Isaías 1 - Cofán: Chiga Tevaen'jen

Judándeccu egae tsincon'cho

¹ Na'su Chiga tisema in'jaensi Amoz dutssi'ye Isaíasja Chiga Judáne toya'caen Jerusaléne su'choma afa. Nane Uzías, Jotam, Acaz toya'caen Ezequías Judá andema manda'je'fa'ni tsu Isaíasja Chiga Aya'fama afa.

² Sefacco, ande'qque Na'su su'choma paña'faja: “Dushundeccuma gi coeña coenzave daya'ngae. Tsa'ma tsendeccuja ñama pañambipa chi'ga'fa.

³ Sema'su vauraja tise na'suma atesu. Boro'qque tise'be na'su tsao'ña'choma atesu. Tsa'ma ña in'jan'cho israendeccuja Ñama atesumbipa ña tise'pama in'jan'choma'qque atesu'fambi.”

⁴ ¡Va'cha qui, egae tsinconsundeccu! Tsain'bio shacave qui andu'choma'caen andu'fa. Que'i yayandeccu egae tsincon'fasi que'i'qque in'jangae tson'jen'fa. Na'su'ye qui joqquitssi'fa. Nane Israel joccapitssia Chiga'ye attufapa qui tisema cati'fa.

⁵ Tsain'bitsse qui vana'jen'fa egae tsincon'chove tsoñe in'jamba. ¿Ma'caen gi que'ima ti'tsse vanaeña? Nane que'i ñoa'me quin'su me'chosi que'i tsove'qque pa'cco iñacca'chosi que'i ai'vo'qque manima ti'tsse iñaccaeña'chove me'i'on.

⁶ Tsovene tsu'ttepie ñotssiave jinchombipa qui pa'cco iñacca'cho, si'ma'cho, toya'caen tui'ccupa qui paji'fa. Tsa'ma majañi'qque que'ima se'jembi ni que'i iñacca'choma sarupai'ccu findimbi. Ni que'i iña'suma yayapai'ccu vuiquiambi.

⁷ Que'i ande a'i meniame dasi si'ngeja que'i canqquenga setsepa oque. Que'i caña'jen'ni tsu que'i enemigondeccu que'i jon'choma an'jen'fa. Nane Sodoma canqque ju'ru sefaqquia'caen que'i canqque a'i meniame da.

⁸ Tsa'caen dapa Ziónjan tai'je'cho pasasi tsajaccuma coira'su tsa'oa'caen osuipa barembi tsu, Nane pepinoma taisi pepinoccuma coira'su can'jen'cho'qque otta catiye. Toya'caen enemigondeccu ttupa ronda'jesi oshambiqquia'caen tsu Ziónjan oshambi.

⁹ Na'su Osha'choma Oshacho'cho Chiga ingi'su majandeccuma ccushaembiecan'da ñoa'me gi Sodoma, Gomorra canqque'su aindeqquia'caen metsse sefa'faye'can.

Chigama in'jamba iñajan'cho

¹⁰ ¡Sodoma nasundeqquiacan qui! Na'su que'inga su'choma paña'faja. ¡Gomorra canqquesundeqquiacan qui! Ñotsse paña'faja ingi Chiga que'ima atesiaña'choma.

¹¹ Na'suja su: “¿Jongoesie qui osha'cho afe'choma ñanga i'fa? Panshaen an'biamba gi que'i ovejama, vaura du'shu yayapama'qque oque oraen'fa'choma in'jambi. Nane vaura, oveja, chivo quitsaye anjampama'qque gi chi'ga.

¹² Que'ija jipa ñanga catse'fa. Tsa'ma ¿majan tsu que'ima ttu'se ña tsa'o'su atandunduni tsu'tsu jacan'faye?

¹³ Ti'tsse i'je'fajama que'i afe'je'cho barembi'choama. Tsama oque oraen'fasi tsu ñane'jan tssu'jutssi. Chiga ccaccove ancansi, sema'ma'quia a'ta ji'ninda qui aindeccuma ttu'se'fa cuintsu fiestaemba ñama iñajan'faye. Tsa'ma que'i tsa'caen fiestaen'an'qque toya egae tsincomba canse'ninda gi avujatssiya'bi.

¹⁴ Cose'su chiga ccaccove ancan'cho fiestama, toya'caen que'i fae'ngae bo'fa'choma'qque gi chi'ga. ¡Tsa'caen ñama noñangiansi gi tsane quimbi!

¹⁵ Que'i tivema yasapa ñanga iñajansi gi tsama cañe chi'gapa ccafanga piyi. Mapán bia'ave ñama iñajan'ni'qque gi ñajan que'ima pañambi.

¹⁶ ¡Tisuma cashi'faja! ¡Que'i egae tsincon'choma ccucha'faja! ¡Nane que'i egae tsincon'choma cati'faja ña attesa'ne! ¡Egae tson'jen'choma antte'faja!

¹⁷ ¡Ñotsse tsoña'chove atesu'faja! Pa'cco que'i quin'sui'ccu ñotssiama tson'faja. Nane va'chama fuitepa toya'caen tise yaya pasi isuya'choma se'pi'fajama. Tsandupajen'choma'qque fuite'faja faesu tise'bema cca'nasa'ne.”

¹⁸ Na'suja qquen su: “Ji'faja. Jinge que'i egae tsincon'chone condasecco'faye. Que'i egae tsincon'cho cutsse amundeqquia'caen que'ima daño'ni'qque gi me'tsse chandisu'ccoa'caen tototssia've que'ima giyaeña. Nane sarupa cu'a da'choma giya'tsse oveja tose'caen tototssia've tsonqquia'caen gi que'ima'qque tsa'caen giyaeña.

¹⁹ Que'i in'jamba ñama paña'da qui osha'cho va ande'su ñotssiama an'faya.

²⁰ Tsa'ma ñama chi'gapa pañambi'ta qui enemigondeccui'ccu geraemba pa'faya.” Tsa'caen tsu Na'suja su.