Éxodo 33 - Cofán: Chiga Tevaen'jen

Na'su Chiga ja'faye manda'cho

¹ Na'su Chigaja Moisésnga su: —Va'ttie sombopa que Egiptone somboen'cho aindeccui'ccu jaja. Nane ña Abraham, Isaac toya'caen Jacobnga supa tise'pa omba'su dushundeccunga afeye su'cho andeni jaja.

² Ña gi moeña ñama shondo'suma cuintsu que'ima angaye. Toya'caen gi tsoña cuintsu tsa ande'su cananeondeccu, amorreondeccu, hititandeccu, ferezeondeccu, heveondeccu, toya'caen jebuseondeccuma joqquitssiañe.

³ Ja'faja. Nane tseni tsu chocho, tuño cuñajun'cho'qque tsa'qquia'caen sombo'je'cho ande. Tsa'ma ñajan que'i'ccu fae'ngae jaya'bi gi in'jamba'qque que'ima utu tsaiquinga sefaensa'ne. Nane que'ita qui ñoa'me injiengembitssi'fa.

⁴ Aindeccuja tsa'caen afasepa su'choma pañamba ñoa'me ñombi'yepa majañi'qque ccase sasiyoma dusian'fambi ni andu'pama andu'fambi.

⁵ Nane Na'su Chiga tsu Moisésnga qquen su: —Israendeccunga vama condaja: ‘Que'i qui ñoa'me injiengembitssi'fa. Nane ña que'i'ccu aqquia re'riccoe can'jen'choecan'da gi metsse que'ima sefaeñe'can. Ja'ñoñi sasiyo, andupama'qque antte'faja. Tsonsi gi atteya ma'caen que'ima tsoña'chove.’

⁶ Tsa'caen susi pañamba israendeccuja Horeb ccotta'cco'ye sombo'ta poiyi'cco tise'pa sasiyo, andupama'qque andu'fambi.

Chigai'ccu cachuicco'je'tti'su carpa

⁷ Moisésja atesu faesu carpama canqque joccani ccutsiañe. Ccutsiamba tsa carpama inisian: Chigai'ccu cachuicco'je'cho carpa. Majan a'i Na'su Chigama iñajañe in'jan'da tsa canqque joccani ccutsu'cho carpani ja'je'fa.

⁸ Nane maqui Moisés tsa carpani jayi'nijan poiyi'cco a'i tisupa can'jen'cho carpa cani'jen'ttinga ccutsupa caña'jeñi moe'fa Moisés tsa carpanga ca'niña'ngae.

⁹ Tsa'caen Moisés tse'ttinga japa ca'ni'ninda tsu Chiga unjimba'cco andepa tse'ttinga duse tsa carpanga cani'jen'ttini. Tsa'caen duse'ni tsu Na'su Chigaja Moisésnga afa'je.

¹⁰ Aindeccuja maqui tsa'caen unjimba'cco ande dusesi atte'ta tisupa carpanga cani'jen'ttinga ccaru dyaipa Chigama iñajan'fa.

¹¹ Nane Chigaja Moisési'ccu cambajunaccu tisu amigoma'caen condasecco'je. Tsa'caen condase nanimba Moisésja canqqueni ji'je. Tsa'ma tisema shondo'su Josué, tsa pushe me'choa Nun dutssi'yeja, minga'ni'qque joqquitssi'jembi tsa carpa tsa'o'ye.

Chiga tise ñotssiama canjaen'cho

¹² Moisésja Na'su Chiganga su: —Que canjan, que qui manda ña va aindeccuma angacañe. Tsa'ma condambi qui majama ñai'ccu moeña'chove. Toya'caen qui su ñama ñotsse in'jamba atesu ñajan que in'janqquia'caen tsoña'chove.

¹³ Nane ñoa'me que su'cho tsa'camajan que asi'ttaemba in'jan'choma ñanga canjaenjan cuintsu ñajan que suqquia'caen tsoña'chove atesupa toya quei'ccu jacan qquen injan'jeñe. Ñotsse in'janjan va aindeccuja que aindeccu tsu.

¹⁴ Tsonsi Na'suja su: —Ñañi gi quema fuitepa toya'caen ñofaen'jeña.

¹⁵ Tsa'caen susi Moisésja su: —Tsa'caen que ingi'ccu jacañambi'ta ingima va'ttie somboembe canjan.

¹⁶ Nane tsa'caen que fuitecambian'da gi faesu aindeccui'ccu fae'ngatssia've da'faya. Tsa'ma que ingi'ccu fae'ngae jacamba fuite'yi'ta gi in'jan'fa ingija que aindeccu'fa toya'caen que ingima ñotsse in'jan'chove'qque.

¹⁷ Tsonsi Na'su Chigaja su: —Tsa que su'chomanda gi tsa'caen tsoña. Ñoa'me quema ñotsse in'jamba que ña suqquia'caen tsoña'chove'qque in'jamba gi tsa'caen tsoña.

¹⁸ Na'su tsa'caen susi Moisésja iñajamba su: —¡Antteja ña que ñotssiama atteye!

¹⁹ Tsa'ma Na'su Chigaja su: —Pa'cco ña ñotssiama gi quenga canjaeña. Toya'caen ña inisema'qque gi quenga condaya. Nane majama ña in'jan'da tsama gi mende'ye.

²⁰ Tsa'ma gi su queja ña camba'juma atteye oshambi qui. Nane majañi'qque tsu ñama attepa ti'tsse canseye oshambi.

²¹ Toya'caen Na'su Chigaja su: —Que canjan, ñai'ccu pporotsse tsu patuvo'cho ccui cuintsu que tsani ccutsuye.

²² Nane ña ñotssiama attiamba gi quema patuvo'cho changonga ca'niamba ña tivei'ccu piccoya tisu panshaña'ngae.

²³ Tsomba ña tivema joqquitssiansi qui ña sepaccoma atteye oshaya. Tsa'ma ña camba'juma atteya'bi qui.