Job 38 - Cofán: Chiga Tevaen'jen

¹ Tsonsi Na'su Chigaja Jobma pañamba fingian fentsindaccu'ye afapa qquen su:

² ¿Majan qui queja, ña tansintsse su'choma chi'gapa injanga afa'suja? ¡Tsa'caen afapa qui tisu in'jambi'choama a'tatsse canjaen!

³ ¡Ccutsupa que quin'suma canjaenjan! ¡Ña quema iñajampañasi ñanga condaja!

⁴ Ñajan va andema agattoensi ¿mani qui can'jen? ¡Ñoa'me atesu'cho'ta ñanga condaja!

⁵ ¿Majan tsu simba'fai'ccu andema agattopa mi'nge'tssia randeve agattoeñe asi'ttaemba in'jan?

⁶ ¿Jongoesunga tsu ande'su dyaiña'choma dyaiña? ¿Majan tsu ande'su chan'jime dyaiña'choma dyaiña?

⁷ Nane tsequi tsu poi ataje'cho'su o'feja fae'ngae settapoensi poi Chigama sefacconi'su shondosundeccu fae'ngae avujatsse fundo'je'fa.

¹⁶ ¿Ca'ni'cho ti qui tsa atesu'ma'sia mar tsosini'su chango'ye mane mar tsa'ccu sombo'jeni?

¹⁷ ¿Atte'cho ti qui pa'chondeccu ande'su sombo'ttima? ¿Tsa pa'chondeccu ande sintssia'ye jacan'cho ti qui?

¹⁸ ¿Asi'ttaemba in'jambi ti qui ande mi'nge'tssi attaja'suve? ¡Que ñoa'me osha'choma atesu'ta ñanga tsama condaja!

¹⁹ ¿Mani tsu a'tatssia'ja jincho? ¿Toya'caen mani tsu sintssiaja jincho?

²⁰ ¿Queta ti qui a'tatssia tsambi'ta sintssia ja'je'cho tsaiquima atesupa tise can'jeni angaye osha?

²¹ ¡Nane bo'tsse can'jemba qui ñoa'me atesu! ¡Me'ttia'ye isuyepa qui tsama attepa in'jan!