi tsu tsa quini'si tumbianccuni dyaipa.

⁷ Ccaqui a'ta sinte Chiga in'jansi toin quini'singa ca'nimba ansi quini'sija samba.

⁸ Toya'caen coejechiga sombosi Chigaja in'jan cuintsu chiga sombo'jene ju'rutssia fingian jiye. Tsonsi coe'je depa tumbianccuve me'i'onsi tansintsse tise tsovenga desi Jonásja sian'me papa ñoa'me paye in'jan. Tsomba tsu su: —Canse'choma bove ñotssi tsu junde ña paye.

⁹ Tsa'ma Chigaja su: —Quini'si sambasi ¿tsa'caen iyicca'ye'yeta ti ñotssi? Tsonsi Jonásja su: —A'tatsse qui su ñane'jan ñotssiqquia'can tsu. Ñoa'me iyicca'ye'choi'ccu gi paye in'jan.

¹⁰ Tsa'ma Na'su Chigaja qquen su: —Queja quini'sima jombi qui; ni shoyoembi qui. Fae cose'yi sho'yopa tsu faesu coseja pa. Tsa'ma tisema in'jamba qui mende'ye.

¹¹ Tsa'caen gi ña'qque Nínive rande canqque'su aindeccuma mendeyeya'cho. Nane tsa ciento veinte mil a'i ñoa'me'qque du'shua'caen majan ega, majan ñotssiave atesumbindeqquiama. Toya'caen tseni tsu tsain'bio aiña'cho sheque'fa. Tsendeccuma'qque gi mendeyeya'cho.