Job 42 - Cofán: Chiga Tevaen'jen

¹ Tsonsi Jobja Na'su Chigama pañamba su:

² In'jan gi queja osha'choma oshacho. Nane me'i'on tsu que oshambi'choa've.

³ ¿Majan gi ñajan que ñotssiama in'jambiqquia'caen in'jamba ña atesumbi'choama tsa'caen canjeñe? Nane ña atesumbi'choane gi injanga afa. Que tson'jen'choja ñoa'me a'i in'jan'choma pan'shantssia tsu.

⁴ Queja ñama su: “Ñotsse pañamba ña iñajasepoen'choma condaja.”

⁵ Tayoeja aqquia tsosinai'ccu quene pañamba gi ñoa'me quema atesumbi. Tsa'ma ja'ño gi tisu tso'fei'ccu quema attepa

⁶ ña egae in'jan'choma catipa tisuma'qque chi'gapa cusepa ccuttopa'singa onjomba dyai ña ñombi'ye'choma canjaeñe.

Job ccase ñotsse can'jen'cho

⁷ Na'su Chigaja tsa'caen Jobnga condasepa Elifazma'qque su: “Que, que dos amigondeccu'qque ñane tansintsse conda'fambisi gi que'ima iyicca'ye. Tsa'ma Jobja ñane tansintsse in'jan.

⁸ Tsa'camba siete vaura quitsaye, siete oveja quitsayema'qque angapa Jobma can'su ja'faja. Tseni japa ñanga tsa vaura, ovejama'qque oque oraen'fasi tsu Jobja que'ine ñama iñajaña. Ñajan tise iñajan'choma pañamba que'i egae tsinconsi vanaeña'choma joqquitssiamba aqque'paya. Nane que'i ñama shondo'su Job ñane ñotsse tansintsse afaqquia'caen afambi'choa shacama gi aqque'paya.”

⁹ Na'su tsa'caen susi, Elifaz, Bildad, toya'caen Zofar japa Na'su mandaqquia'caen tson'fasi Na'suja Job tise'pane iñajan'choma paña.

¹⁰ Job tsa'caen tise amigondeccune iñajansi Chigaja Jobnga ñotsse tson. Nane osha'cho tise tayoe an'bianqquia'caen ccase afepa ti'tsse tsa'cantsseyi ccase afe.

¹¹ Chiga tisenga tsa'caen ñotsse afesi poiyi'cco tise quinshingendeccu, que'ttendeccu, tise faengasundeccu'qque tisema can'su ji'fa. Poiyi'cco tise tayopi in'jan'chondeccu tsa'caen ji'fasi tise tsaoni fiestaen'fa. Poiyi'cco tsu Jobma ñotsse fuiteye condasepa tisema Na'su vanaen'chone tisema mende'yepa afa'fa. Toya'caen poiyi'cco tsu tisenga majan corifin'di toya'caen cori sotijama afe'fa.

¹² Nane osefa'poe tsu Chigaja Jobnga tayoema ti'tsse afe. Osefa'poe tsu catorce mil oveja, seis mil cameyo, dos mil qquitssa'je'cho vaura, toya'caen mil boroma'qque an'bian.

¹³ Toya'caen tsu catorce tsandie du'shu, tres pushesu du'shuve'qque isupa an'bian.

¹⁴ Pushesu du'shu coenza tsu Jemima, faesu Cesia, chu'aja Kerenhapuc.

¹⁵ Nane poi andema tta'tta'ni'qque majan pushesu Job onquengendeqquia'caen me'detssia've me'i'on tsu. Toya'caen tise yayaja dutssi'yenga afe'choma tise'panga'qque quindyayendeccui'ccu fae'ngatsse afe.

^16-17 Tsa'caen tsonsi Jobja ti'tsse ciento cuarenta canqque'fave an'biamba coenza ccashe'yeve dapa pa. Nane tise du'shumbe dushundeccuma attepa tsambe du'shumbe dushundeccuma'qque atte.