Jeremías 7 - Cofán: Chiga Tevaen'jen

Jeremías Chiga ettini afa'cho

¹ Na'su Chiga Jeremíasnga afapa qquen su:

² “Na'su Chiga ettini japa cani'jen'ttinga ccutsupa poi aindeccunga qquen condaja: Poiyi'cco que'i Judá aindeccu vani Na'su Chigama iñajañe canisundeccu ña condase'choma ñotsse paña'faja.

³ Qquen tsu Na'su Israel Chiga, tsa Osha'choma Oshacho'cho Chigaja, que'inga su: ‘Que'i egae canse'choma catipa ñotsse tson'ninda gi antteya que'i toya va andeni canse'faye.

⁴ Tsa'ma qquen afopoensundeccuma paña'fajama: ¡Vani tsu Na'su Chiga etti! ¡Majañi'qque ingima patsuye osha'fambi! ¡Vani tsu Na'su Chiga etti!

⁵ “ ‘Que'i egae canse'choma catipa ñotsse tsomba tisu faenga'sui'ccu ñotsse tsoncco'faja.

⁶ Yaya mama pa'cho dushundeccumbema, tsandupajen'chondeccumbema, que'i'ccu can'jen'cho faesu andesundeccumbema'qque itsaye noñangian'fajama. Va ettini aqquia: Vaja egae tsincon, qquen afopoen'fajama tisema fi'ttiañe in'jamba. Ti'tsse faesu chigandeccuma iñajan'fajama tsa'caen tsomba Na'su que'i Chigama catipa ti'tsse tisuma dañosa'ne.

⁷ Nane tsa'caen tisuma tansian'fa'ninda gi antteya que'i toya va andeni canse'faye, va ña que'i tayopisundeccu'yenga tsangae afe'cho andeni.

⁸ “ ‘Que'i pañamba in'jan'choja ñoa'me barembi'choa afopoen'cho tsu.

⁹ Nane que'ija cca'na'fa; fi'tti'fa; faesumbe pushei'ccu can'jen'fa; tansintssi qquen supa qui afopoen'fa; ñome'bama qui Baalnga oque oraen'fa; poi tisu atesumbindeqquia chigandeccuma'qque qui iñajan'fa.

¹⁰ Tsa'caen tsomba qui va ña ettinga ji'fa ñame tta'ttaye. Dyombi'tsse vani ji'jeye qquen qui in'jan'fa. Nane tsa'caen ña in'jambi'choa've tsincomba toya dyombi'tsse ji'jeye qquen qui in'jan'fa.

¹¹ ¿Jongoesu qquen qui asi'ttaen'fa? ¿Va ñame in'jan'cho ettita ti ccanamba tsa'o? Ña Na'su Chiga gi que'i va'ttinga egae tsincon'choma tayo attepa ja'ño que'inga conda.

¹² Silo canqqueni japa ña me'ttia'ye a'i'ccu can'jemba cachuicco'je'ttive tta'tta'faja. Tta'ttapa qui in'jan'faya ña Israel aindeccu egae tsinconsi iyicca'yepa tsama nepian'choma.

¹³ Nane mi'nge'e iyu'ñacca'ni'qque qui ñama pañañe in'jambipa afa'fambi ni ña in'janqquia'caen tson'fambi. Ña Na'su gi tsa'caen su.

¹⁴ Que'i tsa'caen tsincon'chone gi Silo'su ñama cachuicco'je'ttima nepianqquia'caen va ja'ño'su ñame in'jan'cho ettima'qque nepiaña. Ñajan va ettima que'i tayopisundeccu'yenga afepa que'inga'qque afesi que'ija tsa etti faesundeccu patsusa'ne que'ima coira'je qquen in'jan'fa.

¹⁵ Nane que'i antiandeccu tsa israe'su Efraín aindeccuma tayoe joqquitssianqquia'caen gi que'ima'qque ña'ñe joqquitssiaña.’ ”