Isaías 7 - Cofán: Chiga Tevaen'jen

Isaías Acaznga o'tie afa'cho

¹ Siria na'su Rezín, toya'caen Israel na'su Peka, tsa Remalías dutssi'ye, Jerusaléni jipa geraen'ma patsuye osha'fambi. Nane Jotam dutssi'ye Acaz, Judáma manda'je'ni tsu tsa'caen geraen'fa. (Acaz yayaccashe'ye tsu Uzías'ye.)

² Acaz, toya'caen tisema shondosundeccu'qque, israendeccu fae'ngae Siria'su sundarondeccui'ccu geraeñe ji'fa'choma paña'fa. Pañamba ñoa'me dyo'fa. Nane fingian jisi quini'cco oyaqquia'caen tsu tise'paja ttun'dundu'jeve dyo'fa.

³ Dyo'fasi Na'suja Isaíasnga qquen su: “Que dutssi'ye Sear-jasubma (‘re'ricco aindeccu'su toequi jiya'cho’) angapa Acazni japa cachuipa ña su'choma condaja. Nane sefa'tssia tsa'ccu singu'ccunga ja'je'chombe tsutopafae ja'je'cho tsaiqui jin'ttinga, tsa sarupama mappan'su andeje'ttinga, qui tisema cachuiya.

⁴ Japa cachuipa qquen suja: ‘Injama'tse. Tsa'ma opatsse can'jen'faja. Nane va si'nge setsa'je'cho te'cho'caen quin'su mendeqquia ji'fa'ni'qque dyombe can'faja. Nane Siria na'su Rezín, tise sundarondeccu, toya'caen Remalías dutssi'ye Peka iyicca'yepa si'nge anchanda'jeqquia'caen jiña'fa'ni'qque dyombe can'faja.’ ”

Emanuelma isuya'cho

¹⁰ Toya'caen Na'su Isaíasma afaensi ccase Acaznga su:

¹¹ “Na'su que Chigama iñajanjan canjaen'chove canjaensi atesuye. Nane ande tsosiccuni'su tsambi'ta sefacconi'su canjaen'chove iñajanjan.”

¹² Tsa'ma Acazja su: “Me'in, ñajan Na'suma qqueñacañe in'jambi gi canjaen'chove iñajamba.”

¹³ Tsonsi Isaíasja tisema su: “Paña'faja que'i David omba'su dutssiyendeccu. Que'ija aindeccuma noñangiamba, ¿Na'su ña Chigama'qque ti qui noñangiañe in'jan'fa?

¹⁴ Nane Na'suyi tsu canjaen'chove canjaeña. Chu'a pushesu tsu surie dapa tsandie du'shuve isuya. Du'shumbe iniseja Emanuelya (‘Chiga ingi'ccu can'jen’) tsu.

¹⁵ Du'shu chuite tsu chocho sampecha'ma tuño cuñajun'choi'ccu an'jeña.

¹⁶ Tsa'ma toya tise atesumbisi tsu tsa quema dyoña'su dos nasundeccumbe andeja a'i meniame daya.

¹⁷ Na'su Chiga anttesi que, que aindeccu, que antian nasundeccu'qque vana'faya. Nane Efraín Judá'ye attufaite ja'ñoa'ngae qui tsa'cantsse vana'jen'fambi. Tsa'ma Asiria na'suma moesi qui ñoa'me vana'faya.”