Jeremías 32 - Cofán: Chiga Tevaen'jen

Jeremías piccoyepa can'jen'cho

¹ Judá na'su Sedequías diez canqque'fave manda'je'ni Na'su Chigaja Jeremíasnga afa. Nane tsa canqque'fani Nabucodonosor diez y ocho canqque'fave manda'je'ni

² tsu tise Babilonia'su sundarondeccuja Jerusaléni jipa iyicco'je'fa. Tsa'caen iyicco'je'fani Chiga aya'fama afa'su Jeremíasja piccoyepa can'jen na'su tsa'o'su sundarondeccumbe atandunduni.

³ Nane Jeremías Na'su Chiga su'choma condasesi tsu na'su Sedequíasja tisema iyicca'yepa indipa piccopa an'bian. Qquen Na'su Chiga tisenga su'choma tsu Jeremíasja conda: “Antteya gi cuintsu Babilonia'su na'su va canqquema patsuye.

⁴ Patsusi na'su Sedequías'qque ccushaya'bi. Nane caldeondeccu tisema indisi tsu Babilonia'su na'sunga ccutsuya'cho injama'choma somboengeye.

⁵ Nabucodonosor mandasi Sedequíasma Babiloniani angapa an'biaña ña ccase tisene in'jaña'ngae. Mapán iyicco'a'qque qui Babilonia'su caldeondeccuma patsupa ccushaya'bi. Ña, Na'su Chiga gi que'inga conda.”

Judá egae tsincon'cho

²⁶ Omboe Na'su Chigaja Jeremíasnga su:

²⁷ “Ña gi Na'su, Osha'cho Cansian Jinchombe Chiga. Me'i'on tsu ña oshambi'choa've.

²⁸ Tsa'camba gi su: Antteya gi cuintsu Babilonia'su na'su Nabucodonosor, tsa caldeo na'su, va canqquema patsuye.

²⁹ Nane iyicco'su caldeondeccu tsu va canqquenga ca'nimba oque'faya. Canqquema oquepa tsu poi tsa'oma'qque oque'faya. Nane poi tsa'o omba'su ppappacconga tsu ñome'bama oque oraemba Baalma iñajan'fa ñama iyicca'yeañe. Toya'caen vinoma fiña'fa faesu chigandeccuma iñajañe.

³⁰ Chuitepie tsu Israel aindeccu, Judá aindeccu'qque egae tsincomba canse'fa. Anttembe'yi tsu israendeccuja ñoña'cho chigandeccuve ñoñamba tsama iñajan'jen'fa ñama iyicca'yeañe. Ña, Na'su Chiga gi que'inga conda.

³¹ Va canqquesundeccuja Jerusalénme ashaeinte ja'ñoa'ngae jo'su ñama iyicca'yeañeñi tsincon'fa. Tsane gi tise'pama iyicca'yepa sefaeña.

³² Israendeccu, judándeccu'qque egae tsincomba cansepa ñama noñangian'fa. Nane aindeccu, nasundeccu, mandasundeccu, Chigama afasundeccu, Chiga Aya'fama afasundeccu, toya'caen poiyi'cco Judá, Jerusaléni can'jensundeccu'qque ñama noñangian'fa.

³³ Cambajunaccu ñama cambipa sepaccoma ñanga canjaen'fa. Ñajan poi a'ta anttembe'yi tise'pama atesian'ni'qque toya ñama pañambipa ña nafattian'choma chi'ga'fa.

³⁴ Ñoa'me gi tise'pa ñoña'cho chigandeqquiacan'ma chi'ga. Nane tsesuma ñañi can'jen'cho ettinga ccutsiamba tsu ña tsa'oma daño'fa.

³⁵ Toya'caen Ben-hinom sinjunccuni tsu Baalma iñajan'jen'cho oque'je'chove ñoña'fa. Tsanga tsu tise'pa dutssiyendeccu, onquengendeccuma'qque fi'ttipa Molocnga afe'fa. Ñajan tsama chi'gapa tsa'caen mandambi. Ni in'jambi gi tise'pa tsa'caen egae tsincon'faye. Tsa'caen egae tsincomba tsu poi judándeccuma daño'fa.

Jai'ngae opatsse canseya'cho

³⁶ “Que'i suqquia'caen gi gera, qquipoe'su, paqque'sui'ccu'qque va canqquema da'ñoña cuintsu Babilonia na'su patsuye. Tsa'ma ña, Na'su Israel Chiga gi su:

³⁷ Tayoe va aindeccuma iyicca'yepa chi'gapa poi faesu andeni shequian mañamba gi tise'pama tsa'ye ttu'sepa ccase va tise'pa can'jen'cho andengayi boñaña. Vani tsu opatsse canse'faya.

³⁸ Nane ñajan tise'pa Chigave dasi tsendeccuja ña aindeccuve da'faya.

³⁹ Ñajan tise'pa injama'choma ñoñaña cuintsu anttembe'yi ñame in'jamba canse'faye. Tsa'caen cansepa tsu tise'pa, tise'pa dushundeccu'qque tsangae ñotsse opatsse canse'faya.

⁴⁰ Toya'caen tise'pai'ccu gi tsangae fae'ngae injancco'fa'chove afaya. Ñoa'metsse su'choi'ccu gi tise'panga qquen condaya: Anttembe'yi gi tise'panga ñotsse tsomba in'jaeña cuintsu anttembe'yi ñame in'jamba paña'faye.

⁴¹ Nane avujaya gi tise'panga ñotsse tsoñe. Pa'cco ña in'jan'choi'ccu gi tise'pa va andeni canseya'chove antteya.”