Joel 2 - Cofán: Chiga Tevaen'jen

Na'su a'ima ttu'se'cho

¹² Na'suta tsu tansintsse conda: “Ja'ño tisu injama'choma ñoñamba toequi ñani ji'faja. ¡Ambe'yi ina'jemba ñombi'yepa fundo'faja!”

¹³ Tsa'cansi tsu toequi Na'su que'i Chiganga shanda'faya'cho. ¡Tisu sarupama chittambe'yi que'i injama'choma chittaqquia'caen cambiaña'cho! Nane Na'suja junde iyicca'yembipa que'ima ñoa'me in'jamba mende'yepa que'inga egae tsoñe in'jambi. Tsonsi Na'suja su:

²³ “¡Avujatssi'faja, Zión canqque'su aindeccu! ¡Na'su que'i Chigave in'jamba avujatssi'faja! Na'suja unjima tise tuite tuiñaqquia'caen ñotssiave atesian'suma moeña. Nane tayoe'caen tsu sanfan'su unjin toya'caen coejefa'su unjima'qque tise tuiyaqui tuiña.

²⁴ Tsa'cansi trigoma ñotsse taisi coira'je'cho cuarto on'bapa sheque'jeya. Vino tanque toya'caen olivo yayapa tanque'qque on'bapa feti'jeya.

²⁵ Tayoeta gi sundaroma moenqquia'caen ttombuma moe cuintsu que'i taiya'choma cca'na'faye. Tsane afepoenqquia'caen gi ja'ñojan ti'tsse que'inga afeya.

²⁷ Tsequi a'ta qui ñajan Na'su, que'i Chiga, Israelni can'jen'cho qquen in'jan'faya. Nane faesuve me'i'on tsu. Minguite'qque ña aindeccuja ccase ansange'faya'bi.

Chiga Qquendya'pa jiya'cho

²⁸ Tsa'caen da'fasi gi poi aindeccunga ña Qquendya'pama moeña. Que'i dutssiyendeccu, que'i onquengendeccu'qque tsu ñane afa'faya. Que'i chu'a tsandiendeccuja sefani'su attian'choma tsu atte'faya. Que'i coenzandeccuja ayó'pae tsu ayo'o'faya.

²⁹ Tsequi a'ta gi ña Qquendya'pama moeña ñama shondosundeccunga–tsandienga, pushesunga–cuintsu tsendeccuja ñane afa'faye.

³⁰ Toya'caen gi sefacconima canjaeña osha'cho camboenitssia'ma. Nane andeni'qque gi anjampa, si'nge, onfen'ba, osha'choma canjaeña:

³¹ Toya'caen Na'su jiya'cho a'ta ca'tsa nepiji'nijan coejechiga tsu sintti'e daya. Cose'suchiga'qque tsu anjampaveyi daya.

³² Tsa'ma poiyi'cco majan Na'suma iñajan'chota ccushapa pa'fayambi. Nane Jerusaléni, Zión ccotta'cconi tsu ccushaeña'choja jinchoya. Na'su tayo tansintsse suqquia'caen tsu tise in'jan'chondeccuja pambe canse'faya.”