Éxodo 40 - Cofán: Chiga Tevaen'jen

Cachuicco'je'ttive ccutsian'cho

¹⁶ Nane Moisésja pa'ccoma Na'su Chiga tisenga mandaqquia'caen nanitsse tson.

¹⁷ Tsa'caen tson nanisi tsu tise'pa Egiptone sombo'cho fae canqque'fa pa'cco nepipa segundo canqque'fave ashaen. Nane primer ccovu'su primer a'tanga tsu Chigai'ccu cachuicco'je'cho carpave ccutsian'fa.

¹⁸ Tsequi a'ta Moisés ccutsiañe mandasi tsu ttuccu'su mesama ccutsiaña'chove o'tie ccuiña'fa. Ccuiñamba tsanga ttuya'cho mesama ccutsiamba ottaen'fama ejijian'fa ancaeñe. Tsa'caen tsomba tsu etticcu'cho'su dyaiña'choma'qque dyaiña'fa.

¹⁹ Tsa'caen ñoñamba pa'cco ombanga tsu carpama oppoen'fa. Toya'caen tsambe ombanga chhariccotssia ttonoma oppoen'fa Na'su Chiga Moisésnga mandaqquia'caen.

²⁰ Pa'cco Chigai'ccu cachuicco'je'tti'su carpama ccutsiansi tsu Moisésja Chiga a'i'ccu injancco'fa'chove canjaen'cho cafonga ppiña Chiga manda'choma tevaen'cho patufin'dima. Tsama ppiñamba tsu angaqque'su quini'ccoma ejiamba corima ñoña'cho piccofin'di'ccu picco.

²¹ Tsa'caen ñoñamba manda Chigai'ccu cachuicco'je'tti'su tsutopani'su cuartonga ca'niañe. Ca'niamba tsu manda dusiañe tsa cuarto'su sarupa picco'je'choma. Toya'caen tsu Chiga a'i'ccu injancco'fa'chove canjaen'cho cafonma oppoen (majan camba attesa'ne) Na'su Chiga mandaqquia'caen.

²² Omboe tsu manda cuintsu cori mesama Chigai'ccu cachuicco'je'ttinga ccutsiañe picco'je'cho sarupambe pporotsse tsotefa'su tansinfanga.

²³ Tsa mesa ombanga tsu panma tansintsse fae'ngatsse ccuiña Na'su can'jen'ttinga Na'su Chiga mandaqquia'caen.

²⁴ Toya'caen tsu cori tuñoma ccutsian'jen'cho mesama isevetsse ccutsian. Tsama'qque picco'je'cho sarupambe pporotsse tsotefa'su pavefanga.

²⁵ Ccutsiamba tsu tuñoma setsaen Na'su can'jen'ttinga Na'su Chiga mandaqquia'caen.

²⁶ Toya'caen tsu corima ñoña'cho oque oraen'jen'choma ccutsian Chigai'ccu cachuicco'je'ttinga. Tsama'qque picco'je'cho sarupambe pporotsse ccutsian.

²⁷ Ccutsiamba tsanga ñome'bama oque oraen Na'su Chiga mandaqquia'caen.

²⁸ Pa'cco tsama ca'niamba ccutsiansi tsu Moisésja picco'je'cho sarupama dusiañe manda carpa tsa'o sombo'ttinga.

²⁹ Tsama dusiansi manda oque oraen'choma oque'je'chove ccutsiañe Chigai'ccu cachuicco'je'tti'su sombo'ttimbe tsotefanga. Tsanga tsu vaura, oveja toya'caen trigo afe'choma'qque Na'su Chiga mandaqquia'caen oque oraen'fa.

³⁰ Toya'caen oque oraen'choma oque'je'cho Chigai'ccu cachuicco'je'tti'ccu enttingenga tsu osha'choma cashije'chove ñoña'cho bandejama ccutsian. Ccutsiamba tsanga tsa'ccuma on'boen'fa.

³¹ Tsa'suma tsu Moisés, Aarón toya'caen Aarón dutssiyendeccuja ichhoi'fa tise'pa tivema otishiye toya'caen tise'pa tsu'ttema cashiye.

³² Tsa'caen tsu tson'fa maqui Chigai'ccu cachuicco'je'ttinga ca'niñe toya'caen maqui oque'je'chonga catseye. Nane Na'su Chiga Moisésnga mandaqquia'caen tsu tson'fa.

³³ Osefa'poe Chigai'ccu cachuicco'je'tti toya'caen oque'je'chombe atandunduma shoquendi'e ttu'fa sarupa ttuccuve. Ttuccu sombo'ttive tsu sarupa picco'je'choma dusian'fa.

Chiga can'jen'cho unjimba'cco

³⁴ Moisés osha'chove ñoñasi Chiga can'jen'cho unjimba'cco tsu Chigai'ccu cachuicco'je'ttima picco. Toya'caen tsu Na'su Chigambe ñotssiaja enttinge'su Chigai'ccu cachuicco'je'cho'su cuartonga on'ba.

³⁵ Tsa'caen piccopa Chiga ñotssiai'ccu Chigai'ccu cachuicco'je'cho'su cuartonga on'basi Moisésja Chigai'ccu cachuicco'je'ttinga ca'niñe oshambi.

³⁶ Tsa'camba unjimba'cco maqui Chigai'ccu cachuicco'je'tti'ye jangi'ninda tsu israendeccu'qque tise'pa carpama onccamba tsaiqui'ye tsui ja'fa.

³⁷ Tsa'ma tsa unjimba'cco jangimbi'ninda tsu toe tise'pa carpani can'jen'fa. Can'jemba ronda'je'fa maqui a'ta unjimba'cco jangiya'ngae.

³⁸ Nane tsa'caen tsu tson'fa poi israendeccu'su jacan'cho canqque'fa. Poiyi'cco israendeccu tsu poi a'ta Na'su Chiga unjimba'ccoma atte'fa Chigai'ccu cachuicco'je'ttimbe ombama. Toya'caen tsu poi cose ombanga si'ngema atte'fa.