Éxodo 9 - Cofán: Chiga Tevaen'jen

Pa'cco egipto'su aiña'cho pa'cho

¹ Tsa'caen tsonsi Na'su Chigaja ccase Moisésnga su: —Faraónga japa qquen suja: ‘Qquen tsu Na'su, hebreondeccumbe Chigaja, quema su: Antteja ña aindeccuma cuintsu japa ñama iñajan'faye.

² Tise'pa jaye anttembipa toyayi que sepi'je'ninda

³ Na'su Chiga tsu tise oshacho'choma canjaemba que'i potreroni can'jen'cho aiña'choma ega paqque'sui'ccu da'ñoña. Nane tsa'caen tsonsi tsu que'i cavayo, boro, cameyo, vaura, toya'caen oveja'qque pa'faya.

⁴ Tsa'ma israendeccuja egiptosundeqquiacan'fambisi tsu Na'su Chigaja israe'su aiña'chondeccuma antte cuintsu fae'ccoyi'qque pambe can'faye.’

⁵ Toya'caen tsu Na'su Chigaja maqui tise tsoña'choma condapa su: —Tu'i gi tsa'caen tsoña.

⁶ Ccaqui a'ta Na'su Chiga tise suqquia'caen tsonsi pa'cco egipto'su aiña'cho pa'fa. Tsa'ma israendeccumbeja ni fae'ccoyi'qque pambitssi.

⁷ Tsama pañamba faraónjan manda cuintsu israendeccu aiña'choma japa can'ga'faye. Tsa'caen can'gapa tsu in'jan'fa ñoa'metsse fae'ccoyi'qque pambi'choa've. Tsa'caen atte'ma ti'tsse iyicca'yepa se'pipa israendeccu jaye anttembi.

Egiptondeccu ccomenzufave da'cho

⁸ Tsonsi Na'su Chigaja Moisés toya'caen Aarónga su: —Panme matssan'jen'cho'su cusepama pafu isupa faraóni jaja'faja. Tseni japa tsu Moisésja faraónga ccutsupa sefaningae cusepama gaiñaña'cho.

⁹ Gaiñasi tsa cusepa tsu vuvutsse dapa pa'cco tsa Egipto andenga japa pa'cco ccomenzufave atapaya. Tsonsi tsu aindeccu toya'caen pa'cco egipto'su aiña'cho'qque ccomenzufa'faya.

¹⁰ Tsama pañamba Moisés toya'caen Aarón panme matssan'jen'cho'su cusepama pafu isupa faraóni ja'fa. Tseni nepipa Moisésja tsa cusepama sefaningae gaiña. Tsa'caen gaiñasi aindeccu toya'caen tise'pa aiña'chondeccu'qque ccomenzufaveyi da'fa.

¹¹ Tsa'caen tsonsi mágicondeccu'qque Moisésnga catsepa tsa'caen tsoñe osha'fambi, nane tise'pa'qque egiptondeccupa tayo ccomenzufapa'fa.

¹² Tsa'ma Na'su Chiga faraónma in'jaensi iyicca'yepa se'pipa Moisés toya'caen Aarón su'choma pañambi ma'caen Moisésnga Na'su Chiga suqquia'caen.

Tsandapandaqui amppi'cho

¹³ Tsonsi Na'su Chigaja Moisésnga su: —Tu'ija sinte'yi jangipa japa faraónga suja: ‘Qquen tsu Na'su Chiga tsa hebreondeccumbe Chigaja quema su: Antteja ña aindeccuma cuintsu japa ñama iñajan'faye.

¹⁴ Nane ja'ñonda gi pa'cco ña vanaeqque'suma quenga, quema shondosundeccunga toya'caen que aindeccunga'qque moeña. Tsa'caen tsonsi qui in'jan'faya majañi'qque ña'can va andeni can'jembi'choave.

¹⁵ Nane pa'cco ña oshacho'choma canjaen'choecan'da qui tayo que, toya'caen que aindeccu'qque ega paqque'sunga sefa'faye'can.

¹⁶ Tsa'ma tsa'caen tsoñe in'jambipa gi antte cuintsu que'i toya cansepa ña oshacho'choma attepa vana'jensi poi ande'su aindeccu pañamba ñajan osha'choma oshacho qquen in'jan'faye.

¹⁷ Tsa'camba qui tsa'caen tson'ni'qque toya sepi'je ña aindeccuma moeñe.

