Éxodo 8 - Cofán: Chiga Tevaen'jen

¹ tsu Na'suja Moisésnga qquen su: —Ccase faraónga japa qquen suja: ‘Qquen tsu Na'su Chigaja quema su: Antteja cuintsu ña aindeccu japa ñama iñajan'faye.

² Nane tise'pa jaye anttembiya'da gi sapoi'ccu pa'cco que andema vanaeña.

³ Pa'cco na'en tsu sapoveyi goa'ttisi tsa'ye sombopa que tsa'onga ca'ni'faya. Ca'nimba tsu que anambaccuni, que ana'jen'chonga, quema shondosundeccumbe tsa'onga, que aindeccu tsa'onga toya'caen quembe panma mandyi'je'cho shavoccu, quembe panme matssan'jenccunga'qque ca'ni'faya.

⁴ Nane sapoyi tsu buttotto'o shequeya que'ye, quema shondosundeccu'ye toya'caen poiyi'cco que aindeccu'ye'qque.’

⁵ Ccase tsu Na'su Chigaja Moisésnga su: —Aarónma mandaja tise accuicco'choma isupa tivema yasaye poi na'enga, poi nai'qui, singu'ccunga'qque cuintsu tsa'ye sapoyi sombopa pa'cco Egipto andenga on'baye.

⁶ Tsa'caen mandasi Aarón poi Egipto'su na'enga yasasi tsa'ye sombopa pa'cco andenga sapoyi on'ba.

⁷ Tsa'ma egipto'su mágicondeccu'qque tise'pa mágicoi'ccu tsa'caeñi tsomba pa'cco egipto andenga sapoveyi i'fa.

⁸ Tsama attepa faraónjan Moisés toya'caen Aarónme ttu'senga'faye manda. Tise'pa jisi qquen su: —Na'su Chigama iñajan'faja cuintsu ña'ñe toya'caen ña aindeccu'ye sapoma joqquitssiañe. Tsa'caen tsonsi gi que aindeccuma antteya cuintsu japa Na'su Chiganga oque oraemba afe'faye.

⁹ Tsama pañamba Moisésja su: —Ñanga condaja minga'ni ña quene, quema shondosundeccune toya'caen que aindeccune'qque iñajañe qui in'jan cuintsu sapo que'ye toya'caen que tsa'o'ye joqquitssisi jo'su na'emeñi can'jeñe.

¹⁰ Tsonsi faraónjan su: —Tu'iyi iñajaña'chove gi in'jan. Tsonsi Moisésja su: —Tsa'caen tsu tsoña faesu ingi Na'su Chiga'can'me me'i'on qquen que in'jañe.

¹¹ Pa'cco sapo tsu que tsa'o'ye jasi jo'su na'emeñi can'jeña. Ti'tsseja quema, ni quema shondosundeccuma, ni que aindeccuma noñangian'jeña'bi tsu.

¹² Tsa'caen supa Moisés toya'caen Aarón faraón tsa'o'ye sombopa ja'fa. Japa Moisésja Na'su Chigama iñajan cuintsu tise faraónga moe'cho sapoma joqquitssiañe.

¹³ Moisés iñajansi Na'su Chiga tsa'caen tsonsi pa'cco sapo tsaoni sheque'cho, atandunduni sheque'cho toya'caen nasipani sheque'cho'qque pa'cco pa'fa.

¹⁴ Tsa'caen pa'fasi aindeccu taipa boña'fasi pa'cco ande tssu'jutsse da.

¹⁵ Tsa'ma tsa'caen tise vana'jen'choma vuiquiansi faraónjan ccase iyicca'yepa se'pipa Moisés toya'caen Aarón su'choma pañañe in'jambi ma'caen Na'su Chiga suqquia'caen.

Pa'cco ocuveyi da'cho

¹⁶ Na'su Chigaja ccase Moisésnga su: —Aarónma mandaja tise accuicco'choma isupa tsai'ccu ande'su sisipama ochhaiye cuintsu tsa'ye pa'cco Egipto andenga ocuveyi daye.

¹⁷ Tsa'caen tsu tson'fa. Aarón tise accuicco'choi'ccu ande'su sisipama ochhaisi pa'cco egipto'su sisipaja ocuve dapa poiyi'cco aindeccu toya'caen tise'pa aiña'chondeccuma'qque sutsa'je'fa.

