Isaías 52 - Cofán: Chiga Tevaen'jen

Jerusalénma ccushaeña'cho

⁷ Ñocca'tsse tsu attian ñotsse condase'choma ipa ccotta'cco'ye buttopa jiña'su. Nane opatsse canseya'cho aya'fama tsu i. Na'su Chiga ingima ccushaen'chone condasepa tsu Ziónga conda: “¡Que Chigaja Na'su tsu!”

⁸ ¡Paña'faja! Na'su toequi Ziónga jiña'ninda tsu canqquema coirasundeccu tisu tso'fei'ccu tise ma'caen jiña'choma attepa avujatsse fundo'faya.

⁹ Nane Na'su tise aindeccuma mende'yepa Jerusalénma ccushaen'ninda tsu Jerusalén osuipa sheque'cho'qque jangipa fae'ngae avujatsse settapoen'faya.

¹⁰ Poi ande'su aindeccu caña'jen'ni Na'su tise oshacho'choma canjaensi tsu poi andesundeccu ingi Chiga ingima ccushaen qquen in'jan'faya.

¹¹ ¡Sombo'faja! ¡Babilonia'ñe sombo'faja, tsa que'i Na'su ettini jincho'choma anga'chondeccumbe ande'ye! ¡Nane jongoesu egama pporaembe'yi tisuma ñotsse coirapa sombo'faja Babilonia'ñe!

¹² Tsa'ma dyopa cunshoa'me butto sombo'faya'bi qui. Nane Na'su, Israel Chiga tsu poifanga que'ima ñotsse coirapa angacaña.

Na'suma shondo'suja patsuya'cho

¹³ Ñama shondo'suja ñotsse tsu tsoña. Tisema ti'tsse'tssia've tsonsi tsu ñoa'me joccapitssiya.

¹⁴ Nane tsain'bio a'i, tise camba'ju, tise ai'vo'qque ñoa'me dañongesi a'ia'caen attiambi attepa can'boen'faya. Tsa'ma tisema can'boenqquia'caen tsu

¹⁵ tise poi ande'su a'ima giyaensi avujatsse can'boen'faya. Nane ande nasundeccu'qque attepa afaye osha'faya'bi. Tayoe pañambi'choama tsu in'jan'faya.