Isaías 11 - Cofán: Chiga Tevaen'jen

Isaí omba'su dutssi'ye mandaya'cho

¹ Shoyo'cho quini'cco setsa'cho'ye sho'yoqquia'caen tsu tiseja Isaí omba'su dutssiyendeccu'ye attiaña.

² Na'su Chiga Qquendya'pa tsu tisei'ccu tsangae can'jemba in'jaeña cuintsu osha'choma atesupa in'jañe. Qquendya'pa can'jensi tiseja cca'ima ñotsse in'jaemba tansintsse mandapa Na'su Chigama ñotsse in'jamba dyoe'sui'ccuyi paña'jeña.

³ Tiseja jo'su tso'fei'ccuyi camba ni tsosinai'ccuyi pañamba in'jamba afaya'bi.

⁴ Tsa'ma tansintsse mandapa ñoquimbindeqquia'ma fuiteya. Tise ande'su va'chandeccu injan'jeña'cho itsayesa'ne'qque coiraya. Tise afa'choja quini'ccoa'caen egae tsinconsundeccuma ma'ppiya. Nane tise aya'fai'ccu ufa'choja egandeqquia'ma fi'ttiya.

⁵ Ñotsse manda'cho, tansintsse su'cho'qque tise ondiccu'je'caen fae'ngae tisei'ccu jincho'fa mani jacan'ni'qque.

⁶ Tsequi a'ta putsa'su ain, oveja du'shui'ccu fae'ngae opatsse canse'faya. Toya'caen ttesi, chivo du'shui'ccu fae'ngae ana'jen'faya. Nane vaura du'shu, cuvottesi'qque fae'ngae coen'faya. Toya'caen tsu antte'faya a'i du'shu cuintsu tise'pama coirapa angacañe.

⁷ Vaura, oncomari'qque fae'ngae jacansi tise'pa dushundeccu fae'ngae ana'jen'faya. Cuvottesi'qque vaura'caen shoshovima an'jeña.

⁸ Du'shuja cofasi chango ji'ttini cofe'jeye'qque oshaya. Nane tise tivei'ccu sinsinsio changonga dyombi'tsse tsomiñe oshaya.

⁹ Me'i'on tsu jongoesu dañoqque'su ña in'jan'cho ccotta'cconi can'jeñe. Nane tsa'ccu marnga on'baqquia'caen Na'su Chigane in'jan'choja poi aindeccumbe injama'chonga on'baya cuintsu tise've in'jan'faye.

¹⁰ Banderama jangiansi a'i tsanga boqquia'caen tsu tsequi a'ta va Isaí setsa'cho'su shoyo'cho attiansi poiyi'cco a'i tisenga bo'faya. Nane poi ande'su aindeccu tsu tise've tta'tta'faya. Tise can'jeña'ttija tise a'tatssiai'ccu ñoa'me ñotssiya.

Ccani anga'chondeccu toequi ji'cho

¹¹ Toya'caen tsequi a'ta Na'suja tise Osha'choma Oshacho'choma canjaemba tise aindeccu'su toya tise've in'jan'chondeccuma ccase ttu'se boñaña. Nane Asiriani toya'caen Egiptonima ttu'se boñamba Patros, Etiopía, Elam, Sinar, Hamat toya'caen poi marni'su andenima'qque tise'pama ttu'sepa boñaña.