¹⁸ Tsonsi mágicondeccu'qque tise'pa mágicoi'ccu tsa'caen tson qquen tson'ma osha'fambi. Tsa'caen tson'jen'fa'ni toya tsu ocuja poi aindeccuma toya'caen aiña'choma'qque sutsa'je'fa.

¹⁹ Tsa'caen dasi mágicondeccuja faraónga su'fa: —Vata tsu Chiga tson'cho. Tsa'ma faraónjan iyicca'yepa se'pipa tsa'caen tson'choma in'jambi ma'caen Na'su Chiga suqquia'caen.

Pa'cco tenqquen'choveyi da'cho

²⁰ Na'su Chiga ccase Moisésnga su: —Tu'ita tsu faraónjan sinte'yi naeni andeya. Tsa'cansi toya cose'yi jangipa japa ronda'jepa qquen suja: ‘Qquen tsu Na'su Chigaja quema su: Antteja cuintsu ña aindeccu japa ñama iñajan'faye.

²¹ Nane tise'pa jaye que anttembiya'da gi quenga, quema shondosundeccunga, que aindeccunga toya'caen pa'cco tise'pa tsa'onga'qque tenqquen'choveyi moeña. Poi egiptondeccumbe tsa'onga tsu tenqquen'choyi on'baya. Pa'cco ande'qque tsu tenqquen'choveyi daya.

²² Tsa'ma tsa'caen da'je'ni'qque ña aindeccu can'jen'cho Gosén andenijan ni fae tenqquen'choyi'qque jaya'bi. Tsa'caen tsonsi qui in'jaña ñajan Na'su Chiga va andeni can'jen'chove.

²³ Nane ña aindeccuja que aindeqquia'cambi qquen canjeñe gi tsa'caen tsoña. Tu'i gi tsa'caen tsoña.’

²⁴ Ccaqui a'ta Na'su Chiga tise suqquia'caen tsonsi tenqquen'cho'ja unjimba'ccoacan'tsse jipa faraón tsa'onga ca'ni. Toya'caen tisema shondosundeccumbe tsa'onga, nane pa'cco Egipto andenga tsa'caen da. Tenqquen'choja tsa'caen bopa pa'cco andema da'ño.

²⁵ Tsonsi faraónjan Moisés toya'caen Aarónme ttu'senga'faye manda. Tise'pa jisi qquen su: —Japa que'i Chiganga oque oraemba afeja. Tsa'ma va ande'ye sombombe'yi can'faja.

²⁶ Tsa'caen susi Moisésja su: —Ingi tsa'caen tsoñe'jan ñotssimbi tsu. Nane ingi fi'ttipa, Na'su, ingi Chiganga afe'je'chota tsu egiptondeccu chiga qquen injan'jen'cho. Tsa'cansi ingi tsa tise'pa chiga qquen injan'jen'choma fi'ttipa, Na'su, ingi Chiganga afesi atte'ta tsu egiptondeccu iyicca'yepa ingima patui'ccu ttova'ccoen fi'tti'faya qquen gi in'jan.

²⁷ Tsa'cansi tsu tres a'ta pa'cco a'i menia japa tseni fi'ttipa oque oraemba ingi Na'su Chiganga afeya'cho tise suqquia'caen.

²⁸ Tsa'caen susi faraónjan su: —Antteya gi que'i a'i menia japa Na'su que'i Chiganga oque oraemba afe'faye. Tsa'ma in'jambi gi que'i panshaen biani ja'faye. Toya'caen ñane'qque que'i Chigama iñajan'faja.

²⁹ Tsa'ma Moisésja su: —Ñoa'me sombopa jayipa gi Na'su Chigama iñajaña cuintsu tu'ija que'ye, quema shondosundeccu'ye toya'caen que aindeccu'ye'qque tenqquen'choma joqquitssiañe. Tsa'ma aqquia israendeccu, Na'su tise'pa Chiganga oque oraemba afe'faye moeña'caen afopoen tsinconjama.

³⁰ Tsa'caen supa Moisés faraón tsa'o'ye sombopa japa Na'su Chigama iñajansi

³¹ Chigaja Moisés iñajanqquia'caen tson. Nane tenqquen'choma tsu joqquitssian faraón'ñe, tisema shondosundeccu'ye toya'caen tise aindeccu'ye'qque. Nane ni fae tenqquen'choyi'qque jinchombitssi.

³² Tsa'ma tsa'caen joqquitssiansi faraónjan ccase iyicca'yepa se'pipa israendeccu jaya'chove anttembi.