Isaías 65 - Cofán: Chiga Tevaen'jen

Pañambi'choa vanaña'chone condase'cho

¹ Na'suja su: “Ñame tta'ttambindeqquia tsu ñama atte'fa. Ñame iñajampañambindeqquianga gi ñajan tisuma canjaen.

² Ñajan a'ima in'jamba pa'cco a'ta tise'pama ttu'se'ni'qque pañambipa ñama iyicca'ye'fa. Tisupa in'jan'choveyi in'jamba injanga ccaningae jaja'fa.”

Pañamba avujaya'cho

¹⁷ “Que Canjan. Cuna sefacco, cuna andeve gi agattoeña. Tayo pasa'choma aqque'papa minguite'qque a'ija tsama injan'jeñambi.

¹⁸ Ña agattoeña'choma attepa avujatssipa tsangae tsa'caen avujatsse can'jen'faja. Nane cuna Jerusalén canqqueve agattoensi tsu poiyi'cco tseni can'jensundeccu avujatssiya.

¹⁹ Ña'qque tsa Jerusalénma attepa avujatssipa gi tseni can'jensundeccuma'qque attepa injama'choni avujaya. Nane tseni ti'tsse ina'jen'choma pañambipa ni ñombi'yepa fundo'je'choma ccase pañaña'bi.

²⁰ Tsenijan jiña'bi tsu aipano pa'cho, ni majan tseyi isu'chove. Coenza ccasheyendeccu'qque uta pambipa bo'tsse canse'faya. Majan cien canqque'fave an'biamba pa'ta ñoa'me chu'a tsu pa. Nane toya cienme nepimbi'te pa'ninda tsu poiyi'cco tisenga egae tsincon'choma in'jan'faya.

²¹ A'i tsao'ñamba tsani can'jen'faya. O'fa tsaja nasipave jomba tsama an'faya.

²² Nane tsao'ñasi faesu tsani can'jen'choja jiña'bi. Toya'caen nasipama jonsi faesu tsama an'jen'cho'qque jiña'bi. Quini'cco bo'tsse canseqquia'caen tsu ña aindeccu'qque bo'tsse canse'faya. Nane ña in'jan'chondeccuja semamba avujatsse tise'pa sema'jen'cho'suma isupa ñotsse canse'faya.

²³ Tise'pa, toya'caen tise'pa omba'su dutssiyendeccu'qque Na'su in'jan'cho aindeccu tsu. Na'su tsa'caen in'jamba ñotsse tsonsi aqquiatsse injanga ñotsse sema'fambi ni tise'pa du'shuma toya chu'ayi paya'chove isu'fambi.

²⁴ Tsendeccu toya ñama ttu'sembi'te gi tise'pa in'jan'choma in'jamba afaya. Nane tise'pa toya afa'je'ni gi tise'pama pañaña.

²⁵ Putsa'su ain, oveja'qque fae'ngae ccuipa shoshovima an'jen'faya. Ttesi'qque vaura'caen shoshovi sambama an'jeña. Tsa'ma iyota tsu andema amba canseya. Nane pa'cco ña ñotssia ccotta'cconi'qque jongoesu dañoña'choja jinchoya'bi.” Na'su tsu tsa'caen su.