Éxodo 35 - Cofán: Chiga Tevaen'jen

Ño'faya'cho a'tane manda'cho

¹ Moisésja poiyi'cco israendeccuma boñamba qquen su: “Na'su Chiga tsu ñanga mandapa qquen tson'faya'chove su:

² Nane seis a'tayi tsu semaña'cho. Tsa'ma septimo a'ta tsu que'i Chigama iñajaña'cho a'ta. Tsequi a'ta tsu ñoa'metsse ño'faya'cho a'ta Na'su Chiga anttepa ño'fa'choma injan'jeñe. Majan tsequi a'ta sema'ninda tsu fi'ttiya'cho.

³ Nane mani que'i canse'a'qque ni si'ngeveyi'qque oque'fajama tsequi ño'faya'cho a'ta.” Toya'caen Na'su Chigaja tise can'jeña'cho carpave ti'tsse conda: Pa'cco que afe'cho tsu ña can'jeña'cho carpa tsa'ove naniña'cho. Tseni gi ñajan que'i'ccu can'jeña. Va carpa tsa'omanda tsu ai'yembe battiya'chove naniña'cho tisupa mani jayipa ai'yembe battiaña'chove. Toya'caen tsayita qui ma'ttinga in'jan'da ai'yembe ccutsian'faya. Tsa carpa tsa'o, toya'caen osha'cho tsani jincho'choma tsu ñoa'me ñotsse ñoñaña'cho ña agattopa mandaqquia'caeñi. Nane trece metro enttinge bia'su, cuatro metro enttinge attaja'su toya'caen cuatro metro enttinge sefa'su. Tsambe utufamajan mesai'ccu tsu ccutsu'chove ttuya'cho. Tsa'ma fae etticcu'chomajan sarupai'ccu tsu ttuya'cho cinco dyaipa'chove dyaiñamba. Tsefaya tsu sombo'tti. Cuatroyijei'ccu oppoen'cho tsa'o tsu. Nane o'tie oppoen'chota tsu totoa lino sarupa. Tsani tsu sefacconi'su shondosundeqquia'caen iroi'ccu uga'cho jin. Tsambe ombanga tsu chivo tosema otata'choma oppoen'fa. Tsambe ombanga oveja ttonoma cu'ave ojoemba setsaen'choma oppoen'fa. Ombanga ñoa'me anttepaveja ñotssia chhariccotssia ttonoma setsaen'choma oppoen'faya'cho. Tsa carpa tsa'ota tsu dos cuartove ñoña'cho. Nane ttuccu enttingenga tsu cuatro cori'ccu onccan'cho dyaipa'chove dyaiñamba tsanga sarupai'ccu dusiamba ttu'cho, enttinge'su cuartove piccoye. Tsa enttingeni'su cuarto tsu ñoa'me Chigai'ccu cachuicco'je'cho cuarto. Tseccuni tsu ccutsu ñotssia quini'ccoma ñoña'cho cafon. Tsa cafon tsu cori'ccu pa'ccoma oppoen'cho. Tsanga tsu manda'chove tevaen'cho patufin'dima ñoñamba an'bian'fa. Tsa cafonma picco'je'chota tsu pa'cco coriyiya'cho. Toya'caen tsanga tsu ñoñaña'cho dos sefacconi'su shondosia'caen corima ñoña'chove. Tsa sefacconi'su shondosundeccuve ñoña'chota tsu cambajunaccu ccaru dyaipa corima ñoña'cho piccofin'dima camba tise'pa sanccopai'ccu tsa corima ñoña'cho piccofin'dima oppoencho'faya'cho. Tsa cafon tsu Chiga a'i'ccu injancco'fa'chove canjaen'cho cafon. Chigama afa'su na'suja tsa piccofin'dinga tsu Chiganga afe'cho'su anjampai'ccu bitssaeña'cho cuintsu ña mendeyepa aindeccu egae tsincon'choma joqquitssiañe. Nane tsambe omba'ye gi pa'cco ña in'jan'choma afapa israendeccuma manda'jeya. Faesu cuarto, sombo'tti pporotsse jincho tsu Chiganga catse'je'cho cuarto. Tsa cuartombe tansinfanga tsu cori'ccu oppoen'cho mesama ccutsiaña'cho. Tsanga tsu doce panme ottaeña'cho; fae pan tsu fae israelnaccuve canjaen'cho. Nane tsa pan tsu doce Jacob dutssiyendeccuve canjaen'cho. Tsa cuartombe pavefa'su, mesa isevetsse, tsu corima ñoña'cho tuñoma setsaen'jen'choma ccutsiaña'cho. Toya'caen Chigai'ccu cachuicco'je'cho cuartoma picco'je'cho sarupa jin'ttinga tsu Chiganga afe'je'chove corima ñoña'choma ccutsiaña'cho. Tsanga tsu ñome'bama oque'jeya'cho. Pa'cco tsa jincho'cho tsu Chiganga catse'jeya'cho cuartoni jinchoya'cho. Tsa cuartoma picco'cho tsu cinco cori'ccu onccan'cho dyaipa'chove dyaiñamba sarupai'ccu ttu'cho. Toya'caen tsa carpambe atandundu'su sombo'tti jinfanga tsu rande Chiganga afeye oque'je'chove cu'a yoshavama ñoña'choma ccutsiaña'cho. Toya'caen tsambe pporotsse tsu cu'a yoshavama ñoña'cho bandeja randema ccutsiaña'cho cuintsu tsanga Chigama afasundeccuja tsa'ccuma on'boemba otishi'jeye. Toya'caen carpa tsa'o, oque'je'cho, otishi'je'chombe utufama tsu sarupa ttuccuve ttuya'cho. Nane tsesuja cuarenta metro bia'su, veinte y ocho metro attaja'su, toya'caen dos metro sefa'suve tsu ttuya'cho. Tsa ttuccuta tsu sesenta dyaipa'chove dyaiña'chonga totoa sarupama dusian'choya. Toya'caen sombo'ttija cuatro dyaipa'chove dyaiña'chonga sarupama otata'choma dusiaña'cho. Nane Chigai'ccu cachuicco'je'cho carpa tsa'o'su sombo'tti toya'caen atandundu'su sombo'tti'qque tsu chiga sombo'jefani jiña'cho. Ñanda gi in'jan Aarón tise dutssiyendeccu Nadab, Abiú, Eleazar toya'caen Itamar cuintsu ñama afasundeccuve da'faye. Aarón tsu ñoa'me ñama afasundeccumbe na'suya. Toya'caen qui ccaninga ondiccu'je ñoa'me ñotssiave anchomba tsendeccunga ondiqquian'faya'cho. Nane tsa ondiccu'je tsu tise'paja Chigama afasundeccu qquen canjaeña. Poi a'ta sinte tsu oveja quitsaye fae canqque'fave an'bian'choma fi'ttiya'cho. Nane ñoa'me giya'tssiama tsu fi'ttipa ñanga afeya'cho. Tsa'su anjampama tasanga isupa tsu tsa oque'je'chombe utufanga bitssaeña'cho. Oque'je'chombe ombanga pa'cco oveja ai'voma oqueya'cho. Toya'caen tsu harina, yayapa, o'fa tsaja tsa'ccuma'qque afeya'cho. Sime'qque tsu tsa'cantsseyi afeya'cho. Nane sinte, sime'qque tsu ña que'i'ccu can'jen qquen in'jamba oquepa afe'jeya'cho. Poi sinte Aarón tuñoma ñoña'da tsu ñome'bama oqueya'cho. Toya'caen sime'qque tsa'caeñi tsoña'cho. Tsa'caen tsu Na'su Chigaja conda.