Jeremías 1 - Cofán: Chiga Tevaen'jen

¹ Va tevaen'jen tsu Hilcías dutssi'ye Jeremías su'choma, toya'caen tise tson'choma'qque conda. Nane Benjamín aindeccu andeni, Anatot canqqueni'qque tsu Jeremías aindeccuja can'jen'fa. Chigama afasundeccu tsu.

² Judá ande na'su Josías, tsa Amón dutssi'ye, trece canqque'fave mandajeite tsu Na'su Chigaja Jeremíasnga me'ttia'ye afa.

³ Omboe Josías dutssi'ye Joacim Judáma mandajeite'qque afa'ñaccapa toya'caen Josías faesu dutssi'ye Sedequías mandajeite'qque Jeremíasnga afa'ñacca. Nane Sedequías once canqque'fa faesu cinco ccovuve mandajeite Babiloniandeccu Jerusaléndeccuma tisupa andeni angaya'ngae tsu Na'su Chigaja Jeremíasnga afa'ñacca.

Na'su Chiga Jeremíasma ttu'se'cho

⁴ Na'su Chigaja ñama afapa qquen su:

⁵ “Que toya meite gi quema tayo ttu'se. Nane toya isumbi'te gi quema tayo attufaen. Tsequi gi quema ccutsian poi aindeccunga Ña aya'fama afa'suve.”

⁶ Pañamba ñajan su: “¡Ai, Na'su! ¡Ñajan toya chu'a! ¡Afaye atesumbi gi!”

⁷ Tsa'ma Na'suja ñama su: “ ‘Ñajan toya chu'a’ qquen afajama. Mani ña manda'ninda qui jaya. Jongoesu qquen ña afa'ninda qui tsama condaya.

⁸ Majameñi'qque dyojojama. Nane ñajan quei'ccu gi can'jeña quema coira'jeye. Ñajan Na'su gi, tansintsse afa'su.”

⁹ Tsomba Na'suja tise tivema yasapa ña aya'fama pporaemba qquen ñanga su:

¹⁰ “Ña que aya'fama qquen pporaen'ninda qui ña afa'choma afaya. Ja'ño gi quema ccutsian poi nasundeccuma, poi aindeccuma'qque ti'tsse joccapitssia've cuintsu queja tise'pama joqquitssiamba sefaeñe; cuintsu tise'pama patsupa nepiañe. Toya'caen gi quema in'jaen cuintsu tise'pama mandapa ccase ñoñamba atapoeñe.”