Éxodo 34 - Cofán: Chiga Tevaen'jen

Cuna patufin'dive manda'cho

¹ Na'su Chigaja Moisésnga su: —Ja'ñojan queyi patuma chattupa ñoñajan dos patufin'dive tayosia'cantsse. Tsonsi gi ña tsanga tevaeña que ttova u'cca'chonga afapa tevaenqquia'cantsse.

² Toya'caen tisuma ñoñajan tu'i sinte'yi Sinaí ccotta'cconga ansundeya'chove. Ansundepa ña tansin'choni can'jen'chonga catseja.

³ Majañi'qque que'i'ccu ansunde'masia tsu. Ni majañi'qque pa'cco ccotta'ccoma can'ma'sia tsu. Ni oveja, vaura'qque tsa ccotta'cco pporotsse shoshovima an'jen'masia tsu.

⁴ Tsama pañamba Moisésja patuma chattupa tayosia'cantsse ñoña. Ccaqui a'ta sinte'yi jangipa tsa dos patufin'dive ñoña'choma isupa Sinaí ccotta'cconga ansunde Na'su Chiga tisema mandaqquia'caen.

⁵ Tsonsi Na'su Chigaja unjimba'ccoi'ccu andepa tseni Moisési'ccu can'jen. Tsa'caen can'jemba tisu inisema conda.

⁶ Nane Moisés can'jen'tti'ye panshamba quian'me afapa qquen su: —¡Na'su Chiga gi! ¡Na'su Chiga gi! ¡Ñotsse in'jamba mendeye'su Chiga gi! ¡Junde iyicca'ye'ma'sia toya'caen ñoa'me a'tatsse injancho'cho Chiga gi!

⁷ Nane mil omba'su dutssiyendeccunga gi antte'beyi tsangae ñotsse in'jamba tise'pa egae tsincon'choma joqquitssiamba shacama'qque ccuchaya. Tsa'ma ñama chi'gapa egae tsincon'sumbe injama'choma somboemba tise dushundeccumbe, tsambe du'shumbe dushundeccumbe toya'caen tsambe dushundeccumbe injama'choma gi somboeña.

⁸ Tse'faei'ccuyi Moisésja andenga puntssan ccuipa Na'su Chigama iñajamba

⁹ qquen su: —¡Na'su! ¡Na'su! Ñoa'metsse que ñama in'jan'da ingima angacanjan. Va aindeccuta tsu ñoa'me injiengembitssi'fa. Tsa'ma ingi egae tsincon'choma aqque'papa ingija quembe'fa qquen injan'jenjan.

Ccase injancco'faya'chove afa'cho

¹⁰ Na'su Chigaja su: “Ñotsse paña'faja. Ja'ño gi poiyi'cco a'i fae'ngae injancco'faya'chove tson. Toya'caen osha'cho camboenitssia'ma gi que'inga canjaeña. Nane ni mani'su ande'suyi'qque tsu tsa'cantssia've tson'fambi. Tsa'caen tsonsi tsu poiyi'cco cca'isundeccu mani que'i tise'pama cachui'ninda atte'faya Na'su ma'caen oshapa tson'choma. Nane ña que'i'ccu tson'choja camboenitssia tsu.

¹¹ “Ja'ño ña que'inga manda'choma ñotsse tson'faja. Ña gi amoreondeccu, cananeondeccu, hititandeccu, ferezeondeccu, heveondeccu toya'caen jebuseondeccuma'qque joqquitssiamba tsa andema que'inga afeya.

¹² “Toya'caen tseni ca'nimba tsendeccui'ccu fae'ngae injancco'fajama, in'jamba'qque vacho'va'caen zuccosa'ne.

¹³ Tsa'cansi tise'pa chigandeccunga oque oraen'jen'ttima osuiamba pa'cco tseni ccutsu'cho tise'pa iñajan'jen'cho patu, toya'caen Asera chiga quini'ccoma'qque metsse cati'faja.

¹⁴ “Faesu chiganga iñajan'fajama. Nane Na'suta tsu ñoa'me sepipa. Tise iniseta tsu Sepipa Chiga.

¹⁵ “Tsa andeni cansesundeccui'ccu fae'ngae injancco'fajama, in'jamba'qque tise'pa chiganga afeye iñajan'jemba que'ima'qque ttu'sesi fae'ngae japa tise'pai'ccu tsa afe'cho aña'choma ansa'ne.

¹⁶ Tsambi'ta tsendeccu tise'pa onquengendeccuma que'i dutssiyendeccunga anttesi in'jamba'qque tise'pa chiganga iñajañe egae tson'jemba que'i dutssiyendeccuma'qque tsa'caen in'jaensi egae tson'fasa'ne.

¹⁷ “Toya'caen minga'ni'qque que'ija jongoesuma tssutssiamba ñoñaqque'su chigave ñoña'fajama.

