Éxodo 32 - Cofán: Chiga Tevaen'jen

Corima ñoña'cho vaura du'shu

¹ Israendeccuja Moisés uta ccotta'ccone jimbisi Aarónga bopa tisema su'fa: —Japa chigandeccuve ñoñajan cuintsu ingima angacañe. ¿Ma'caen gi atesu'faya ingima Egiptone somboen'su Moisés ma'caen da'chove?

² Tsonsi Aarónjan su: —Que'i pushendeccu, que'i dutssiyendeccu, que'i onquengendeccu tsosinani dusian'cho cori sasiyoma isupa ñani i'faja.

³ Tsa'caen susi poiyi'cco tise'pa tsosina'su cori sasiyoma battiamba Aaróni anga'fa.

⁴ Tsonsi Aarónjan isupa tsa corima tssutssiamba fiña cuintsu vaura du'shua'caen somboye. Tsomba ñoñaqque'su yoshavai'ccu ñoa'me nanitsse nani. Tsonsi poiyi'cco a'i tsama attepa qquen su'fa: —¡Israendeccu, va tsu que'i chiga, que'ima Egiptone somboen'su!

⁵ Tsa'caen tson'fasi attepa Aarónjan oque oraenqque'suve tsa vaura du'shui'ccu pporotsse ñoñamba qquen fundo: —¡Jinge tu'i fiestaen'faye Na'suma ñotsse afaye!

⁶ Ccaqui a'ta sinte'yi jangipa afe'choma oque oraemba, ñoquiañe afeqque'suve'qque, tsa ñoña'cho vauranga afe'fa. Tsa'caen tsomba tse'i aindeccuja dyaipa amba cui'je'fa. Omboe jangipa egae tsincoñe ashaen'fa.

⁷ Tsonsi Na'su Chigaja Moisésnga su: —¡Junde andepa jaja! Egiptone que somboen'cho aindeccu tsu qqueye tson'jen'fa.

⁸ Nane jundeyi tsu joqquitssi'fa ña mandapa afe'cho tsaiqui'ye. Joqquitssipa tsu corima vaura du'shua'caen ñoñamba tsanga iñajamba afe'choma'qque afe'fa. Tsomba tsu qquen su'fa: ‘¡Israendeccu, va tsu que'i chiga, que'ima Egiptone somboen'su!’

⁹ Toya'caen tsu Na'su Chigaja Moisésma su: —Tsendeccuma attepa gi in'jan tise'pa pañambiqquia'caen tsincon'fa'choma.

¹⁰ Ja'ño ñama antteja ña iyicca'ye'choi'ccu metsse tsendeccuma sefaeñe. Tsa'ma que'i'ccu gi tsain'bitssi a'ive atapoeña.

¹¹ Moisésja tsa'caen in'jambipa Na'su Chigama ñoquiañe in'jamba qquen su: —Ña Na'su, ¿jongoesie qui que aindeccuma iyicca'ye? Nane queyi qui tise'pama Egiptone somboen osha'cho paqque'sui'ccu tsomba.

¹² Tsa'caen tson'da, ¿ma'caen qui antteya cuintsu Egiptondeccu qquen su'faye: ‘Chigaja tsa'caen a'i menia angapa israendeccuma fi'ttiye qquen in'jamba somboen. Nane metsse sefaeñe somboen’? Tsa'caen in'jan'fasa'ne que iyicca'ye'choma antteja. Aqque'paja que aindeccuma dañoñe in'jan'choma.

¹³ Injan'jenjan quema shondo'su Abraham, Isaac, toya'caen Israelma'qque que tisu injama'choi'ccu in'jamba ñoa'me su'chove afapa qquen su'choma: ‘Que omba'su dutssiyendeccuma gi atapoeña cuintsu sefacconi'su o'fema agattoye oshambi'qquia'caen tise'pama'qque agattoye oshambiye.’ Toya'caen ‘Pa'cco va ña afeya qquen su'cho andema gi tsangae que'inga afeya.’

¹⁴ Moisés tsa'caen susi Na'su Chigaja tise aindeccuma dañoñe in'jan'choma antte.

¹⁵ Tsonsi Moisésja Chiga mandapa tevaemba afe'cho dos patufin'dima isupa ccotta'cco'ye andeye ashaen. Nane patufin'dita tsu poifama tevaen'cho.

¹⁶ Chigayi tsu tsa patufin'dive ñoñamba tise'yi tise in'jan'choma tsanga tevaen.

¹⁷ (Moisés ccotta'cco'ye andejipa Josué can'jeni jisi) Josuéja aindeccu fundo'je'choma pañamba Moisésnga conda: —Canqquene geraen'jemba fundojeqquia'caen gi paña.

