Isaías 29 - Cofán: Chiga Tevaen'jen

Jerusaléndeccu injanga canse'cho

¹³ Toya'caen Na'su Chigaja ñanga qquen su: “Va aindeccu aya'fai'ccu ñame in'jan qquen su'fa. Nane tise'pa su'choi'ccu ñanga ñotsse afa'fa. Tsa'ma tise'pa injama'choni ñama chi'ga'fa. A'i in'jamba afa'choma pañamba tsa'caen afa'fa ñama iñajañe. Nane in'jambe'yi injanga afa'choi'ccu afa'fa.

¹⁴ Tsa'cansi gi ccase osha'cho ña canjaen'choma canjaeña cuintsu va aindeccu bo'yo'e dapa camboen'faye. Nane ña ti'tsse'tssiama attepa tise'pa ñotsse tson qquen in'jan'cho tsu pasaya. Tise'pa'su injama'pandeqquia in'jamba in'jan'cho'qque tsu pasaya.”

¹⁵ Va'cha tsu “A'tusija Na'su ñama atteya'bi” qquen in'jan'chondeccu. Nane asi'ttaemba tise'pa tsoña'choma ñoñamba “Chigaja tsama atesumbi” qquen tsu in'jan'fa. Toya'caen egae tsincomba “Chigaja tsama attembi” qquen tsu in'jan'fa.

¹⁶ Ñoa'me sumbie da'chondeccu tsu. Nane apicha tisema ñoña'sui'ccu fae'ngatssi qquen in'janqquia'caen sumbi tsu. Ñoñage'cho tisema ñoña'sunga “Queja ñama ñoñambi” qquen suya'bi. Toya'caen apichaja pi'pi'sunga “Queja apichama pi'piye atesumbi” qquen suya'bi.