Poi canqque'fa fiestaen'faya'cho

¹⁸ “Cupana'cco me'choa pan fiestamajan fiestaen'jen'faja. Nane ña mandaqquia'caen tsu siete a'ta pa'cco tsa cupana'cco me'choa panma an'faya'cho. Tsa'caen que'i tson'fa'cho ccovu tsu Abib. Nane tsa ccovuni qui que'ija Egiptone sombo'fa.

¹⁹ “Poiyi'cco que'i aishe dutssi'ye tsu ñambe. Tsa'caeñi vaura, oveja toya'caen chivo isusi quitsayeta tsu tsa'qque ñambe.

²⁰ Tsambi'pa boro aisheve isu'cho quitsayemanda tsu tsama afembe'yi oveja du'shu tsambi'ta chivo du'shuma ñanga afe'faya'cho. Tsa'ma tsa'caen afembi'ta qui boro du'shumbe catai'choma u'ccaya'cho. Toya'caen tsu tisu aishe dutssi'yene afe'choma ñanga afe'faya'cho. Nane jongoesuve me'ccoja ñani ji'masia tsu.

²¹ “Seis a'tayi tsu sema'faya'cho. Tsa'ma septimo a'taja ño'faya'cho a'ta tsu. Nane mapán jon'jemba tsambi'ta tai'je'a'qque tsu anttepa ño'faya'cho.

²² “Toya'caen Avujaqui'su fiesta, trigo aisheve nasi tai'cho'su fiesta, tai nanicho'su canqque'fa pasa'cho fiestama'qque fiestaen'faja.

²³ “Poiyi'cco tsandiendeccu tsu fae canqque'fanga tres se Na'su Chiga tsa israendeccumbe Chiganga catse'faya'cho.

²⁴ Ña gi faesu andesundeccuma joqquitssiamba tise'pa andema que'inga afe'ñaccaya. Tsa'cansi que'i poi canqque'fanga tres se Na'su que'i Chiganga catseye japa tisu andeni can'jembi'ni'qque tsu majañi'qque que'i andema itsaya'bi.

²⁵ “Chiganga afe'cho aña'choma afe'je'ta tsambe anjampama fae'ngae afejama cupana'ccopa pani'ccu. Toya'caen Chiga fi'ttimbe panshan'cho injienge'cho aña'choma ccaquine antte'fajama.

²⁶ “Majan aisheve na'cho teta'cho ñotssiama tsu Na'su que'i Chiga tsa'onga angaya'cho. “Toya'caen chivo du'shuma tise mama chochoi'ccu sho'ccoen'fajama.”

Chiga manda'choma tevaen'cho

²⁷ Na'su Chigaja Moisésma su: “Va ña su'choma tevaenjan. Nane va su'choja ña quei'ccu toya'caen israendeccui'ccu'qque injancco'fa'chove su'cho tsu.”

²⁸ Tsa'caen susi Moisésja cuarenta a'ta pa'cco toya'caen cuarenta cose tseni ambitsse cu'imbitsse Na'su Chigai'ccu can'jen. Tseni tsu Na'su Chigaja patufin'dinga injancco'fa'chove manda'cho, tsa Diez Manda'choma tevaen.

²⁹ Omboe Moisésja tsa dos patufin'dinga manda'chove tevaen'choma isupa Sinaí ccotta'cco'ye ande. Tsa'ma tise Na'su Chigai'ccu afa'jesi tise camba'ju chanjun'choma atesumbitsse ande.

³⁰ Tsa'caen Moisés camba'ju chanjun'choma attepa Aarón toya'caen poiyi'cco israendeccu ñoa'me dyopa tisenga catse'fambi.

³¹ Tsa'ma Moisésja Aarón toya'caen israendeccuma ttu'se. Tsa'caen ttu'sesi Aarón toya'caen israe'su coenzandeccu'qque tisenga bosi Moisésja tise'pai'ccu condase.

³² Omboe poiyi'cco israendeccu catsesi Moisésja pa'cco Na'su Chiga Sinaí ccotta'cco'ye afapa manda'choma condase.

³³ Tsa'caen tsendeccunga condase nanimba Moisésja tisu camba'juma pañeroi'ccu picco.

³⁴ Moisésja Na'su Chigai'ccu afaye tsa carpanga ca'ninda tisu oppoen'cho pañeroma fetta tisu tsene somboya'ngae. Tsa'caen Na'sui'ccu condase nanimba israendeccunga condase pa'cco Na'su Chiga mandapa su'choma.

³⁵ Tsama paña'jemba israendeccu Moisés camba'ju chanjun'choma atte'nijan ccase tisu pañeroi'ccu camba'juma oppoen. Tsa'caen tsu oppoen ccase Na'su Chigai'ccu afaye ca'niña'ngae.