Isaías 53 - Cofán: Chiga Tevaen'jen

¹ ¿Majan tsu ingi condase'choma in'jan'faya? ¿Majanga tsu Na'suja tise oshacho'choma canjaen?

² Nane Na'suja in'jan cuintsu tisema shondo'su jonqquia'caen santssia ande'ye sho'yoye. Ñotsse attiambi ingi tise've in'jan'faye. Ñotssimbi ingi tisenga catse'faye.

³ Nane a'ija tisema chi'gapa cati'fa. Ñombi'ye'su a'i tsu. Nane vanañe atesu'cho tsu. A'tuqquia'caen gi tisema panshan'fa. Barembi tsu qquen in'jamba gi tisema chi'ga'fa.

⁴ Tsa'ma tise tsu ingi vana'jen'choma an'bian. Nane ingi ñombi'ye'choma'qque tsu tiseja angacan. “Chiga tisema ma'ppipa iñaccaensi vana'jen” qquen gi in'jan'fa.

⁵ Tsa'ma ingi pañambipa in'jangae tsincomba gi tisema quiqquian'fa. Ingi egae tsincon'chone tsu tisema vanae. Tsa'caen tise vana'jensi ingija opatsse canse'fa. Ma'ppisi tise iñacca'cho tsu ingima ccushaen.

⁶ Poiyi'cco gi oveja'caen injanga ccani jacamba qque'fa. Ingi in'janqquia'caen gi injanga canse'fa. Tsa'ma Na'suja pa'cco ingi egae tsincon'cho shacama tisenga antte.

⁷ Tisema vanaemba egae tson'jen'fa'ni'qque tiseja afambi. Nane ovejama fi'ttiye angaqquia'caen tisema angasi oveja tosema chattuye tson'jensi ziyaqquia'caen tiseja afambi.

⁸ Tiseja ño'a'ma egae tsincon qquen supa me'i'on tsu majan tisene afapa fuiteya'chove. Majañi'qque tise naniña'chove in'jan'fambi. Nane va ande'ye tisema itsapa ña ande'su aindeccu pañambipa egae tsinconsi tsane tisema fi'tti'fa.

⁹ Minguite'qque tiseja egae tsincombi. Ni tise aya'fa'ye egae afa'choja sombombi. Tsa'ma egae tsinconsundeccui'ccu fae'ngae tisema a'tu'fasi tsu ricondeccui'ccu fae'ngae tiseja ccui.

¹⁰ Nane Na'suja in'jamba tsu tisema dañomba vanae. Egae tsincon'chone afe'chove tisema tson'ni'qque can'jemba jai'ngae tise dutssiyendeccuma atteya. Nane Na'suja tisei'ccu tisu in'jan'choma ñotsse nanitsse tsoña.

¹¹ Injama'choni tsain'bitsse vana'jemba tsu ccase qquendyapa cansepa avujatssiya. Na'suma ño'an shondo'suja tsa'caen atesupa tsain'bio a'ima ccushaemba ño'ame tsomba tise'pa egae tsincon'choma angapa catiya.

¹² Tise tsa'caen tsonsi Chigaja tisema joccapitssia've tsoña cuintsu ti'tsse mandasundeccui'ccu fae'ngae patsu'faye. Nane tiseja fi'tti'chonga afeyepa faesu egae tsincon'su tsu, qquen su'fa. Tsa'ma ñoa'me tsain'bio aindeccu egae tsincon'choma anga tsendeccune Chigama iñajamba ñoquiañe.