¹⁸ Que'i tsa'caen in'jan'ninda gi tu'ija qquia'ni mandaya cuintsu rande tsandapandaqui amppi'faye. Nane tseyi Egipto andeve ashaente ja'ñoa'ngae tsa'cantssi tsandapandaqui amppimbi.

¹⁹ Tsa'cansi poiyi'ccoma mandaja cuintsu osha'cho tise'pa aiña'cho potreroni can'jen'choma ipa ettinga ca'nia'faye. Tsambi'ta tsu tsandapandaqui amppipa poiyi'cco a'i toya'caen tise'pa aiña'cho tsoteni can'jen'choma fitti'ttiya.’

²⁰ Tsa'caen Na'su Chiga susi pañamba dyopa majan faraónma shondosundeccuja tise'pambe semasundeccu toya'caen tise'pa aiña'choma'qque tsa'onga ca'nia'fa.

²¹ Tsa'ma majandeccuja ñoa'me su'cho qquen in'jambipa injanga tsoteni an'bian'fa.

²² Tsonsi Na'su Chiga Moisésnga su: —Que tivema Chiga sefacconingae yasaja cuintsu pa'cco Egipto andeni poi aindeccunga, poi aiña'chonga toya'caen poi nasipanga'qque tsandapandaqui amppiye.

²³ Tsa'caen mandasi Moisésja tise tivema sefacconingae yasasi Na'su Chigaja tsandama afaen. Nane tsanda veyaemba afasi tsandapandaquija pa'cco Egipto andenga amppi'fa.

²⁴ Tsandapandaqui tsa'caen amppi'jesi tsanda'qque veyaemba oque'je. Nane tseyi Egipto andeve ashaente ja'ñoa'ngae tsa'cantssi tsandapandaquija amppipa cansembi.

²⁵ Tsa'caen tsu tsandapandaquija pa'cco egipto andeni osha'cho jinchoma metsse sefaen. Nane aindeccu, tise'pa aiña'cho toya'caen pa'cco tise'pa nasipama'qque metsse sefaen. Toya'caen pa'cco tsa ande'su quini'jima ucca'sho sefaen.

²⁶ Mapán tsa'caen da'je'ni'qque israendeccu can'jen'cho Gosén andenijan ni fae tsandapandaquiyi'qque amppimbi.

²⁷ Tsonsi faraónjan Moisés toya'caen Aarónme ttu'senga'faye manda. Tise'pa jisi qquen su: —In'jan gi ña egae tsincon'choma. Nane ña, toya'caen ña aindeccu gi shacapa'fa. Na'su Chigaja shacapambi tsu.

²⁸ Panshaen tsu tsanda toya'caen tsandapandaqui ingima vanae'jen. Tsa'cansi gi ti'tsse que'ima sepi'jeye in'jambi. Nane Na'su Chigama ingine iñajansi gi que'i jaye antteya.

²⁹ Tsonsi Moisésja su: —Pan va canqque'ye sombopa japa gi ña tivema sefaningae yasapa Na'su Chigama iñajaña. Tsonsi tsu tsandapandaquima pasaemba tsandama'qque pasaeña cuintsu que'i pa'cco va andeja Na'su Chigambe qquen in'jan'faye.

³⁰ Tsa'ma ñanda gi atesu ni que toya'caen quema shondosundeccu'qque toya qui Na'su Chiga Quitsama dyo'fambi.

³¹ Tsandapandaqui tsa'caen amppipa tsu lino sarupave ñoñaqque'su shoshovi toya'caen cebada panme ñoñaqque'su shoshovima metsse chapian cati. Nane cebadaja tayo na'jen'cho toya'caen lino tayo teta'je'cho tsu tsa'caen sefa.

³² Tsa'ma trigo toya'caen panme ñoñaqque'su centenojan mingae dambe'yi pasa jai'ngae sho'yo'chopa.

³³ Faraóin'ccu afa nanimba Moisésja tsa canqque'ye sombopa tise tivema Na'su Chiganga yasapa iñajan. Tse'faei'ccuyi tsandapandaqui, unjin toya'caen tsanda'qque ziya.

³⁴ Tsa'ma faraónjan tsa'caen unjin, tsandapandaqui toya'caen tsanda'qque pasasi attepa ccase egae tsincoñe ashaen. Nane jo'su tise'yi se'pipa iyicca'yembi tsa'ma tisema shondosundeccu'qque tsa'caen iyicca'ye'fa.

³⁵ Faraónjan tsa'caen se'pipa iyicca'yepa israendeccu jaye anttembi ma'caen Na'su Chiga tayoe Moisésnga suqquia'caen.