Jeremías 23 - Cofán: Chiga Tevaen'jen

Israel na'su jai'ngae jiya'cho

¹ Na'su Chigaja tansintsse conda: “¡Va'cha tsu ña aindeccuma manda'su nasundeccu! Nane ega ovejama coirasundeqquia'caen a'ima ñotsse coirambipa injanga tise'pama qqueñamba shequian maña'fa.”

² Na'su Israel Chiga tsu tise aindeccuma mandasundeccunga qquen conda: “Que'ija ña ovejandeccuma ñotsse coirambipa qui injanga shequian maña'fa. Tsa'caen ña aindeccuma egae tson'chone gi que'i injama'choma'qque somboeña. Ña, Na'su Chiga gi que'inga conda.

³ Mapán que'i ña ovejandeccuma faesu andeni tteya maña'fa'ni'qque gi enttinge jinchoma ccase ipa boñamba antteya cuintsu tise'pa potreroni can'jemba atapa'faye.

⁴ Toya'caen gi ñotsse mandasundeccuma ccutsiaña cuintsu tise'pama ñotsse coirapa ni fae'ccoveyi'qque qqueñambitsse an'biañe. Nane tsa'caen ñotsse coirasi tsu dyombi'tsse can'jen'faya. Ña, Na'su Chiga gi que'inga conda.”

⁵ Na'su Chigaja tansintsse conda: “Jai'ngae gi antteya shoyo'choqquia'caen na'su David omba'su dutssi'ye na'suve dapa ñotsse in'jamba ñotssiaveyi tsomba tansintsse poi aindeccuma mandaye.

⁶ Tise manda'je'ni judándeccuja ccusha'faya. Nane israendeccuja opatsse canse'faya. Qquen qui tisema afa'faya: ‘Na'su ingima ccushaen'su qui.’ ”

⁷ Na'su Chigaja tansintsse conda: “Jai'ngae qui qquen afa'faya'bi tansintssia su'cho qquen canjaeñe: ‘Na'su Chiga israendeccuma Egipto'ye somboen'su canse'ninda tansintsse su'cho tsu.’

⁸ Tsa'ma qquen qui su'faya'cho: ‘Na'su Chiga Israel dutssiyendeccuma norte'su ande'ye, faesu tteya maña'cho ande'ye'qque somboen'su canse'ninda tansintsse su'cho tsu.’ Nane tsequi a'ta qui tisupa an'biaña'cho andeni can'jen'faya.”