Isaías 6 - Cofán: Chiga Tevaen'jen

Chiga Isaíasma ttu'se'cho

¹ Na'su Uzías pasi tsa canqque'fa gi Na'su Chiga can'jen'choma atte. Tise sefa'tssia dyaipa'chonga dyaisi tise ondiccu'je'cho ñotssia Chiga ettinga on'ba.

² Tisema ombanimajan si'ngiaca'on cansepa jinchondeccu sheque'fa. Poi cansepa jincho tsu seis sanccopave an'bian'fa. Nane poiyi'cco dos sanccopai'ccu tise camba'juma piccopa, dosi'ccu tise tsu'ttema piccopa faesu dosi'ccu chhaje'je'fa.

³ Chhaje'jepa tsu tisupapora qquen su'fa: “¡Ñotssia, ñotssia, ñotssia tsu Na'su Osha'choma Oshacho'cho Chigaja! Nane pa'cco ande tsu tise ñotssiai'ccu on'ba.”

⁴ Cansepa jinchondeccu tsa'caen afa'fasi poi Chiga etti'su sombo'tti oya'jesi pa'cco ettinga onfen'bayi on'ba.

⁵ Attepa gi asi'ttaen: “¡Va'cha gi! ¡Paye tson'jen! Nane tisu tso'fei'ccu gi Na'su, Osha'choma Oshacho'cho Chigama atte. Ña injama'cho egasi ña aya'fa'qque ega. Toya'caen ña can'jen'tti'su aindeccu injama'cho egasi tise'pa aya'fa'qque ega'fa.”

⁶ Tse'faei'ccuyi fa'e si'ngiaca'on cansepa jinchoja si'nge setsa'je'cho te'choma oque'je'cho'suma indian'choi'ccu isupa ñani chhaje jipa

⁷ ña aya'fama tsai'ccu pporaemba su: “Que canjan. Va si'nge setsa'je'cho te'choi'ccu que aya'fama pporaensi tsu que egae tsincon'choja joqquitssi. Nane Chiga tsu que egae tsincon'choma aqque'pa.”

⁸ Tsonsi gi paña Na'su Chiga aya'fa qquen su'choma: “¿Majama gi moeña? ¿Majan tsu ingine afa'suve dapa jaya?” Pañamba gi su: “Ña gi can'jen. Ñama moejan.”

⁹ Tsa'caen susi tiseja su: “Japa va aindeccunga qquen suja: ‘Ñoa'me tsonsinai'ccu paña'ma qui in'jan'faya'bi. Ñoa'me tso'fei'ccu atte'ma qui in'jan'faya'bi.’

¹⁰ Nane va aindeccuma tsonjan cuintsu injama'cho shacasi tombu'faye injama'choi'ccu ñame in'jamba ccushaengesa'ne. Nane tise'pa tsonsinama'qque piccoja paña'fasa'ne. Tso'fema'qque tsapija atte'fasa'ne.”

¹¹ Tsa'caen susi gi iñajampaña: “¿Na'su, mañi a'ta tsu tsa'caen in'jambitsse canse'faya?” Tsonsi Na'suja ñanga su: “Nane canqque metsse sefa'fasi aindeccu'qque metsse dapa, tsa'o'qque a'ive metsse daya'ngae tsu tsa'caen in'jambitsse canse'faya. Toya'caen nasipa'qque caticcuve

¹² Na'su aindeccuma faesu andeni angasi va ande'qque a'i meniame daya'ngae tsu tsa'caen canse'faya.

¹³ Mapán enttinge'cco a'i, fae chongayi'cco tsa andeni toya can'jen'ni'qque gi tise'pama'qque sefaeña. Tsa'ma quini'ccoma ttuttusi toya tsu setsa'choja andeni jin. (Ñame in'jan'chondeccu tsu tsa'ye sho'yoqquia'caen ccase atapa'faya.)”