Job 11 - Cofán: Chiga Tevaen'jen

¹ Tsonsi faesu Job amigo, Zofarja, qquen su:

² Tsain'bitsse injanga afa'jesi pañamba gi afaye in'jan. Nane aqquia injanga injan'tsse afa'choja bareya'bi.

³ ¿Injan'tsse afapa ingima ziyaeñe ti qui in'jan? ¿Que sumbia'caen afa'chone afaye osha'fambi qquen ti qui in'jan?

⁴ Que in'jan'choja tansintssi qquen qui su'je. Que injama'choni queja ñotssi qquen qui in'jan.

⁵ ¡In'jan gi cuintsu Chiga afapa quenga condaye!

⁶ Tiseja osha'cho vanamba atesuqque'suma ñotsse atesuchopa ñoa'me in'jan'choma quenga atesiaña. Tsa'caen atesiansi qui Chiga quema mendeye'chove atesupa in'jaña pa'cco que shacama iñajambichoa've.

⁷ ¿Osha ti qui osha'cho Chigane jinchoma atesuye? ¿Nane tise injama'cho in'jan'choma atesuyeta ti qui osha?

⁸ Chiga jincho'choja tise sefacconima ti'tsse joccapitssia tsu. ¿Ma'caen qui tsoñe osha? Chiga jincho'choja ande tsosini'su changoma ti'tsse ccaninga'o tsu. ¿Ma'caen qui atesuye osha?

⁹ Chiga jincho'choja pa'cco andema ti'tsse'o tsu. Pa'cco marma ti'tsse attajatssia tsu.

¹⁰ Chiga jipa a'i injama'choma somboeñe indi'ninda ¿majan tsu tisema se'piya?

¹¹ Chigaja majan afopa'chove atesupa egae tsincon'su tson'choma'qque atesu. ¿Tsa'caen atte'ta tansiañambi ti?

¹² Nane maqui a'ta tsampi'su boro opave da'ninda, tsu tsequi a'ta sumbi'qque ñotsse in'jaña.

¹³ Injama'cho tsosipie ño'ame daye in'jamba Chigama iñajanjan.

¹⁴ Egae tsincomba shacaen'ninda tsu tsama joqquitssiaña'cho. Se'pija que tsaoni jongoesu egae tsincon'cho can'jensa'ne.

¹⁵ Tsa'caen tson'da qui giya'tssia camba'juma canjaenqquia'caen ansangembe'yi dyombi'tsse opatsse canseya.