Isaías 42 - Cofán: Chiga Tevaen'jen

Na'suma shondo'su

¹ “Va'tti tsu ñama shondo'su. Ñajan tisema ñambeve attufaemba angacamba quiñaen. Nane tisei'ccu gi avujatssi. Ña qquendya'pai'ccu tisema in'jaensi tsu poi ande'su aindeccuma ñotsse mandaya.

² Nane fundoya'bi ni quian'me afaya'bi. Tsaiquini sheque'chonga tise aya'fama pañaeña'bi.

³ Canttini'cco fentendecco'ccoama u'ccambitsseyi tansiaña. Ramparia paji'choma fi'ttimbitsseyi anchandaeña. Tansintsse tsomba tsu ñotsse manda'jeya.

⁴ Quimbiya'bi ni ñombi'yeya'bi poi andema ñotsse tansintsse mandaya'ngae. Nane mar'su anttepo'cho'su aindeccu'qque tise ñotsse mandaya'chove ronda'je'fa.”

⁵ Na'su Chigaja sefaccove agattoemba attajaen. Andema agattoemba tsa'ye sombo'chondeccuve'qque agattoen. A'ive'qque tsanga agattoemba qquendyaemba cansian. Qquen tsu tsaja tisema shondo'sunga su:

⁶ “Ña, Na'su gi quema ttu'sepa que tivema indipa fendeya cuintsu queja ccushaen'suve daye. Quema gi coiraya cuintsu queja ña aindeccui'ccu injancco'choma canjaemba cca'indeccuma'qque chanjienqquia'caen in'jaeñe.

⁷ In'jan gi cuintsu queja binindeccuma attiamba indiyendeccuma'qque ccushaeñe. Nane indiyepa sinttia'ni can'jendeccuma qui in'jaemba ccushaeña.

⁸ Ña gi Na'su. Qquen tsu ña inise. Antteya'bi gi que'i ñanga afaqquia'caen faesuma tsa'caen ñotsse afa'faye. Nane se'piya gi que'i ñama iñajambipa ñoña'cho chigandeccuma iñajan'faye.

⁹ Ña tayoe suqquia'caen tsu ja'ño tsa'caen tson. Nane ja'ño gi cuna tsoña'chove condaya cuintsu toya tsombi'te que'i tsane in'jan'faye.”