Jonás 1 - Cofán: Chiga Tevaen'jen

Jonás Chigama paña'ma ccuyin ja

¹ Na'su Chigaja Jonás Amitai dutssi'yenga qquen su:

² “Japa rande Nínive canqquenga condaseja pa'cco tsa canqquema ña sefaeña'choma. Nane tayo gi paña tise'pa egae tsincon'choma.”

³ Tsa'caen susi Jonásja Na'suma pañañe in'jambipa Jopeni ja tsene Na'suma ccuyacañe. Tseni japa atte tayo barco Tarsisni jaye tson'jen'choma. Attepa pasajema afepoemba barconga otse Tarsisni jaye.

⁴ Tsa'caen Jonás jayisi Na'su Chigaja fingiama moe cuintsu quian'me fingiañe pa'cco mar enttinge'ye. Tsonsi fingian jipa dyo'tsse shave'pama jangian pa'cco barcoma do'joqque'sutsse.

⁵ Tsa'caen dasi barcoma angasundeccuja ñoa'me dyopa poiyi'cco tisupa chigama iñajan'fa. Tsa'ma shave'paja pasambi'si dyopa barco andu'choma isupa marnga ttova'ccoen moe'fa cuintsu barco favaye. Tsa'caen da'je'ni atesumbe Jonásja barco tsosiccu'su ttuccuni pa'ye'tsse ana'jen.

⁶ Tsonsi na'su capitánjan Jonás ana'jen'choma in'jamba japa qquen su: —¿Mi'nge'e qui ana'jen anafasi? ¡Jangipa que Chigama iñajanjan cuintsu ingima in'janda ccushaeñe!

⁷ Tsa'caen tson'jen'ni barcoma angasundeccuja tisupanaccu qquen qquejecco'fa: —Jinge'su co'fepa atesuye majande qquen dyo'oe ingi vanaña'chove shacaen'su. Tsa'caen tson'fasi tsu Jonás shacapave atteye.

⁸ Tsonsi tsu tisema iñajampaña'fa: —¿Jongoesian tsomba qui ingima qquen vanae'jen? ¿Jongoesu chavaenqque'suma qui angaji? ¿Mane qui jiña? ¿Mani tsu que andeja? ¿Jongoesu a'i qui?

⁹ Qquen iñajampaña'fasi Jonásja conda: —Ña gi hebreo'su a'i. In'jan gi Na'su Chiga Quitsama; tsa tsu sefacconi can'jemba ande marve'qque agattoen'su.

^10-11 Qquen supa Jonásja tisu Na'su Chigama ccuyapa jayi'choma conda. Tsa'caen tise su'je'ni barcoma angasundeccuja ti'tsse shave'pa jangi'choma atte'fa. Tsonsi ñoa'me dyopa ccase iñajampaña'fa: —¿Jongoesie qui tsa'caenjan tsincon? ¿Ma'caen gi quema tson'faya cuintsu shave'pa pasaye?

¹² Tsonsi Jonásja su: —Ñama marnga ttova moe'fasi tsu shave'paja pasaya. In'jan gi ña gi ñoa'me shacaen'su jiñasi tsu qquenjan da.

¹³ Tsa'ma barcoma angasundeccuja ccattufa qquen quian'me chhochho'je'fa. Chho'chho'ma osha'fambi ccattufaye shave'pa fingian'qque ti'tsse quian'me ji'jesi.

¹⁴ Tsa'caen pasambi'si dyopa Na'su Chigama qquen su'fa: “Na'su, va a'imbe shacai'ccu ingima fi'ttijama, ni inginga shacama anttejama va a'ima fi'tti'chone tise egae tsombi'ninda. Nane Na'su, que in'jamba tson'cho tsu.”

¹⁵ Tsa'caen supa Jonásma indipa marnga ttova moe'fa. Tise'pa tsa'caen ttova moesi pa'cco shave'pa pasa.

¹⁶ Tsonsi barcoma angasundeccuja dyoe'sui'ccu Na'su Chigama ñotsse in'jamba tisenga afe'choma oque oraemba afepa conda'fa jai'ngae tisupa ñotsse tsoña'chone.

¹⁷ Tsa'caen Jonásma marnga ttova moesi Na'suja rande ccuivoaca'ma moe cuintsu Jonásma cundeye. Tsa'caen Chiga moesi ccuivoja jipa Jonásma cunde. Cundesi ccuivo an'mani ppi tres a'ta, tres coseve.