Job 9 - Cofán: Chiga Tevaen'jen

¹ Tsonsi pañamba Jobja su:

² Ñoa'me que suqquia'can tsu, qquen gi in'jan. Nane Chiganga ccutsupa a'ija tise “ñotssiama” canjaeñe oshambi.

³ A'i Chigai'ccu afaccoye in'jamba mil afa'chove afa'ni'qque ni fae'cco Chigama patsuye afa'cho sombombi.

⁴ Chigaja ñoa'me osha'choma oshachopa osha'chove in'jan'cho. ¿Majan tsu tisema camba afapa patsu?

⁵ Chigaja iyicca'yepa ccotta'ccoma joqquitssian'jen. A'i atesumbisi ccotta'ccoma ccappoppaemba anga.

⁶ Tise tsonsi andeja oya. Oyasi tsosini jincho'qque joqquitssi'fa.

⁷ Tise mandasi coejechigaja somboya'bi. O'fema'qque mandasi chanjuña'bi.

⁸ Nane faesu fuitembi'ma tisuyi tsu sefaccoma attajaemba mar shave'pa omba'ye tsui ja'jepa patsu.

⁹ Tiseja osha'cho o'fe jinchoya'chove agattoemba Oncomari Coenza o'fe, Ofendyondyo, An'cco toya'caen Vacho'va Patienccuma'qque agattoen.

¹⁰ ¡Nane osha'cho ñotssiave tise'yi tson! ¿Majan tsu pa'cco tsama in'jañe osha?

¹¹ Chiga ñai'ccu pporotsse panshan'ni'qque ¿ma'caen gi tisema atteya? Nane tise panshan'chove atesumbi gi.

¹² Tise jongoesuma itsa'ni'qque ¿ma'caen gi tisema se'piya? Nane oshambi gi tisema iñajampañañe “¿micon'jen qui?”

¹³ Chiga iyicca'ye'ninda ¿ma'caen gi junde tisema ñoquiaña? Nane Egipto'su Rahab sundarondeccu'qque patsuyepa tisenga ccaru'fa.

¹⁴ Tsa'cansi ¿ma'caen gi tisei'ccu afaccopa ccaningae afaya?

¹⁵ Nane ñajan egae tsincombi'ma gi toya tisema afaye oshambi. Tiseja ñama tansintsse conda'su tsu. Aqquia mendeyeya'choveyi gi tisema afaye osha.

¹⁶ Mapán ña tisema tansintsse su'chove iñajampañasi tise paña'an'qque ñoa'me ña aya'fama pañañambi —qquen gi in'jan.

¹⁷ Nane injanga unjin, fingiain'ccu tiseja ñama noñangiamba ña iñacca'ttima ti'tsse atapoeña.

¹⁸ Panshaen ñama ñombi'yansi gi ni qquendyapa ñofaccaye oshambi.

¹⁹ Majan ti'tsse quin'an qquen atesuye in'jan'ni'qque tiseja osha'choma ti'tsse quin'an. Majan ti'tsse ño'an qquen atesuye in'jan'da ¿majan tsu ño'amba tisema ttu'seye osha?

²⁰ Ña egae tsincombe'yi canse'ni'qque toya tsu ña aya'fa su'choja ña shacama canjaeña. Nane ña egae tsincombe canse'ni'qque tise tsu ña egama atteya.

²¹ Ña egae tsombichoa'ja ¿jongoesune tsu bare? Nane tisuma gi chi'ga.

²² Poiyi'cco tsu fae'ngatssi'fa. Tsa'cansi gi qquen in'jan: Tiseja egae tsinconsundeccui'ccu fae'ngae ño'andeccuma'qque fi'tti sefaeña.