¹⁸ Tsa'ma Moisésja su: —Yata tsu patsupa avujapa settapoen'jen'chombi ni ganañemba ñombi'yepa settapoen'jen'chombi. Nane ñanda gi paña ccaninga settapoen'bave.

¹⁹ Tsa'caen supa canqquenga nepipa corima ñoña'cho vaura du'shuma atte. Toya'caen boira'je'choma'qque attepa ñoa'me iyicca'yepa tse'tti ccotta'cco andepa'ttinga tisu isu'cho patufin'dima ttova do'jo.

²⁰ Tsa'caen tsomba jundeyi tsa vaura du'shuma isupa si'ngenga ttova ccuiña. Ttova ccuiñasi ñoa'me ju'rusi isupa vu'vutsse sun'dapa tsa'ccunga ganga. Gangapa manda cuintsu israendeccu tsa'su tsa'ccuma cu'i'faye.

²¹ Tsomba Aarónma su: —¿Jongoesuma va aindeccu quenga tson'fasi qui qquen tson cuintsu va aindeccu tsa'caen egae tsincon'faye?

²² Tsonsi Aarónjan su: —Ña na'su, ñama iyicca'yejama. Que'qque qui ñoa'me atesu va aindeccu egae tsincoñe in'jan'choma.

²³ Tise'pa tsu ñama su'fa: ‘Chigandeccuve ñoñajan cuintsu ingima angacañe. ¿Ma'caen gi atesu'faya ingima Egiptone somboen'su Moisés ma'caen da'chove?’

²⁴ Tsonsi gi ñajan su: ‘Majan corima an'bian'da afe'faja.’ Tise'pa corima afesi gi si'ngenga catisi tsu va vaura du'shuve sombo.

²⁵ Tsa'caen susi Moisésja in'jan aindeccu oshambipa injanga tson'fa'choma. Nane Aarón ñotsse angacambisi qque'fasi tise'pai'ccu iyiccosundeccu'qque israendeccuma chi'gapa feñañe osha'fa.

²⁶ Tsa'caen in'jamba Moisésja canqquenga cani'jen'ttinga ccutsupa qquen su: —Majan Na'su Chigave injan'jen'chota ñai'ccu bo'faja. Tsa'caen susi poiyi'cco Leví aindeccu tisenga bo'fa.

²⁷ Tsonsi Moisésja tise'panga su: —Qquen tsu Na'su Chigaja su, tsa israendeccu Chiga: ‘Poiyi'cco que'i'su matichima isupa poi carpani japa majan tsa vauranga iñajansundeccuma fittitti'faja. Nane majan que antian, majan que amigo, toya'caen que'i'ccu pporotsse canjen'su tsa'caen tson'nijan tsendeccuma'qque fittitti'faja.’

²⁸ Levítandeccu tsa'caen Moisés manda'choma pañamba tson'fasi tsu tsequi a'ta tres mil a'i pa'fa.

²⁹ Tsonsi Moisésja su: —Ja'ño Na'suma pañamba que'i majan tisu dutssi'ye, majan tisu antianma fitti'ttipa qui Na'su ñotssianga ca'ni'fa. Tsa'cansi tsu ja'ño Na'su Chigaja que'ima ñotsse tsoña.

³⁰ Ccaqui a'ta Moisésja aindeccunga su: —Que'ita qui ñoa'me egae tsincon'chove tson'fa. Tsa'cansi gi ja'ño ccase Na'su can'jeni ansundeya'cho. Tseni japa gi atesuya tise que'ima ñoqui'chove.

³¹ Tsa'caen supa Moisésja ccase Na'su can'jeni japa qquen su: —Nane aindeccuja ñoa'me tsu egae tson'fa corima chigave ñoñamba.

³² Quema gi iñajan, chigáne tise'pama ñoquija. Tsa'ma ñoquiye chi'ga'ta ña inisema ccuchaja que tevaen'jenga tevaen'choma ña'qque tsendeccui'ccu fae'ngae catiyeye.

³³ Tsa'ma Na'su Chigaja qquen su: —Jo'su ñama chi'gapa egae tsinconsundeccumbe iniseveyi gi ccuchaya.

³⁴ Tsa'cansi japa aindeccuma angaja ña su'cho andeni. Ñama shondo'su tsu que'ima angaya. Tsa'ma maqui tise'pama vanaeña'cho a'ta nepisi gi tise'pa egae tsincon'chone vanaeña.

³⁵ Tsa'caen supa Na'su Chigaja tsa Aarón ñoña'cho vaurama iñajansundeccunga paqque'suma moe.