Jonás 3 - Cofán: Chiga Tevaen'jen

Nínive'su aindeccu ñombi'ye'cho

¹ Na'su Chigaja ccase Jonásnga afapa qquen su:

² “Ja'ño ña quenga condasi japa rande Nínive canqquenga tsama condaseja.”

^3-4 Tsonsi Jonásja Na'su Chiga mandaqquia'caen Níniveni ja. Nínive tsu ñoa'me rande canqque. Tres a'tave jacamba tsu pa'cco canqquema itoyeya'cho. Jonásja tsa canqquenga ca'nimba fae a'ta cose'tsse jacamba quian'me fundopa qquen condase: “¡Cuarenta a'ta nepisi tsu Chigaja Nínive canqquema osefaeña!”

⁵ Tsa'caen susi Nínive'su a'ija poiyi'cco ambe'yi asettuye ashaemba poiyi'cco coenza, du'shu'qque Chigave in'jamba tsincco'cco'je'cco'a ondiccu'jema ondiccu'fa tisupa ñombi'ye'choma canjaeñe.

⁶ Toya'caen Nínive'su na'su'qque tsama pañamba tise dyaipa'cho'ye jangipa na'su ondiccu'jema oshichhapa tsincco'cco'je'ccoa'a ondiccu'jema ondiccupa andenga dyai.

⁷ Tsomba omboe na'suja tisema shondosundeccui'ccu ñoñamba poiyi'cco tsa canqque'su aindeccunga qquen su'choma moe: “Majañi'qque jongoesuma an'fajama, ni que'i aiña'cho vaura, ovejanga'qque o'fiamba cui'ña'fajama.

⁸ Tsa'ma poiyi'cco a'i tsincco'cco'je'cco'a ondiccu'jema ondiccu'faja tisu ñombi'ye'choma canjeñe. Tsomba pa'cco que'i tsain'fai'ccu Chigama iñajan'faja. Toya'caen tsu poiyi'cco tisu ja'ñopan egae tsincon'choma anttepa ñotsse can'jeña'cho.

⁹ Isha tsu tsa'caen tson'ninda Chigaja tisu iyicca'ye'choma vuiquipa ingima fi'ttimbe antteya.”

¹⁰ Chigaja Nínive'su a'i egae tson'choma anttepa ñotsse canseye in'jan'choma atesupa ñoquipa tise'pama sefaen catiye su'choma antte.