Jeremías 31 - Cofán: Chiga Tevaen'jen

Toequi jiya'cho settapoen'cho

¹⁵ Na'suja qquen su: “Ramá andene aya'fama paña'fa, i'namba ñombi'yepa ñoa'me fundo'je'choma. Tsata tsu Raquel, tise dushundeccune ñombi'yepa ina'jen. In'jambi tsu tise ina'jen'choma vuiquiya. Nane tsangae tsu tise dushundeccuja pa'fa.”

¹⁶ Tsa'ma toya'caen Na'suja qquen su: “Raquel, ti'tsse i'najama. Ja'ño que inanzaccuma samboenjan. Nane que dushundeccu enemigo andene ji'fasi que ñotssiama isusi tsu que vana'jen'choja pasaya. Ña, Na'su Chiga gi que'inga conda.

¹⁷ Jai'ngae ñotsse tsoña'chove ronda'jeja. Que dushundeccuta tsu ccase que andeni ji'faya. Ña, Na'su Chiga gi que'inga conda.”

Israel ccase jipa ñotsse canseya'cho

²⁷ Na'su Chigaja qquen tansintsse conda: “Jai'ngae gi aindeccuma Israelni Judáni'qque tsain'bitsse atapoemba tise'pa aiña'choma'qque tsain'bitsse atapoeña.

²⁸ Nane tise'pa tson'jen'choma gi anttembe'yi caña'jen. Tsa'camba gi tise'pama sai isupa dañoqquia'caen da'ñomba nepian. Tsa'ma tsa'caen tise'pama camba dañoqquia'caen gi tise'pama camba ccase jonqquia'caen ñoñaña. Ña, Na'su Chiga gi que'inga conda.

²⁹ “Tsequi a'ta tsu qquen su'je'choja pasaya: ‘Yayandeccu tsaja inza'ama an'fa'ninda dushundeccu tte'tto ccondyavu'faya.’

³⁰ Tsa'ma majan tsaja inza'ama an'ninda tsu tsambe tte'tto ccondyavuya. Tsa'cansi poiyi'cco tsu tisupatsse egae tsincon'chone pa'faya.”

^31-32 Na'su Chigaja qquen tansintsse conda: “Tayoe Israel tayopisundeccu'yema Egipto'ye somboemba ipa gi tise'pai'ccu fae'ngae injancco'fa'chove afa. Tsa'ma tsendeccu ñama ñotsse pañambipa ñai'ccu injancco'fa'choma cati'fa. Tsa'cansi jai'ngae gi israendeccui'ccu toya'caen judándeccui'ccu fae'ngae ccase injancco'faya. Tsata tsu tayosia'cambi. Ña, Na'su Chiga gi que'inga conda.

³³ Nane qquen tsu ña tsequi a'ta Israeli'ccu fae'ngae injanccoya'cho: Ña tise'pama in'jaensi tsu injama'choi'ccu ña in'janqquia'caen in'jamba tsa'caen ñotsse tson'faya. Tise'pa tsa'caen ña aindeccuve dasi gi ñajan tise'pa Chigave daya. Ña, Na'su Chiga gi que'inga conda.

³⁴ Nane tayoe a'ija tisupapora atesian'fa. Quindya tsu tise quinshinma nafattian cuintsu Na'su Chigave in'jañe. Tsa'ma tsequi a'ta poiyi'cco pañamba ñame in'jansi majameñi'qque atesiañe me'i'on tsu. Nasundeccu, utu'ccoandeqquia'qque tsu ñame in'jan'faya. Nane tise'pama mende'yepa gi tise'pa egae tsincon'choma agattoya'bi. Tise'pa shacama gi aqque'paya. Ña, Na'su Chiga gi que'inga conda.”

³⁵ Na'su Chigaja coejechigave ñoña a'tama atian'suve. Toya'caen cose'suchiga, o'feve'qque ñoña cosema atian'suve. Marni'su shave'pama'qque jangian cuintsu quian'me zonzoeñe. Nane Osha'choma Oshacho'cho Na'su tsa'caen ñoña'suja qquen su:

³⁶ “Ma'caen'qque ña agattoen'cho maqui a'ta qque'choecan'da tsu tsequi a'ta Israelja ña a'imbi'choave daye'can. Ña, Na'su Chiga gi que'inga conda.

³⁷ Nane maqui a'ta a'i sefaccoma agattopa tsambi'ta ande tsosiccunima'qque agattoye osha'choecan'da gi tsequi a'ta Israelma catiye'can. Ña, Na'su Chiga gi que'inga conda.”