Isaías 59 - Cofán: Chiga Tevaen'jen

Israendeccu shacapa vana'jen'cho

¹ Na'su Oshacho'choja ingima ccushaeñe oshambi'bi tsu inginga nepipa ingima ccushaeñe. Ni tsosinambia'caen ingima pañañe oshambi'bi tsu.

² Tsa'ma que'i egae tsincon'choi'ccu qui ttuccuma ccutsian'fa. Enttingeni ccutsiamba qui Chiganga catseye osha'fambi. Nane que'i in'jangae canse'fasi Tiseja tisu camba'juma picco que'i tisema attesa'ne; toya'caen tise que'ima pañasa'ne.

³ Que'i tiveja anjampai'ccu sinccopasi que'i tsimian'cco'qque egae tsincon'choi'ccu te'vaqquia'caen shacapa. Que'i aya'faja afopoen'choveyi afa'jesi que'i menzanza'fa'qque in'jangae tson'jen.

⁴ Nane tansintsse su'chove tta'tta'fambi. Ni faesui'ccu tansintsse condaseccopa tansiaña'chove in'jan'fambi qui. Ti'tsse afopa'chove in'jamba qui aqquia injanga afapa condasecco'fa. Tsa'caen tsomba qui egae in'jan'choi'ccu suripa egae tsincon'choma isu'faya.

⁶ Pa'cco que'i tson'jen'cho tsu egae tsincon'cho. Que'i tivei'ccu qui sema'fa osha'choma tsomba qquejiañe.

⁷ Que'i tsu'tte'ta tsu bare egae tsincon'chonga buttopa jaye, toya'caen quian'me japa egae tsincombi'choma fi'ttiye. Que'i injama'choni'qque egae in'jan'choyi on'ba'osi qui mani jacan'an'qque osha'choma dañomba vanae'fa.

⁸ Nane opatsse canseya'chove atesu'fambi qui. Ni tansintsse tsoñe qui osha'fambi. Que'i ja'je'cho tsaiquija itoyetssi tsu. Nane majan tsa'caen jacan'da tsu opatsse canse'faya'bi.