Isaías 55 - Cofán: Chiga Tevaen'jen

Na'su Chiga ttu'se'cho

¹ “¡Poiyi'cco majan qquipoe'su'ta jipa tsa'ccuma cu'i'faja!” Majan corifin'di me'cho'ta jipa afepoembe'yi trigoma isupa an'faja. Nane vino, chochoma'qque chavambe'yi cu'i'faja.

² ¿Jongoesie qui corifin'dima catipa osha'cho an'masia'ma injanga chava'fa? ¿Jongoesie qui que'i semasi afepoen'choma in'jambe'yi injanga cati'fa? Ñama ñotsse paña'da qui ñotssia anqque'suma amba ya'yatssia'ma'qque avujatsse an'faya.

³ Ñani jipa ñama paña'faja. Ñama pañamba canse'faja. Nane tsangae injancco'fa'chove gi que'i'ccu afapa tson'jeña ña tayopi'su David'yenga ñotsse in'jamba afa'cho cuintsu ja'ño nepiye.

⁴ Nane tisema gi ccutsian cuintsu poi ande'su aindeccunga canjaemba poi canqque'su aindeccuma nafattiañe.

⁵ Ña, que Na'su, Israel Ñotssia Chiga quenga ñotssiave tsonsi qui quema atesumbi'choa canqquesundeccuma'qque ttu'seya. Nane que ttu'sesi tsu quenga buttopa ji'faya.

⁶ “Toya tisema atteye osha'ta Na'suve tta'tta'faja. Toya pporotsse tise can'jen'ninda tisema ttu'se'faja.

⁷ Egae tsincon'suja tise tson'jen'choma antteya'cho. Egae in'jan'choja tise injama'cho in'jan'choma antteya'cho. Nane Na'sunga toequi shanda'ninda tise tsu me'deyeya. Na'sunga toequi shanda'ninda tise tsu egae tsincon'choma aqque'paeña.

⁸ Ña in'jan'choja que'i in'jan'choacambi tsu. Ña tson'cho'qque que'i tson'choacambi tsu.

⁹ Nane sefacco andema ombanga jinqquia'caen Ña in'jan'cho tsu que'i in'jan'choma ti'tsse'tssia. Toya'caen ña tson'cho tsu que'i tson'choma ti'tsse'tssia.” Qquen tsu Na'suja ñoa'me su.

¹⁰ “Unjin chandisu'cco'qque sefane tuipa, ccase toequi sefani ansundembi. Nane tsangae tsu tuipa andema tssipoen cuintsu sho'yoqque'su sho'yopa te'taye. Tetasi a'ija an'bian'fa ccase joñe; toya'caen panme ñoñamba añe.

¹¹ Tsa'canqquia'caen ña Aya'fama injanga afambi gi. Tsa'cansi tsu ña in'janqquia'caen tsomba ña mandaqquia'caen tsoña.

¹² Que'ija avujatsse tsene sombopa que'i andeni ccase japa opatsse can'jen'faya. Nane que'i toequi ja'choma attepa ccotta'cco rande, chipiri'qque settapoemba avuja'faya. Quini'cco'qque attepa tise'pa ttembama oyaen'faya tsai'ccu tise'pa avuja'choma canjaeñe.

¹³ Nojan sho'yombisi onsha'mejan atapaya. Ancco'si me'i'onsi shaga'ttoja atapaya. Tsa'caen tson'jensi tsu poiyi'cco Na'su inisema ñotsse afa'faya. Nane tsaja ccucha'masia tsangae canjaen'cho tsu.”