Éxodo 7 - Cofán: Chiga Tevaen'jen

⁴ Faraónda tsu que'i su'choma pañaña'bi. Tsa'ma ña gi pa'cco ña oshacho'choma Egipto andenga ttova shequianqquia'caen canjeña. Nane ñoa'me egae daqque'sui'ccu gi egiptondeccuma dyoñamba ña sundarondeccuma somboeña, tsa Israel ña aindeccuma.

⁵ Tsa'caen ña oshacho'choma Egiptoni canjaemba, israendeccuma somboensi tsu ñama Ñoa'me Na'su qquen egiptondeccuja in'jan'faya.

⁶ Moisés toya'caen Aarónjan pa'cco ma'caen Na'su tise'pama mandaqquia'caen tsu tson'fa.

⁷ Tsa'caen faraóin'ccu afajei'te Moisésja ochenta canqque'fave an'bian. Toya'caen Aarónjan ochenta y tres canqque'fave an'bian.

Aarón accuicco'cho

⁸ Na'su Chigaja Moisésnga Aarónga'qque su:

⁹ —Faraón canjaen'chove que'ima iñajan'ninda Aarónma suja cuintsu tise accuicco'choma isupa faraón dyai'tti'su andenga ttova ccuiñañe cuintsu iyove daye.

¹⁰ Tsa'caen susi pañamba Moisés toya'caen Aarón faraóni japa Na'su Chiga tise'pama mandaqquia'caen tson'fa. Aarón tise accuicco'choma faraón toya'caen tisema shondosundeccu caña'jen'ttinga ttova ccuiñasi tsa accuicco'choja iyove da.

¹¹ Tsa'caen tsonsi attepa faraónjan manda cuintsu tise atesu'cho injama'pandeqquia toya'caen tise mágicondeccuma'qque ttusengaye. Tsendeccu jipa tise'pa mágicoi'ccu tsa'caeñi tson'fa.

¹² Nane poiyi'cco tsendeccu tise'pa accuicco'choma andenga ttova ccuiñasi iyove da'fa. Tsa'ma Aarón iyove da'cho accuicco'cho tsu tsendeccumbe iyoma poiyi'ccoma an.

¹³ Tsa'caen tsonsi attepa faraónjan iyicca'yepa ñoa'me se'pipa tise'pa su'choma pañañe in'jambi, Na'su Chiga ma'caen suqquia'caen.

Pa'cco anjampaveyi da'cho

¹⁴ Omboe Na'su Chigaja Moisésnga su: —Faraónda tsu ñoa'me iyicca'yepa se'pi cuintsu israendeccu sombombe'yi can'faye.

¹⁵ Tsa'ma tu'ija sinte'yi japa ronda'jeja na'en otafani tise andesi atteye. Tsa accuicco'cho iyove da'je'choma angaja.

¹⁶ Cachuipa qui qquen suya: ‘Tsa Na'su Chiga, hebreondeccumbe Chiga tsu ñama moe quenga qquen suye: Antteja cuintsu ña aindeccu japa a'i menia ñama iñajan'faye. Tsa'ma vama'qque que pañambian'da

¹⁷ qquen tsu Na'su Chigaja su: ¡Ja'ño qui ñama atteya ñajan ñoa'me Na'suve! Na'su tsa'caen susi ña tiveni isu'cho accuicco'choi'ccu na'en'su tsa'ccunga ochhaisi tsu pa'cco tsa'ccu anjampaveyi daya.

¹⁸ Tsa'caen dasi tsu avu'qque pa'faya. Toya'caen na'en'qque tssu'jutsse dasi poiyi'cco egiptondeccu tsa'su tsa'ccuma cui'ye chi'ga'faya.’

¹⁹ Toya'caen tsu Na'su Chigaja Moisésnga su: —Toya'caen Aarónma mandaja cuintsu tise accuicco'choma isupa tise tivema yasaye egipto'su na'en, nai'qui, singu'ccu toya'caen ma'ttini tsa'ccuma ccutsian'chonga cuintsu pa'cco anjampaveyi daye. Nane poi tasa majan quini'ccoma ñoña'cho toya'caen majan patuma ñoña'chonga'qque anjampayi tsu ccutsuya.

²⁰ Moisés toya'caen Aarón tsu Na'su Chiga mandaqquia'caen tson'fa. Aarónjan tise accuicco'choma isupa faraón toya'caen tisema shondosundeccu caña'jen'ni na'en'su tsa'ccuma ochhaisi pa'cco tsa'ccu anjampaveyi da.

²¹ Tsa'caen dasi tsu poi avu pa'fa. Toya'caen na'en'qque tssu'jutsse dasi egiptondeccuja tsa'su tsa'ccuma cui'ye osha'fambi. ¡Nane pa'cco Egipto ande'su tsa'ccu tsu anjampaveyi da!

²² Tsa'ma Egipto'su mágicondeccu'qque tsa'caeñi tson'fa tise'pa mágicoi'ccu. Tsa'caen tson'fasi faraónjan ñoa'me iyicca'yepa se'pipa Moisés toya'caen Aarón su'choma pañañe in'jambi Na'su Chiga ma'caen suqquia'caen.

²³ Faraónjan tsane mingae'qque asi'ttaembe'yi tisu tsaoni ja.

²⁴ Toya'caen poiyi'cco egiptondeccu tsu na'en otafama posove dyan'dyaya'cho cuintsu giya'tssia tsa'ccu somboye. Nane na'en'su tsa'ccumajan cui'ye osha'fambi.

Pa'cco sapoveyi da'cho

²⁵ Na'su Chigaja na'ema ochhai'cho siete a'ta pasasi